ទីក្រុងវៀងចន្ទន៍ៈ តម្លៃទំនិញ និងសេវាកម្មក្នុងប្រទេសឡាវបន្តកើនឡើងក្នុងអត្រាមួយដែលមិនអាចព្យាករបានចាប់តាំងពីខែសីហា ឆ្នាំ ២០២០ ដោយកើនឡើង ៥,២៧ ភាគរយកាលពីខែធ្នូ បើធៀបនឹងតួលេខសម្រាប់ខែដូចគ្នាឆ្នាំ ២០២០។
អត្រាអតិផរណាធៀបនឹងរយៈពេលដូចគ្នាឆ្នាំ ២០២០ បានកើនឡើងជាង ៤ ភាគរយចាប់តាំងពីខែកញ្ញា ឆ្នាំ ២០២១ ដែលត្រូវបានជំរុញដោយកត្តាជាច្រើនរួមមាន តម្លៃអាហារ និងការចំណាយលើផ្នែកទំនាក់ទំនង ការដឹកជញ្ជូន និងការថែទាំវេជ្ជសាស្ត្រ។
ជាឧទាហរណ៍ តម្លៃប្រេងឥន្ធនៈបានកើនឡើង ៣៨,៧ ភាគរយកាលពីខែមុន (ខែធ្នូ) ធៀបនឹងរយៈពេលដូចគ្នាឆ្នាំ ២០២០ ខណៈតម្លៃសាច់ជ្រូកបានកើនឡើងគួរឱ្យកត់សម្គាល់។ លើសពីនេះ ការធ្លាក់តម្លៃរូបិយប័ណ្ណគីប (ឡាវ) ធៀបនឹងប្រាក់បាតថៃ និងប្រាក់ដុល្លារបានបង្កើនតម្លៃនៅទីផ្សារក្នុងស្រុក ជាពិសេសសម្រាប់ទំនិញនាំចូល។
ការិយាល័យស្ថិតិរបស់ប្រទេសឡាវបានឱ្យដឹងថា សន្ទស្សន៍តម្លៃទំនិញប្រើប្រាស់បានកើនឡើង ០,២៣ ភាគរយកាលពីខែធ្នូ បើប្រៀបធៀបជាមួយតួលេខខែវិច្ឆិកា ខណៈអតិផរណាធៀបនឹងរយៈពេលដូចគ្នាកាលពីឆ្នាំ ២០២០ បានកើនឡើងពី ៥,០៤ ភាគរយដល់ ៥,២៧ ភាគរយកាលពីខែធ្នូ ដែលជាចំណុចខ្ពស់បំផុតបានកត់ត្រាក្នុងរយៈពេល ១៥ ខែ។
ភាពមិនច្បាស់លាស់ផ្នែកសេដ្ឋកិច្ចពិភពលោកអាចជះឥទ្ធិពលបន្ថែមទៀតដល់សេដ្ឋកិច្ចប្រទេសឡាវ ជាពិសេសវិស័យទេសចរណ៍ និងការវិនិយោគ។
ការរីករាលដាលជំងឺកូវីដ ១៩ បានបន្តរំខានដល់ខ្សែចង្វាក់ផ្គត់ផ្គង់សកល ដែលនាំឱ្យមានការខ្វះខាត និងបង្កើនតម្លៃទំនិញ ដោយសារភាពមិនត្រូវគ្នារវាងតម្រូវការ និងការផ្គត់ផ្គង់។ កាលពីខែធ្នូ ការចំណាយផ្នែកទំនាក់ទំនង និងការដឹកជញ្ជូនបានកើនឡើង ១,៦ ភាគរយ ធៀបនឹងខែវិច្ឆិកា និង ១២,៧ ភាគរយ ធៀបឆ្នាំ ២០២០។
តម្លៃរថយន្ត និងឧបករណ៍ដឹកជញ្ជូនបានកើនឡើង ១២,៤ ភាគរយ និង ២០,៦ ភាគរយរៀងគ្នាធៀបនឹងរយៈពេលដូចគ្នាកាលពីឆ្នាំមុន។
តម្លៃការថែទាំវេជ្ជសាស្ត្របានកើន ០,៥ ភាគរយរវាងខែធ្នូធៀបខែវិច្ឆិកា និង ៨,២ ភាគរយធៀបនឹងរយៈពេលដូចគ្នាកាលពីឆ្នាំ ២០២០ ដោយសារការកើនឡើងតម្លៃថ្នាំពេទ្យ និងសេវាមន្ទីរពេទ្យ។
តម្លៃឱសថកើនឡើង ៧,៨ ភាគរយធៀបនឹងរយៈពេលដូចគ្នាឆ្នាំ ២០២០ ខណៈតម្លៃសេវាមន្ទីរពេទ្យ និងគ្លីនិកបានកើន ១៣,៥ ភាគរយ។
តម្លៃនៅភោជនីយដ្ឋាន និងសណ្ឋាគារក្នុងខែធ្នូ បានកើន ០,៧ ភាគរយធៀបខែវិច្ឆិកា និង ៨,៣ ភាគរយធៀបនឹងរយៈពេលដូចគ្នាឆ្នាំ ២០២០។
ជាឧទាហរណ៍ តម្លៃអាហារដែលគិតថ្លៃដោយភោជនីយដ្ឋាន និងសណ្ឋាគារបានកើនឡើង ១០,៤ ភាគរយធៀបទៅរយៈពេលដូចគ្នាឆ្នាំ ២០២០ ខណៈតម្លៃផ្ទះសំណាក់ និងសេវាកម្មសណ្ឋាគារបានធ្លាក់ចុះ ០,៨ ភាគរយធៀបរយៈពេលដូចគ្នាឆ្នាំ ២០២០។
លើសពីនេះ តម្លៃផ្ទះ ទឹក អគ្គិសនី និងឧស្ម័ន បានកើន ០,៧ ភាគរយបើធៀបរយៈពេលដូចគ្នាខែមុន (វិច្ឆិកា) និង ៥,៨ ភាគរយធៀបនឹងរយៈពេលដូចគ្នាកាលពីឆ្នាំ ២០២០។
តម្លៃនៃសេវាកម្មសំណង់បានកើនឡើង ៩,៥ ភាគរយធៀបនឹងរយៈពេលដូចគ្នាកាលពីឆ្នាំ ២០២០ ខណៈដែលតម្លៃឧស្ម័ន និងប្រភពថាមពលផ្សេងទៀតបានកើនឡើង ៦,៤ ភាគរយ។ តម្លៃសម្លៀកបំពាក់ និងស្បែកជើងបានកើនឡើង ១,៨ ភាគរយធៀបនឹងរយៈពេលដូចគ្នាកាលពីខែមុន និង ៥,៤ ភាគរយធៀបនឹងរយៈពេលដូចគ្នាឆ្នាំ ២០២០។ ជាឧទាហរណ៍តម្លៃសម្លៀកបំពាក់បុរសបានកើនឡើង ៦,៤ ភាគរយ ខណៈតម្លៃសម្លៀកបំពាក់ស្ត្រីបានកើនឡើង ៤,២ ភាគរយធៀបនឹងរយៈពេលដូចគ្នាកាលពីឆ្នាំ ២០២០។
ទន្ទឹមនឹងនេះដែរ តម្លៃម្ហូបអាហារ និងភេសជ្ជៈគ្មានជាតិអាល់កុលបានកើនឡើង ២,៧ ភាគរយធៀបនឹងរយៈពេលដូចគ្នាឆ្នាំ ២០២០ ចំណែកតម្លៃប្រេងឆា និងគ្រឿងទេសកើនឡើង ២៩,៦ ភាគរយ និង ១៩,៧ ភាគរយរៀងគ្នាធៀបនឹងរយៈពេលដូចគ្នាឆ្នាំ ២០២០៕ Vientiane Times/Asia News Network/LA