ភ្នំពេញៈ ច្បាប់​ស្ដីពី​វិធាន​ពាណិជ្ជកម្ម និង​បញ្ជីពាណិជ្ជកម្ម និង​ច្បាប់​ស្ដីពី​សហគ្រាស​ពាណិជ្ជកម្ម​ដែល​ត្រូវបានធ្វើ​វិសោធនកម្ម​បានប្រកាស​ឱ្យប្រើប្រាស់​ជា​ផ្លូវការ​ហើយ ក្រោយពេល​ព្រះមហាក្សត្រ​ឡាយព្រះហស្តលេខា​កាលពីពេល​ថ្មីៗ​នេះ​។

ច្បាប់​ទាំង​ ២​ នេះ​ត្រូវបាន​ព្រះមហាក្សត្រ​ចេញ​ព្រះរាជក្រម​ប្រកាស​ឱ្យប្រើ​ព្រម​គ្នា​កាលពី​ថ្ងៃទី​ ២៩ ខែមករា ឆ្នាំ ២០២២ ក្រោយពី​រដ្ឋសភា​ពិនិត្យ​យ៉ាង​ល្អិតល្អន់ និង​អនុម័ត​ទាំងស្រុង​កាលពី​ថ្ងៃទី​ ២៩ ខែធ្នូ ឆ្នាំ​ ២០២១​។

លោក ប៉ែន សុវិជាតិ អ្នកនាំពាក្យ​ក្រសួងពាណិជ្ជកម្ម​បាន​ប្រាប់​ភ្នំពេញ-ប៉ុស្តិ៍​នៅ​ថ្ងៃទី​ ៣ ខែកុម្ភៈ ថា ការធ្វើ​វិសោធនកម្ម​ច្បាប់​ស្ដីពី​វិធាន​ពាណិជ្ជកម្ម និង​បញ្ជីពាណិជ្ជកម្ម គឺ​ដើម្បីឱ្យ​ស្រប​ទៅនឹង​សភាពការណ៍​ជាក់ស្តែង និង​ទៅតាម​និយាម​អន្តរជាតិ​។

ដោយឡែក​ច្បាប់​ស្ដីពី​វិសោធនកម្ម​ច្បាប់​ស្ដីពី​សហគ្រាស​ពាណិជ្ជកម្ម​វិញ ត្រូវបាន លោក សុវិជាតិ បញ្ជាក់ថា កាលពីមុន​សហគ្រាស​ពាណិជ្ជកម្ម​ត្រូវបាន​កំណត់​ប្រភេទ​ទៅលើ​ក្រុមហ៊ុន​មួយចំនួន​ប៉ុណ្ណោះ ប៉ុន្តែ​បច្ចុប្បន្ន​មាន​ប្រភេទ​ក្រុមហ៊ុន​ច្រើន ជាពិសេស​ក្រុមហ៊ុន​អាជីវកម្ម​តាម​អនឡាញ ដូចនេះ​ច្បាប់​ស្ដីពី​វិសោធនកម្ម​ថ្មី គឺ​រៀបចំ​ឱ្យស្រប​នឹង​ការវិវត្ត​របស់​ពិភពលោក​។

លោក​ថ្លែងថា​៖ «​ហេតុផល​ទាំងនេះហើយ ដែល​ក្រសួង​ពាណិជ្ជកម្ម​បាន​ផ្តួចផ្តើម​គំនិត​ឱ្យមាន​ការធ្វើ​វិសោធនកម្ម​ច្បាប់​ទាំង​ ២ ​នេះ​»​។

លោក លឹម ហេង អនុប្រធាន​សភាពាណិជ្ជកម្ម​កម្ពុជា​បាន​ប្រាប់​ភ្នំពេញ-ប៉ុស្តិ៍​ថា ច្បាប់​ស្តីពី​វិសោធនកម្ម​ច្បាប់​ស្តីពី​សហគ្រាស​ពាណិជ្ជកម្ម និង​សេចក្តី​ព្រាង​ច្បាប់​ស្តីពី​វិធាន​ពាណិជ្ជកម្ម និង​បញ្ជីពាណិជ្ជកម្ម ពិតជា​មាន​សារៈសំខាន់​ណាស់​សម្រាប់​ការគ្រប់គ្រង​ពាណិជ្ជកម្ម​នៅ​កម្ពុជា ពិសេស​ជំរុញឱ្យមាន​ការប្រកួត​ប្រជែង​ដោយ​ស្មើភាព និង​ត្រឹមត្រូវ​ទាំង​អ្នកវិនិយោគ​ក្នុងស្រុក និង​មកពី​ក្រៅប្រទេស​។

លោក​បន្ថែមថា ច្បាប់​ទាំង​ ២ ​នេះ គឺ​ជួយ​បញ្ចៀស​ឱ្យបាន​នូវ​បញ្ហា​ការក្លែងបន្លំ​ក្រុមហ៊ុន ឬ​ម៉ាក​សញ្ញា​ផ្សេងៗ ដែល​គ្មាន​ការទទួល​ខុសត្រូវ រួមទាំង​ចៀសវាង​ការបង់ពន្ធ​ដែល​មិន​ស្មើភាព​គ្នា​ផងដែរ​។

លោក​បាន​បញ្ជាក់ថា​៖ «​សព្វថ្ងៃ​នៅមាន​បញ្ហា​ចំពោះ​អ្នកលក់​អនឡាញ​ពី​បរទេស និង​អ្នកលក់​អនឡាញ​នៅក្នុង​ស្រុក ដែលមាន​ការប្រកួតប្រជែង​មិន​ស្មើភាព​គ្នា ព្រោះ​អ្នក​ដែល​បាន​ចុះបញ្ជី​មាន​ហាង​ច្បាស់លាស់ និង​បង់ពន្ធ​ត្រឹមត្រូវ ប៉ុន្តែ​អ្នកលក់​អនឡាញ​មិន​បង់ពន្ធ​ត្រឹមត្រូវ​ឡើយ ដែល​នេះ​ជា​ការប្រកួតប្រជែង​មិន​ស្មើភាព​គ្នា​»​។

លោក​បាន​បន្តថា ច្បាប់​នេះ​គឺ​បានកំណត់​យ៉ាងច្បាស់​ដើម្បី​ឱ្យ​ពាណិជ្ជករ​ទាំងអស់​ទទួល​ខុសត្រូវ​ចំពោះមុខ​ច្បាប់​នៅពេល​ដែល​មានការ​ក្លែងបន្លំ​អ្វី​ផ្សេងៗ​ទាំង​ការបង់ពន្ធ ទាំង​ម៉ាក​ទំនិញ ក៏ដូចជា​ការប្រកប​អាជីវកម្ម​ទាំងអស់​ក្នុងប្រទេស​កម្ពុជា ដើម្បី​ធានា​ការប្រមូល​ចំណូល​ពន្ធ​ចូល​រដ្ឋ​ឱ្យបាន​ត្រឹមត្រូវ​។

អ្នកជំនាញ​សេដ្ឋកិច្ច​នៃ​រាជបណ្ឌិត្យ​សភា​កម្ពុជា​លោក ហុង វណ្ណៈ បាន​ប្រាប់​ភ្នំពេញ​ប៉ុស្តិ៍​ថា ប្រកាស​ឱ្យប្រើប្រាស់​ជា​ផ្លូវការ​នូវ​ច្បាប់​ទាំង ​២ ​នេះ គឺជា​ការធ្វើឱ្យ​ប្រសើរឡើង​នៅក្នុង​ស្មារតី​ច្បាប់ពាណិជ្ជកម្ម ដែលមាន​ពីមុន​។

លោក​បាន​បន្ថែមថា ច្បាប់​នេះ​មាន​គោលបំណង​ ២ រួមមាន ទី​ ១ ​គ្រប់គ្រង​ឱ្យ​ខាន​តែ​បាន​លើ​មុខរបរ ឬក៏​សហគ្រាស​ពាណិជ្ជកម្ម​ដែលមាន​នៅក្នុង​ប្រទេស​កម្ពុជា ទី​ ២ ដើម្បី​ជួយ​ការពារ​បញ្ហា​ទាំងឡាយ ដែល​កើតមាន​លើ​កិច្ចការ​ធុរកិច្ច​របស់​ធុរជន​ដើម្បី​ឱ្យមាន​លក្ខណៈ​ស្របច្បាប់ និង​ច្បាស់លាស់​នៅពេល​មាន​បញ្ហា​វិវាទ​ផ្សេងៗ​កើតមានឡើង​។

លោក​អះអាងថា​៖ «​សំខាន់បំផុត​ច្បាប់​ថ្មី​នេះ គឺ​ធ្វើឱ្យ​ការគ្រប់គ្រង​នានា​ក្នុង​ដែន​សមត្ថកិច្ច​របស់​ក្រសួង​ពាណិជ្ជកម្ម​មាន​លក្ខណៈ​ស្របទៅតាម​ការវិវត្ត​នៃ​ទម្រង់​ពាណិជ្ជកម្ម​ថ្មី ដែល​ឆ្លើយតប​នឹង​ការវិវត្ត​នៃ​ការធ្វើ​ពាណិជ្ជកម្ម​របស់​សកលលោក​ទាំងមូល​»​។

គួរ​បញ្ជាក់ថា ច្បាប់​ស្តីពី​វិសោធនកម្ម​ច្បាប់​ស្តីពី​សហគ្រាស​ពាណិជ្ជកម្ម និង​ច្បាប់​វិសោធនកម្ម​ច្បាប់​ស្តីពី​វិធាន​ពាណិជ្ជកម្ម និង​បញ្ជីពាណិជ្ជកម្ម​នឹង​ជួយ​សម្រួល​ដល់​ការធ្វើ​ធុរកិច្ច​នៅ​ប្រទេស​កម្ពុជា តាមរយៈ​ការធ្វើឱ្យ​ប្រព័ន្ធ​ស្វ័យប្រវត្តិកម្ម​ដំណើរការ​ទៅបាន​ដោយ​រលូន មាន​តម្លាភាព និង​មាន​ស្តង់ដា​ខ្ពស់ ស្របតាម​ការធ្វើ​ធុរកិច្ច​ជា​សកល​នាពេល​បច្ចុប្បន្ន​៕ LA