.jpg)
ការសិក្សាតាមអនឡាញនឹងក្លាយជាធាតុស្នូលដ៏សំខាន់នៅក្នុងប្រព័ន្ធអប់រំ។
ការឆ្លងរាលដាលជំងឺកូវីដ១៩ នៅទូទាំងពិភពលោក បានផ្លាស់ប្ដូរវិស័យអប់រំឱ្យឈប់ដូចដើមជារៀងរហូត។ សាលារៀននៅទូទាំងប្រទេសកម្ពុជា បានបិទទ្វារ ដោយប៉ះពាល់ដល់សិស្សានុសិស្សរាប់លាននាក់ ដែលត្រូវតែសម្របខ្លួនទៅនឹងវិធីសាស្ត្ររៀនសូត្រថ្មីៗ។
នៅទូទាំងប្រទេស សិស្សានុសិស្សជាង ៣,៨លាននាក់ មិនបានចូលរៀននៅក្នុងថ្នាក់រៀនដោយផ្ទាល់ទេ ដោយសារតែវិធានការបិទខ្ទប់ដើម្បីប្រយុទ្ធប្រឆាំងនឹងការឆ្លងរាលដាលនៃជំងឺកូវីដ១៩។ សិស្សត្រូវងាកទៅប្រើប្រាស់កម្មវិធីឌីជីថលនានា ដើម្បីរៀនសូត្រតាមអនឡាញវិញ។
វាគឺជាកិច្ចខិតខំប្រឹងប្រែងមួយដើម្បីកាត់បន្ថយផលប៉ះពាល់ដែលវិបត្តិកូវីដ១៩ មានទៅលើវិស័យអប់រំ។ ក្រសួងអប់រំ យុវជន និងកីឡា បានសហការគ្នាជាដៃគូជាមួយក្រុមហ៊ុន មិត្តហ្វូន បង្កើតកម្មវិធីឌីជីថល SIS Cambodia ឡើង ដើម្បីផ្ដល់សេវាអ៊ីនធឺណិតដោយឥតគិតថ្លៃសម្រាប់ការរៀនតាមអនឡាញ ប្រព័ន្ធគ្រប់គ្រងព័ត៌មានសាលារៀន និងថ្នាក់រៀនជាដើម។
កម្មវិធីអ៊ែប SIS Cambodia បានបង្កើនសមត្ថភាពរបស់ខ្លួនដើម្បីផ្ដល់នូវដំណោះស្រាយច្រកចេញចូលតែមួយសម្រាប់ទាំងគ្រូបង្រៀន និងសិស្សានុសិស្ស។ កម្មវិធីនេះរួមបញ្ចូលនូវប្រព័ន្ធគ្រប់គ្រងព័ត៌មានសាលារៀន កម្មវិធីរៀនតាមអនឡាញ និងបណ្ណាល័យអនឡាញដែលមានសៀវភៅឌីជីថលជាច្រើនដ៏សម្បូរបែប។ កម្មវិធីនេះក៏ផ្ដល់ដល់គ្រូបង្រៀននិងសិស្សានុសិស្សនូវពេលវេលាប្រជុំតាមវីដេអូឥតដែនកំណត់ លទ្ធភាពធ្វើកិច្ចការសាលាតាមអនឡាញ ព្រមទាំងការប្រាស្រ័យទាក់ទងភ្លាមៗទាន់ពេលវេលាតាមអនឡាញ សម្រាប់សិស្ស លោកគ្រូអ្នកគ្រូ និងអាណាព្យាបាលសិស្ស។
ឌីជីថលគឺជាអនាគតនៃការសិក្សា
សមាហរណកម្មបច្ចេកវិទ្យាព័ត៌មានទៅក្នុងវិស័យអប់រំ នឹងត្រូវពន្លឿនកាន់តែលឿនថែមទៀត ហើយនៅទីបំផុតទៅ ការអប់រំតាមអនឡាញនឹងក្លាយជាធាតុស្នូលដ៏សំខាន់មួយនៃប្រព័ន្ធអប់រំនៅតាមសាលារៀន។ ខណៈកម្ពុជាឆ្លងកាត់ភាពប្រឈមនៃការអភិវឌ្ឍជាច្រើន ការធ្វើឌីជីថលូបនីយកម្មការអប់រំនឹងជួយពង្រឹងបន្ថែមដល់គ្រឹះសម្រាប់ការអប់រំប្រកបដោយនិរន្តរភាព។
ជាមួយនឹងការប្រើប្រាស់បច្ចេកវិទ្យាត្រឹមត្រូវ មានភ័ស្តុតាងបង្ហាញថា ការសិក្សាតាមអនឡាញអាចមានប្រសិទ្ធភាពជាងតាមរូបភាពជាច្រើន។ ការសិក្សាខ្លះបង្ហាញថា គិតជាមធ្យម សិស្សចាប់បានខ្លឹមសារមេរៀនពី ២៥% ទៅ ៦០% នៅពេលរៀនតាមអនឡាញ ច្រើនជាងការរៀននៅក្នុងថ្នាក់រៀនផ្ទាល់ ដែលពួកគេចាប់បានខ្លឹមសារមេរៀនពី ៨% ទៅ ១០%។ នេះគឺដោយសារតែសិស្សអាចរៀនបានលឿនជាងនៅលើអនឡាញ ហើយការរៀនតាមអនឡាញត្រូវការពេលវេលាតិចជាងការរៀននៅក្នុងថ្នាក់រៀនបែបប្រពៃណីពី ៤០% ទៅ ៦០% ពីព្រោះសិស្សអាចរៀនតាមលទ្ធភាពនៃល្បឿនរបស់ពួកគេផ្ទាល់ ដោយអាចវិលត្រឡប់សាដើមវិញ អានឡើងវិញ រំលង ឬពន្លឿនតាមបែបគំនិតដែលពួកគេអាចជ្រើសរើសបានដោយខ្លួនឯង។
ហេតុអ្វីសាលារៀនគួរពិចារណាធ្វើឌីជីថលូបនីយកម្ម?
ក្នុងពេលកន្លងមក វិស័យអប់រំត្រូវបានគេសង្កេតឃើញថា ការដាក់បញ្ចូលរូបភាពក្រាហ្វិកនៃការអប់រំបែបឌីជីថលបានបង្ហាញនូវការចូលរួមខ្ពស់ជាងមុន និងការជក់ចិត្តចង់រៀនសូត្រជាងមុន ជាពិសេសក្នុងចំណោមសិស្សានុសិស្សក្មេងៗ ដែលធ្វើឱ្យពួកគេចូលចិត្តរៀនសូត្រនូវអ្វីៗដែលថ្មី។
អ្វីដែលបានបង្ហាញឱ្យឃើញយ៉ាងច្បាស់នៅក្នុងអំឡុងពេលវិបត្តិជំងឺកូវីដ១៩ នេះ គឺសារសំខាន់នៃការប្រែក្លាយការអប់រំទៅជាឌីជីថល នៅគ្រប់ខេត្តក្រុង គ្រប់គ្រឹះស្ថាន និងគ្រប់ផ្នែកនៅក្នុងសង្គម។ ប្រសិនបើបច្ចេកវិទ្យារៀនតាមអនឡាញអាចធ្វើឱ្យមានប្រសិទ្ធភាពនៅទីនេះ វាគឺជាទំនួលខុសត្រូវរបស់យើងគ្រប់រូប ក្នុងការសម្រេចឱ្យបានសក្ដានុពលពេញលេញរបស់វា៕
