ភ្នំពេញៈ រដ្ឋាភិបាលកម្ពុជាតាមរយៈអគ្គនាយកដ្ឋានពន្ធដារបានប្រកាសពីការលើកលែងពន្ធប្រចាំខែគ្រប់ប្រភេទសម្រាប់សកម្មភាពអាជីវកម្ម សណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុនភ្នាក់ងារទេសចរណ៍ សម្រាប់រយៈពេល ៦ ខែបន្ថែមទៀតក្នុងឆ្នាំ ២០២២ នេះដើម្បីរួមចំណែកជំរុញកំណើនសកម្មភាពអាជីវកម្មនេះឡើងវិញ។
យោងតាមការជូនដំណឹងពីអគ្គនាយកដ្ឋានពន្ធដារកាលពីថ្ងៃទី ១ ខែកុម្ភៈ ឆ្នាំ ២០២២ ឱ្យដឹងថា ក្នុងការអនុវត្តក្របខ័ណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជា រាជរដ្ឋាភិបាលបានសម្រេចបន្តលើកទឹកចិត្តដល់វិស័យអចលនទ្រព្យ អាកាសចរណ៍ និងវិស័យទេសចរណ៍ តាមរយៈការលើកលែងពន្ធប្រចាំខែចាប់ពីខែមករា ដល់ខែមិថុនា ឆ្នាំ ២០២២។
ការបន្តលើកលែងការបង់ពន្ធប្រចាំខែគ្រប់ប្រភេទទាំងនោះ រួមមាន អាករលើតម្លៃបន្ថែម ប្រាក់រំដោះពន្ធលើប្រាក់ចំណូល ពន្ធលើប្រាក់បៀវត្សរ៍ ពន្ធលើអត្ថប្រយោជន៍បន្ថែម ពន្ធកាត់ទុកអាករពិសេសលើទំនិញ និងសេវាមួយចំនួន អាករសម្រាប់បំភ្លឺសាធារណៈ និងអាករលើការស្នាក់នៅ ចំពោះសណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុន ភ្នាក់ងារទេសចរណ៍ ដែលបានចុះបញ្ជីជាមួយអគ្គនាយកដ្ឋានពន្ធដារ និងមានសកម្មភាពអាជីវកម្ម។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បានប្រាប់ភ្នំពេញ-ប៉ុស្តិ៍នៅថ្ងៃទី ២ ខែកុម្ភៈថា ការបន្តលើកលែងពន្ធរបស់រដ្ឋាភិបាល គឺជួយបានច្រើនសម្រាប់វិស័យឯកជន ផ្នែកទេសចរណ៍ ពិសេសសណ្ឋាគារ ផ្ទះសំណាក់ និងភោជនីយដ្ឋាន ដែលមកទល់នឹងពេលចំណូលរបស់អាជីវកម្មប្រភេទនេះនៅមានកម្រិតនៅឡើយ។
លោកស្រីបានបន្ថែមថា នេះគឺជាលើកទឹកចិត្តដល់ម្ចាស់អាជីវកម្មទេសចរណ៍ ដើម្បីឱ្យគាត់បន្តប្រឹងប្រែង និងតស៊ូបន្តទៀត ពិសេសនៅខេត្តសៀមរាប អ្នកវិនិយោគលើអាជីវកម្មទាំងនេះត្រូវការដើមទុន ដើម្បីដំណើរការអាជីវកម្មរបស់ខ្លួនឡើងវិញនៅគ្រាដែលកម្ពុជាកំពុងបើកទទួលស្វាគមន៍ភ្ញៀវទេសចរដែលបានចាក់វ៉ាក់សាំងរួច។
លោកស្រី ស៊ីវលីន បញ្ជាក់ថា៖ «ប្រសិនបើរដ្ឋាភិបាលបន្តការលើកលែងរហូតដល់ដំណាច់ឆ្នាំ គឺរឿងដ៏ប្រសើរបំផុត ព្រោះបើទោះជាបច្ចុប្បន្នយើងបានដំណើរការបើកប្រទេសឡើងវិញក៏ពិតមែន ប៉ុន្តែមេរោគបំប្លែងថ្មី «អូមីក្រុង» នៅតែបន្តយាយី ដែលធ្វើឱ្យប្រទេសមួយចំនួនមានការរឹតត្បិត។ ដូចនេះការហូរចូលនៃទេសចរក៏នៅមានឧបសគ្គផងដែរ ថ្វីដ្បិតតែយើងចាប់ផ្តើមមានជើងហោះហើរឡើងវិញ ប៉ុន្តែនៅមានកម្រិតទាបនៅឡើយ»។
លោក កន ចាន់សត្យា អ្នកគ្រប់គ្រងទូទៅនៃសណ្ឋាគារ លីណាយ៉ា អង្គរ រីវើរ រីសត អេន ស្ប៉ា (Lynnaya Angkor Ri-ver Resort and Spa) បានឱ្យដឹងដែរថា វិបត្តិជំងឺកូវីដ ១៩ បានធ្វើឱ្យអាជីវកម្មសណ្ឋាគារមានបញ្ហាយ៉ាងខ្លាំង។ លោកបន្ថែមថា ការអនុគ្រោះរបស់រដ្ឋាភិបាលចំពោះការបង់ពន្ធនេះនឹងជួយសម្រាលទៅដល់បន្ទុករបស់ម្ចាស់សណ្ឋាគារបានមួយកម្រិត ព្រោះថាថ្វីដ្បិតមិនសូវមានភ្ញៀវទេសចរមែន ប៉ុន្តែការចំណាយរបស់សណ្ឋាគារគឺនៅដដែលពាក់ព័ន្ធនឹងថ្លៃទឹក ថ្លៃភ្លើង និងការចំណាយលើបុគ្គលិកជាដើម។
លោកបញ្ជាក់ថា៖ «ថ្វីដ្បិតតែមានភ្ញៀវទេសចរក្នុងស្រុកដើរកម្សាន្តច្រើនពិតមែន ប៉ុន្តែការចំណាយរបស់ពួកគាត់គឺមិនច្រើនដូចភ្ញៀវទេសចរបរទេសឡើយ ដូចនេះអ្វីដែលយើងរំពឹងមានតែចាំមើលការកក់ពីភ្ញៀវខាងក្រៅ នៅពេលប្រទេសរបស់យើងបើកជើងហោះហើរកាន់តែច្រើន»។
យោងតាមអគ្គនាយកដ្ឋានពន្ធដារ ការលើកលែងពន្ធនេះ គឺសម្រាប់អនុវត្តនៅក្នុងរាជធានីភ្នំពេញ ខេត្តសៀមរាប ព្រះសីហនុ កែប កំពត ក្រុងបាវិត និងប៉ោយប៉ែត៕ LA