ភ្នំពេញៈ ក្រុមហ៊ុនអាកាសចរណ៍អន្តរជាតិយ៉ាងតិចចំនួន ២ គ្រោងនឹងចាប់ផ្តើមពង្រីកប្រតិបត្តិការហោះហើរមកប្រទេសកម្ពុជាក្នុងខែកុម្ភៈនេះ បន្ទាប់ពីស្ថានភាពនៃការរីករាលដាលជំងឺកូវីដ ១៩ នៅកម្ពុជាមានភាពល្អប្រសើរជាបន្តបន្ទាប់។ នេះបើយោងតាមអ្នកនៅក្នុងវិស័យទេសចរណ៍កម្ពុជា។
ក្រុមហ៊ុនអាកាសចរណ៍ដែលគ្រោងនឹងពង្រីកចំនួនជើងហោះហើរ និងចាប់ផ្តើមជើងហោះហើរមកកម្ពុជានៅដើមខែកុម្ភៈ រួមមាន ក្រុមហ៊ុន Bangkok Airways និង Thai VietJet។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បានប្រាប់ ភ្នំពេញ ប៉ុស្តិ៍ នៅថ្ងៃទី ៣១ ខែមករាថា បន្ទាប់ពីរដ្ឋាភិបាលកម្ពុជាប្រកាសទទួលភ្ញៀវទេសចរបរទេសចាក់វ៉ាក់សាំងប្រឆាំងនឹងជំងឺកូវីដ ១៩ ចាប់ពីពាក់កណ្តាលខែវិច្ឆិកាមក គេឃើញមានចំនួនក្រុមហ៊ុនអាកាសចរណ៍ក្នុងស្រុក និងអន្តរជាតិកាន់តែច្រើនបានបើកការហោះហើរមកកម្ពុជា។ លោកស្រីថា ការតភ្ជាប់ជើងហោះហើរក្នុងស្រុក និងអន្តរជាតិឡើងវិញនេះកំពុងផ្តល់ភាពវិជ្ជមានជាច្រើនដល់វិស័យទេសចរណ៍កម្ពុជា រាប់ទាំងអ្នកធ្វើការដោយផ្ទាល់ និងប្រយោល។
លោកស្រីថ្លែងថា៖ «មានក្រុមហ៊ុនអាកាសចរណ៍ជាច្រើនបានស្នើសុំខាងអាកាសចរស៊ីវិលបើកជើងហោះហើរឡើងវិញ ទាំងក្រុមហ៊ុនធ្លាប់ហោះហើរ និងក្រុមហ៊ុនដែលមិនធ្លាប់ហោះហើរមកកម្ពុជា ក៏សុំបើកការហោះហើរថ្មីផងដែរ។ ចាប់ពីខែកុម្ភៈទៅយើងនឹងឃើញមានការហោះហើរថ្មីៗបន្ថែម»។
ចំណែកប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា លោក ធួន ស៊ីណាន បានលើកឡើងថា ការតភ្ជាប់ជើងហោះហើរអន្តរជាតិឡើងវិញ គឺបង្ហាញពីភាពរឹងមាំនៃទំនុកចិត្តរបស់អ្នកវិនិយោគ និងភ្ញៀវទេសចរក្នុងការធ្វើដំណើរមកកម្ពុជា ដែលសកម្មភាពទាំងនេះនឹងផ្តល់ផលវិជ្ជមានសម្រាប់កម្ពុជា បើទោះជាមិនទាន់ល្អប្រសើរសម្រាប់វិស័យទេសចរណ៍ តែយ៉ាងហោចណាស់ក៏អាចភ្ជាប់ទំនាក់ទំនងពាណិជ្ជកម្ម និងវិនិយោគ។
ទោះយ៉ាងណាលោក ស៊ីណាន ប្រាប់ថា ពេលនេះលោកមិនទាន់រំពឹងខ្លាំងលើភាពវិជ្ជមាននៃវិស័យទេសចរណ៍នៅឡើយទេ បើទោះបីមានការបើកហោះហើរឡើងវិញច្រើនក៏ដោយ។
លោកបញ្ជាក់ថា៖ «ដោយសារវិបត្តិកូវីដ ១៩ នៅមិនទាន់ផុតរលត់ ដូច្នេះខ្ញុំយល់ថា មានទេសចរជាច្រើនមិនទាន់ហ៊ានប្រថុយចេញដើរកម្សាន្តនៅក្រៅប្រទេសឡើយ ព្រោះការបិទទីក្រុង ឬតំបន់នានាក្នុងពិភពលោក គឺអាចកើតឡើងគ្រប់ពេល។ ការបើកការហោះហើរនៅពេលនេះគឺមានភាពល្អប្រសើរសម្រាប់ការវិនិយោគ និងធ្វើពាណិជ្ជកម្មជាង»។
លោក ស៊ិន ចាន់សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិលបានប្រាប់ថា កាលវិភាគហោះហើរនៅអាកាសយានដ្ឋានអន្តរជាតិទាំង ៣ របស់កម្ពុជា បង្ហាញថា គិតត្រឹមចុងខែមករាឆ្នាំ ២០២២ មានក្រុមហ៊ុនអាកាសចរណ៍ក្នុងស្រុក និងក្រៅស្រុកប្រមាណ ១០ កំពុងធ្វើប្រតិបត្តិការហោះហើរនៅកម្ពុជា ដោយមានក្រុមហ៊ុនខ្លះហោះហើរចន្លោះពី ៣-៤ ដងក្នុង ១ សប្តាហ៍។
លោកបន្ថែមថា ការហោះហើរឡើងវិញ គឺជាសញ្ញាណល្អសម្រាប់វិស័យអាកាសចរណ៍កម្ពុជាដែលនឹងធ្វើឱ្យការហោះហើរមមាញឹកជាបណ្តើរៗហើយអាចនឹងឈានទៅភាពប្រក្រតីវិញនាពេលអនាគតដ៏ខ្លីខាងមុខ។
លោកថ្លែងថា៖ «កម្ពុជាជាប្រទេសដែលមានភាពទាក់ទាញ និងបានគ្រប់គ្រងវិបត្តិកូវីដ ១៩ បានល្អ។ កត្តានេះនឹងធ្វើឱ្យទេសចរណ៍ពីក្រៅប្រទេសចាប់ផ្តើមមានឡើងវិញជាបណ្តើរៗ»។
ទោះយ៉ាងណា លោក ចាន់សេរីវុត្ថា និយាយថា បច្ចុប្បន្នទេសចរមកពីក្រៅប្រទេសនៅមានកម្រិតនៅឡើយ។ នៅខែកុម្ភៈនេះ មានការស្នើសុំបើកជើងហោះហើរច្រើនដែរ ប៉ុន្តែការហោះហើរនោះក៏អាស្រ័យលើអ្នកដំណើរដែរ បើមិនមានអ្នកដំណើរទេ គេក៏នឹងអាចលុបជើងហោះហើរវិញដែរ។
កាលវិភាគហោះហើររបស់ក្រុមហ៊ុនអាកាសយានដ្ឋានកម្ពុជាបានបង្ហាញថា AirAsia ដែលជាក្រុមហ៊ុនមានប្រតិបត្តិការហោះហើរច្រើន និងមានតម្លៃសមរម្យក្នុងតំបន់អាស៊ីបានបើកដំណើរការជើងហោះហើររបស់ខ្លួនឡើងវិញពីទីក្រុងគូឡាឡាំពួ មកកាន់ទីក្រុងភ្នំពេញកាលពីថ្ងៃពុធសប្តាហ៍មុន បន្ទាប់ពីផ្អាកអស់រយៈពេលជាង ១៧ ខែ។ ក្រៅពីនេះក៏មានក្រុមហ៊ុនអាកាសចរណ៍មួយចំនួនទៀតកំពុងមានប្រតិបត្តិការដែរ ដូចជា Vietnam Airlines, Bangkok Airways, Lanmei Airlines, Thai Air Asia, Thai smile, Cambodia airways, Cambodia Angkor Air, China Southern Airlines និង Singapore Airlines ជាដើម៕ LA
វីដេអូ៖