.jpg)
លោក ប៉ាន សូរស័ក្តិ ជាមួយរដ្ឋមន្ត្រីក្រសួងពាណិជ្ជកម្ម ក្នុងជំនួបជាមួយភាគី UAE សន្យាសិក្សាពីលទ្ធភាពបង្កើតកិច្ចព្រមព្រៀងពាណិជ្ជកម្មសេរីទ្វេភាគី កាលពីថ្ងៃទី ២៤ មករា។ រូបថត ក្រសួងពាណិជ្ជកម្ម
ភ្នំពេញៈ កម្ពុជា និងសហភាពអារ៉ាប់រួម (UAE ) បានឯកភាពគ្នានឹងបង្កើតក្រុមការងារដើម្បីសិក្សាពីលទ្ធភាពនៃការបង្កើតកិច្ចព្រមព្រៀងពាណិជ្ជកម្មសេរីទ្វេភាគី (FTA) ជាមួយគ្នាដើម្បីជំរុញការដោះដូរពាណិជ្ជកម្ម និងការវិនិយោគរវាងប្រទេសទាំង ២ ឱ្យមានទំហំកាន់តែធំបន្ថែមទៀត។
ព័ត៌មាននេះត្រូវបានលើកឡើងក្នុងឱកាសនៃជំនួបទ្វេភាគីរវាងរដ្ឋមន្ត្រីក្រសួងពាណិជ្ជកម្មកម្ពុជា លោក ប៉ាន សូរស័ក្តិ ជាមួយរដ្ឋមន្ត្រីក្រសួងពាណិជ្ជកម្មអន្តរជាតិនៃសហភាពអារ៉ាប់រួមលោក Thani bin Ahmed Al Zeyoudi កាលពីថ្ងៃទី ២៤ ខែមករា នៅទីក្រុងឌូបៃ សហភាពអារ៉ាប់រួម។
លោក ប៉ាន សូរស័ក្តិ បានលើកឡើងថា កម្ពុជាមានធនធានធម្មជាតិអំណោយផលជាច្រើន ពិសេសផលិតផលកសិផលរាប់ពាន់មុខ និងមានវិស័យសក្តានុពលជាច្រើនដែលកំពុងអភិវឌ្ឍដូចជា វិស័យទេសចរណ៍តំបន់ឆ្នេរសមុទ្រ វិស័យវប្បធម៌តំបន់ប្រាសាទបុរាណ ពិសេសប្រាសាទអង្គរវត្ត វិស័យដឹកជញ្ជូនរួមមានព្រលានយន្តហោះ កំពង់ផែ ផ្លូវថ្នល់ និងសំណង់ដែលសហភាពអារ៉ាប់រួមអាចមកវិនិយោគបាន។ លោកបានថ្លែងថា៖ «កម្ពុជាបានចុះកិច្ចព្រមព្រៀងពាណិជ្ជកម្មសេរីទ្វេភាគីជាមួយចិន និងកូរ៉េរួចហើយ និងកំពុងបន្តចរចាបង្កើតកិច្ចព្រមព្រៀងពាណិជ្ជកម្មសេរីជាមួយនឹងដៃគូសំខាន់ៗមានជាអាទិ៍ អង់គ្លេស ជប៉ុន ឥណ្ឌា ម៉ុងហ្គោលី និងកាណាដា ដើម្បីធ្វើពិពិធកម្មទីផ្សារ និងជំរុញការនាំចេញស្របតាមគោលនយោបាយយុទ្ធសាស្ត្រ ចតុកោណដំណាក់កាលទី ៤ របស់រាជរដ្ឋាភិបាលកម្ពុជា»។
លោករដ្ឋមន្ត្រីក៏បានលើកឡើងអំពីឆន្ទៈបង្កើតក្រុមការងារមួយ ដើម្បីសិក្សា និងពិនិត្យលទ្ធភាពក្នុងការបង្កើតកិច្ចព្រមព្រៀងពាណិជ្ជកម្មសេរី (FTA) រវាងប្រទេសទាំង ២ ក្នុងគោលបំណងបង្កើនសហប្រតិបត្តិការសេដ្ឋកិច្ច និងពាណិជ្ជកម្មថែមមួយកម្រិតទៀត។
លោក Thani bin Ahmed Al Zeyoudi បានស្វាគមន៍យ៉ាងកក់ក្តៅចំពោះគណៈប្រតិភូកម្ពុជា និងសម្តែងការកោតសរសើរដល់រាជរដ្ឋាភិបាលកម្ពុជាដែលបានគាំទ្រ និងចូលរួមក្នុងពិព័រណ៍ពិភពលោកឌុយបៃ ឆ្នាំ ២០២០ ដែលមានរយៈពេល ៦ ខែនេះ។ លោកក៏បានស្នើឱ្យភាគីកម្ពុជាជួយផ្តល់ព័ត៌មានពីសក្ដានុពលវិនិយោគនៅកម្ពុជា និងសិក្សាបន្ថែមអំពីលទ្ធភាពវិនិយោគរួមគ្នានាពេលអនាគត។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានប្រាប់ភ្នំពេញ-ប៉ុស្តិ៍ក្នុងថ្ងៃទី ២៧ ខែមករាថា ទំនិញដែលកម្ពុជានាំចេញទៅ UAE ភាគច្រើន គឺជាទំនិញកសិកម្ម ដូចជា អង្ករ ផ្លែឈើ សាច់សត្វ អាហារកែច្នៃ ផលិតផលជាគ្រឿងក្រអូបខ្លឹមចន្ទន៍ ប្រេងចន្ទន៍ ទៀនក្រអូប គ្រឿងតុបតែងលម្អ សម្លៀកបំពាក់ ស្បែកជើង សម្ភារធ្វើដំណើរ កាបូប និងកង់ជាដើម។
ចំណែកទំនិញដែលកម្ពុជានាំចូលពី UAE វិញរួមមាន ប្រេងរំអិល ប្រេងឥន្ធនៈ គ្រឿងម៉ាស៊ីន ថ្នាំលាប វែកនី កៅស៊ូប៊ីទីមក្រាលថ្នល់ ជរ័បិទកញ្ចក់ ពិតានជ័រប្លាស្ទិក ថ្នាំបៀក ឥដ្ឋការ៉ូក្រាល គ្រឿងសេរ៉ាមិច គ្រឿងសម្ភារក្នុងបន្ទប់ទឹក ប្រដាប់ប្រដាផ្ទះបាយ គ្រឿងសង្ហារិម ជណ្តើរយន្ត រថយន្ត គ្រឿងបន្លាស់រថយន្ត ឧបករណ៍ហាត់ប្រាណ និងឧបករណ៍កីឡា។
ពាណិជ្ជកម្មទ្វេភាគីរវាងកម្ពុជា និងសហភាពអារ៉ាប់រួម ឆ្នាំ ២០២១ មានទឹកប្រាក់ ១៥១ ៥៤៧ ០៥៧ ដុល្លារ កើនឡើង ៥២,៦៦ ភាគរយធៀបនឹងឆ្នាំ ២០២០។ ក្នុងនោះការនាំទំនិញចេញពីកម្ពុជា មានទឹកប្រាក់ប្រមាណ ៥២ លានដុល្លារ កើនឡើង ១៨,៩៣ ភាគរយ ចំណែកការនាំចូលពី UAE មានទឹកប្រាក់ជាង ៩៩ លានដុល្លារកើនឡើង ៧៩,៣២ ភាគរយ។ នេះបើយោងតាមរបាយការណ៍របស់ក្រសួងពាណិជ្ជកម្ម៕ LA
