ភ្នំពេញៈ កម្ពុជាបានស្នើឱ្យប្រទេសអារ៉ាប៊ីសាអ៊ូឌីតជួយជំរុញវិនិយោគិនរបស់ខ្លួនចូលមកបណ្ដាក់ទុននៅកម្ពុជាឱ្យបានច្រើន ព្រមទាំងសិក្សាពីលទ្ធភាពក្នុងការបង្កើតកិច្ចព្រមព្រៀង ឬអនុស្សរណៈនៃការយោគយល់គ្នា (MoU) សំដៅបង្កើនកិច្ចសហប្រតិបត្តិការពាណិជ្ជកម្មទ្វេភាគី ខណៈទំហំពាណិជ្ជកម្មរវាងប្រទេសទាំង ២ នៅមានចំនួនតិចតួចនៅឡើយ។
សំណើនេះត្រូវបានរដ្ឋលេខាធិការក្រសួងពាណិជ្ជកម្ម លោក ពេជ ឫទ្ធី លើកឡើងក្នុងជំនួបជាមួយ លោក Saud F.M. Al Suwelim ឯកអគ្គរាជទូតប្រទេសអារ៉ាប៊ីសាអ៊ូឌីតប្រចាំព្រះរាជាណាចក្រកម្ពុជា (និវេសនដ្ឋាននៅទីក្រុងហាណូយ) ដើម្បីពិភាក្សាអំពីការជំរុញ និងពង្រីកកិច្ចសហប្រតិបត្តិការលើគ្រប់វិស័យ ជាពិសេសការបង្កើនទំហំពាណិជ្ជកម្ម និងវិនិយោគទ្វេភាគីឱ្យបានខ្ពស់ថែមមួយកម្រិតទៀត។
ជាកិច្ចចាប់ផ្ដើមលោក ពេជ ឫទ្ធី បានសម្តែងការស្វាគមន៍ និងថ្លែងអំណរគុណចំពោះកិច្ចខិតខំប្រឹងប្រែងរបស់ លោក Saud F.M. Al Suwelim ដែលបានខិតខំពង្រឹងចំណងមិត្តភាព និងជំរុញកិច្ចសហប្រតិបត្តិការទ្វេភាគីកម្ពុជា-អារ៉ាប៊ី សាអ៊ូឌីត ឱ្យទទួលបាននូវវឌ្ឍនភាពវិជ្ជមានជាបន្តបន្ទាប់។
លោកលើកឡើងថា៖ «ខ្ញុំសូមសំណូមពរឱ្យភាគីអារ៉ាប៊ី សាអូឌីត ពិនិត្យលទ្ធភាពក្នុងការបង្កើតកិច្ចព្រមព្រៀង ឬអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការពាណិជ្ជកម្មក្នុងគោលបំណងបង្កើតគណៈកម្មការចម្រុះរួម ដើម្បីផ្លាស់ប្តូរយោបល់គ្នាសំដៅពង្រីកទំហំពាណិជ្ជកម្ម និងវិនិយោគទ្វេភាគី»។
ជាការឆ្លើយតប លោក Saud F.M. Al Suwelim បានសន្យានឹងខិតខំជំរុញអ្នកវិនិយោគរបស់ខ្លួនឱ្យចូលមកវិនិយោគនៅកម្ពុជា ហើយដើម្បីសម្រេចគោលបំណងនេះ លោកបានស្នើឱ្យមានការផ្លាស់ប្តូរដំណើរទស្សនកិច្ចរវាងថ្នាក់ដឹកនាំប្រទេស/ស្ថាប័នរដ្ឋ និងសភាពាណិជ្ជកម្មនៃប្រទេសទាំង ២ ក្នុងគោលបំណងស្វែងយល់ពីតម្រូវការទៅវិញទៅមក ផ្គូផ្គងដៃគូធុរកិច្ចវិនិយោគ និងការផ្លាស់ប្តូរមុខទំនិញសក្តានុពលរវាងទីផ្សារនៃប្រទេសទាំង ២។
ក្នុងនាមថ្នាក់ដឹកនាំក្រសួងពាណិជ្ជកម្មកម្ពុជា លោក ពេជ ឫទ្ធី បានគាំទ្រលើសំណើខាងលើ និងសង្ឃឹមថាថ្នាក់ដឹកនាំកម្ពុជានឹងអញ្ជើញបំពេញទស្សនកិច្ចនៅអារ៉ាប៊ីសាអ៊ូឌីត និងមានការរៀបចំជំនួបទ្វេភាគីរវាងថ្នាក់រដ្ឋមន្ត្រីក្រសួងពាណិជ្ជកម្មនៃប្រទេសទាំង ២ នាពេលខាងមុខ។
ទិន្នន័យក្រសួងពាណិជ្ជកម្មឱ្យដឹងថា ពាណិជ្ជកម្មទ្វេភាគីកម្ពុជា-អារ៉ាប៊ី សាអ៊ូឌីត ក្នុងឆ្នាំ ២០២១ មានទឹកប្រាក់សរុប ២៦ លានដុល្លារ កើនជិត ៤០ ភាគរយបើធៀបនឹងឆ្នាំ ២០២០ ដែលមានប្រមាណ ១៩ លានដុល្លារ។ ផលិតផលសំខាន់ៗដែលកម្ពុជានាំចេញទៅអារ៉ាប៊ី សាអ៊ូឌីត មានដូចជា អង្ករ សម្លៀកបំពាក់ ស្បែកជើង ផលិតផលធ្វើពីស្បែក និងផ្លែឈើ ចំណែកផលិតផលនាំពីអារ៉ាប៊ីសាអ៊ូឌីតមកកម្ពុជា មានដូចជា ផលិតផលធ្វើពីប្លាស្ទិក អាលុយមីញ៉ូម ផ្លែឈើ ជីគីមី និងសម្ភារសំណង់ ជាដើម៕