.jpg)
លោក ហ៊ុន ឡាក់ ពន្យល់ពីបច្ចេកទេស និងអត្ថប្រយោជន៍ដំណាំស្វាយ។ សហការី
កំពង់ស្ពឺៈ អគ្គនាយកនៃអគ្គនាយកដ្ឋានកសិកម្មជំរុញឱ្យកសិករ និងអ្នកវិនិយោគត្រូវខំបង្កើនការដាំដុះស្វាយខុសរដូវតាមបែបបច្ចេកទេស និងទំនើបកម្មកសិកម្មឱ្យបានច្រើនបន្ថែមទៀត ដើម្បីឈានទៅនាំចេញទៅទីផ្សារអឺរ៉ុប បន្ទាប់ពីទីផ្សារប្រទេសចិន។
អំឡុងពេលចុះទស្សនកិច្ចនៅចម្ការស្វាយ រីចហ្វាម ជម្ពូព្រឹក្ស នៅក្នុងខេត្តកំពង់ស្ពឺ ជាមួយនឹងក្រុមហ៊ុន Rich Farm Asia និងឯកអគ្គរដ្ឋទូតអាល្លឺម៉ង់ប្រចាំកម្ពុជាកាលពីថ្ងៃទី ៣១ ខែមករា លោក ងិន ឆាយ អគ្គនាយកនៃអគ្គនាយកដ្ឋានកសិកម្មបានលើកឡើងថា ថ្វីដ្បិតប្រទេសចិនជាទីផ្សារដ៏ធំសម្រាប់ការនាំចេញស្វាយកម្ពុជាក៏ពិតមែន ប៉ុន្តែនៅតែមានបញ្ហាច្រើន ដូចនេះក្រសួងកសិកម្មរំពឹងថា ដំណាំស្វាយនឹងអាចនាំចេញទៅទីផ្សារអឺរ៉ុប ក៏ដូចជាប្រទេសអាល្លឺម៉ង់នាពេលឆាប់ៗនេះផងដែរ។
លោកបានបន្ថែមថា ប្រទេសកម្ពុជាកំពុងឈានដល់ដំណាក់កាលមួយដែលត្រូវតែបង្កើនគុណភាពផលិតផលកសិកម្ម ដើម្បីនាំចេញ និងបង្កើនប្រាក់ចំណូលរបស់កសិករ។
លោកបន្ថែមថា ដើម្បីនាំចេញបាន អ្នកដាំដុះត្រូវតែបង្កើនគុណភាពតាមស្តង់ដាអនាម័យ និងភូតគាមអនាម័យដែលគេតម្រូវដោយក្នុងនោះសម្រាប់ដំណាំស្វាយ នឹងមិននាំចេញជាទៀងទាត់បានទេ បើត្រូវរង់ចាំតែស្វាយតាមរដូវ។ ហេតុដូចនេះត្រូវតែមានការដាំដុះស្វាយខុសរដូវផងដែរ ដោយត្រូវអនុវត្តទៅតាមបច្ចេកទេសទំនើប និងអនុវត្តគោលការណ៍កសិកម្មល្អ។
លោកបានបញ្ជាក់ថា៖ «ដើម្បីអាចដាំដុះស្វាយខុសរដូវឱ្យបានត្រឹមត្រូវតាមស្តង់ដា ហើយអាចនាំចេញបាន គឺទាមទារឱ្យមានការប្រើប្រាស់បច្ចេកទេសខ្ពស់ ជាពិសេសការរៀបចំប្រព័ន្ធស្រោចស្រពទឹកឱ្យបានត្រឹមត្រូវបើមិនដូច្នោះទេ នឹងមិនទទួលបានផល»។
អគ្គនាយកក្រុមហ៊ុន Rich Farm Asia លោក ហ៊ុន ឡាក់ បានឱ្យដឹងថា ក្រុមហ៊ុនរបស់លោកបានសហការជាមួយនឹងអគ្គនាយកដ្ឋានកសិកម្ម ដើម្បីធ្វើការផ្សព្វផ្សាយដល់តំណាងសហគមន៍កសិកម្មចម្ការស្វាយមកពីខេត្តចំនួន ៥ ពីបច្ចេកទេសនៃការដាំដុះស្វាយខុសរដូវការធ្វើទំនើបកម្មកសិកម្មលើដំណាំស្វាយ ដែលប្រកបដោយគុណភាព និងបរិមាណ។
លោកបន្តថា ចម្ការស្វាយ រីចហ្វាម ជម្ពូព្រឹក្ស នៅខេត្តកំពង់ស្ពឺត្រូវបានគេចាត់ទុកថា ជាចម្ការស្វាយគំរូមួយនៅកម្ពុជា ដែលបានប្រើប្រាស់បច្ចេកវិទ្យាកសិកម្មទំនើបដូចជា ការបំពាក់ប្រព័ន្ធស្រោចស្រពទំនើបក្នុងចម្ការ ការប្រើប្រាស់ថាមពលសូឡាដើម្បីបូមទឹកដើម្បីបង្កើនទិន្នផល ផលិតភាព អាចបំពេញតម្រូវការទីផ្សារតាមរយៈការគោរពតាមបទដ្ឋានស្តង់ដា។
លោកបញ្ជាក់ថា៖ «យើងចង់ផ្សព្វផ្សាយដល់កសិករឱ្យគាត់មានការយល់ដឹងពីបច្ចេកទេសដាំដុះដំណាំស្វាយ បើសិនយើងដាំដុះមានស្តង់ដាខ្ពស់ នោះយើងអាចនាំចេញស្វាយទៅបណ្តាប្រទេសផ្សេងៗទៀតក្រៅពីចិន ដូចជាសហគមន៍អឺរ៉ុប អាមេរិក និងអាល្លឺម៉ង់ជាដើម»។
បើតាមអ្នកជំនាញដំណាំស្វាយនៃក្រុមហ៊ុន Rich Farm Asia ការដាំដុះស្វាយខុសរដូវមានការលំបាកច្រើន ដោយត្រូវចំណាយដើមទុនច្រើន និងប្រើប្រាស់បច្ចេកទេសខ្លាំងជាងស្វាយតាមរដូវពិសេសការដាំដុះស្វាយខុសរដូវ នៅរដូវវស្សាជួបបញ្ហាច្រើន៕ LA
វីដេអូ៖
