.jpg)
កសិករប្រមូលផលតាសក់នៅសង្កាត់កោះដាច់ ខណ្ឌជ្រោយចង្វារ នាពេលកន្លងទៅ។ ហុង មិនា
ភ្នំពេញៈ ក្រសួងកសិកម្មបានសម្រេចវិនិយោគលើផ្សារបោះដុំ ដែលមានការរៀបចំហេដ្ឋារចនាសម្ព័ន្ធត្រួតពិនិត្យ និងការបញ្ជាក់ពីគុណភាព សុវត្ថិភាពត្រឹមត្រូវនៅទីតាំងចំនួន ៣ កន្លែងនៅជាយរាជធានីភ្នំពេញ ខេត្តបាត់ដំបង និងខេត្តត្បូងឃ្មុំ ក្នុងឆ្នាំ ២០២២ នេះ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានប្រាប់ភ្នំពេញប៉ុស្តិ៍ថា ផ្សារបោះដុំ ដែលក្រសួងកំពុងរៀបចំនេះ គឺជាផ្សារបោះដុំលក់ផលិតផលកសិកម្មដែលមានការបញ្ជាក់គុណភាព និងសុវត្ថិភាព ត្រឹមត្រូវ ដើម្បីផ្តល់ទំនុកចិត្តដល់អ្នកទទួលទាន។
លោកបន្តថា ផ្សារបោះដុំថ្មីនេះនឹងក្លាយជាកន្លែងប្រមូលផ្តុំ និងចែកចាយបន្លែ និងផលិតផលកសិកម្មដែលផ្តល់សុវត្ថិភាពដល់អ្នកប្រើប្រាស់ និងជាការពង្រីកទីផ្សារឱ្យកសិករផងដែរ។
លោករដ្ឋមន្ត្រីបានបញ្ជាក់ថា៖ «ផ្សារបោះដុំនឹងមានរៀបចំប្រព័ន្ធបញ្ជាក់ប្រភពដើមផលិតផល និងរចនាសម្ព័ន្ធគាំទ្រជាច្រើនដូចជា ទូត្រជាក់ តាមយន្តការ PPP (Plant Protection Product) នៅលើទីតាំងជាកម្មសិទ្ធិរបស់រដ្ឋ និងឯកជន ដែលមានសក្តានុពលខ្ពស់ ដោយធ្វើការសាកល្បងក្នុងជំហានទី ១ ចំនួន ៣ ទីតាំងដូចជា តំបន់ជាយក្រុងភ្នំពេញ ខេត្តបាត់ដំបង និងខេត្តត្បូងឃ្មុំ»។
លោកបញ្ជាក់ថា ផែនការនេះមានគោលដៅសម្រេចឱ្យបានជោគជ័យក្នុងឆ្នាំ ២០២២ នេះដោយបន្លែមានសុវត្ថិភាពទាំងអស់មិនត្រឹមតែអាចផ្គត់ផ្គង់ក្នុងស្រុកប៉ុណ្ណោះទេ ថែមទាំងអាចនាំចេញក្រៅប្រទេសផងដែរ។
លោក ហ៊ុន ឡាក់ អគ្គនាយកក្រុមហ៊ុន ត្រូពិកខេម ដែលកំពុងវិនិយោគលើការដាំដុះបន្លែសុវត្ថិភាព បានឱ្យដឹងថា ការរៀបចំឱ្យមានផ្សារបោះដុំបន្លែសុវត្ថិភាពនេះ គឺជាគោលបំណងធំរបស់លោក ដោយកន្លងទៅក្រុមហ៊ុនលោកបានចាប់ផ្តើមរៀបចំឱ្យមានការធ្វើទំនើបកម្មកសិកម្ម ការដាំដុះដំណាំសាកវប្បកម្ម ដោយកាត់បន្ថយការប្រើប្រាស់ថ្នាំពុលគីមី ហើយងាកមកប្រើប្រាស់ជីធម្មជាតិវិញ។
លោកបានបន្ថែមថា ដោយមានការសហការពីអគ្គនាយកដ្ឋានកសិកម្មក្រុមហ៊ុនលោកបានរៀបចំមជ្ឈមណ្ឌលបន្លែសុវត្ថិភាពគំរូមួយរួចហើយ ក្នុងការបង្កើតភាពជាដៃគូ ដើម្បីជំរុញខ្សែចង្វាក់បន្លែសុវត្ថិភាពតាមស្តង់ដាការអនុវត្តកសិកម្មល្អ (CamGAP)។
លោកនិយាយថា៖ «ដើម្បីឱ្យផ្សារនេះដំណើរការបានល្អនាពេលអនាគត គឺទាមទារឱ្យយើងប្រឹងប្រែងផលិតដែរដោយជំរុញឱ្យកសិករមានអាជីពជាអ្នកដាំដុះដំណាំសាកវប្បកម្មទាំងអស់ត្រូវប្រឹងប្រែងផលិតឱ្យបានច្រើនដង ដោយប្រើប្រាស់ធាតុចូលកសិកម្មឱ្យបានត្រឹមត្រូវ និងអនុវត្តកសិកម្មល្អជាដើម ដើម្បីចៀសវាងការប្រឈមនឹងការប្រកួតប្រជែងតម្លៃជាមួយនឹងបន្លែនាំចូលពីក្រៅប្រទេស»។
លោក សម វិទូ នាយកមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា សេដាក (CEDAC) បាននិយាយថា កសិករ ក៏ដូចជាអ្នកដាំដុះបន្លែសុវត្ថិភាពនឹងលែងមានបញ្ហាទីផ្សារនៅពេលដែលមានផ្សារបោះដុំថ្មីនេះ ប៉ុន្តែត្រូវមានការគិតគូរពីតម្លៃឱ្យបានសមរម្យ ដើម្បីឱ្យអ្នកបរិភោគទទួលយកបាន និងអាចប្រកួតប្រជែងជាមួយប្រទេសជិតខាងផងដែរ។
លោក វិទូ បានលើកឡើងថា៖ «ជាធម្មតា អ្នកលក់តែងតែចង់បានតម្លៃខ្ពស់ ប៉ុន្តែត្រូវតែមានការកំណត់តម្លៃសមរម្យមួយ ដែលអាចមានការប្រកួតប្រជែងដែរសម្រាប់អ្នកបរិភោគ ព្រោះថាផលិតផលនាំចូលថ្វីដ្បិតតែមានការដឹកជញ្ជូនមកឆ្ងាយមែន ប៉ុន្តែតម្លៃធូរថ្លៃជាងផលិតផលនៅក្នុងស្រុក ដូចនេះរឿងតម្លៃគឺជាបញ្ហាសំខាន់ណាស់ដែលត្រូវគិតគូរ»។
យោងតាមរបាយការណ៍របស់អគ្គនាយកដ្ឋានកសិកម្ម ក្នុងឆ្នាំ ២០២១ ដំណាំសាកវប្បកម្ម ប្រមូលផលបានចំនួន ៤ ៣៦៥ ៨៧៨ តោនក្នុងនោះដំណាំបន្លែមានចំនួន ៩០៨ ៥៩៥ តោន ដំណាំហូបផ្លែ ចំនួន ៣ ៤៥៧ ១៩៣ តោន និងរុក្ខជាតិលម្អចំនួន ជាង ៩០ តោន៕ LA
