ភ្នំពេញៈ រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានអំពាវនាវឱ្យពាណិជ្ជករ សហគ្រិន និងអ្នកវិនិយោគជប៉ុន ពិចារណាជ្រើសរើសកម្ពុជាធ្វើជាដៃគូអាជីវកម្ម និងទិសដៅវិនិយោគ ខណៈកម្ពុជាជាប្រទេសមានស្ថិរភាពសន្តិភាព និងនយោបាយល្អប្រសើរ ព្រមទាំងមានបរិយាកាសអាជីវកម្មអំណាយផលផងដែរ។
ការអំពាវនាវនេះធ្វើឡើងក្នុងជំនួបពិភាក្សាកាលពីថ្ងៃទី ៣ ខែកុម្ភៈរវាងលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មជាមួយលោក Fumiaki TAKAHASHI ប្រធានសមាគមជប៉ុន-កម្ពុជា ដើម្បីពង្រឹងកិច្ចសហប្រតិបត្តិការរវាងកម្ពុជា-ជប៉ុន និងជំរុញបរិយាកាសធុរកិច្ចឱ្យកាន់តែប្រសើរ។
លោក ប៉ាន សូរស័ក្តិ បាននិយាយថា ជប៉ុន ជាប្រទេសដែលមានកិច្ចសហប្រតិបត្តិការល្អលើគ្រប់វិស័យជាមួយកម្ពុជា ជាពិសេសជាដៃគូយុទ្ធសាស្ត្រដ៏សំខាន់ដែលបានរួមចំណែកដល់ការអភិវឌ្ឍសេដ្ឋកិច្ចប្រទេសកម្ពុជា តាមរយៈការស្តារឡើងវិញនូវហេដ្ឋារចនាសម្ព័ន្ធ ការផ្តល់នូវកម្មវិធីអភិវឌ្ឍន៍ធនធានមនុស្ស ការពង្រឹងទំនាក់ទំនងសេដ្ឋកិច្ចលើវិស័យពាណិជ្ជកម្ម ទេសចរណ៍ និងការវិនិយោគលើវិស័យជាច្រើនទៀត។
លោកបន្តថា លើសពីនេះវិនិយោគិនជប៉ុនដែលមកវិនិយោគនៅកម្ពុជាក៏បាននាំមកនូវលំហូរបច្ចេកវិទ្យា ចំណេះដឹង និងជំនាញពីការវិនិយោគផ្ទាល់ពីប្រទេសជប៉ុន (FDI) និងជំនួយអភិវឌ្ឍន៍ផ្លូវការ (ODA) ផងដែរ។ បច្ចុប្បន្នកម្ពុជា-ជប៉ុន ក៏បាននិងកំពុងពិភាក្សាអំពីទំនាក់ទំនងពាណិជ្ជកម្មរវាងគ្នាព្រមទាំងពិភាក្សាការងារលើការសិក្សាពីលទ្ធភាពក្នុងការបង្កើតកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា និងជប៉ុនផងដែរ។
លោក សូរស័ក្តិ បានថ្លែងថា៖ «ខ្ញុំសូមអំពាវនាវឱ្យពាណិជ្ជករជប៉ុន សហគ្រិន និងអ្នកវិនិយោគពិចារណាជ្រើសរើសកម្ពុជាជាដៃគូអាជីវកម្ម និងទិសដៅវិនិយោគ ដោយសាររាជរដ្ឋាភិបាលកម្ពុជាបានធានានូវស្ថិរភាពសន្តិភាព និងនយោបាយ ព្រមទាំងការវិនិយោគ និងបរិយាកាសអាជីវកម្ម ដែលអំណាយផលសម្រាប់វិនិយោគិនជប៉ុន»។
លោករដ្ឋមន្ត្រីបន្ថែមថា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងសមាគមប្រជាជាតិអាស៊ីអាគ្នេយ៍ និងជប៉ុន (AJCEP) ដែលបានចូលជាធរមានកាលពីដើមឆ្នាំ ២០២២ ក៏បាននិងកំពុងជួយពន្លឿនការឆ្លើយតបនឹងការអភិវឌ្ឍសេដ្ឋកិច្ចរវាងកម្ពុជា និងជប៉ុន តាមរយៈការផ្តល់សិទ្ធិសេរីភាពនៃពាណិជ្ជកម្ម សេវាកម្ម និងការវិនិយោគផងដែរ។
ជាការឆ្លើយតបលោក Fumiaki TAKAHASHI បានសម្ដែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការធានាបាននូវសុខសន្តិភាព និងស្ថិរភាពសង្គម ជាពិសេសការសម្រេចបាននូវយុទ្ធនាការចាក់វ៉ាក់សាំងការពារជំងឺកូវីដ ១៩ ជូនប្រជាពលរដ្ឋទូទាំងប្រទេស។
បន្ថែមពីលើនេះ លោកក៏បានបង្ហាញការគាំទ្រលើចំណុចដែលលោករដ្ឋមន្ត្រីកម្ពុជាបានលើកឡើង ដែលមានដូចជា ទី ១ សមាគមជប៉ុន-កម្ពុជានឹងពិនិត្យលទ្ធភាពក្នុងការពាំនាំសំណើកិច្ចព្រមព្រៀងពាណិជ្ជកម្មសេរីកម្ពុជា-ជប៉ុន ទៅរាជរដ្ឋាភិបាលជប៉ុន ២, អភិវឌ្ឍន៍ការវិនិយោគខ្សែច្រវាក់តម្លៃសូត្រនៅតាមខេត្តគោលដៅ និង ៣. បន្តគាំទ្រការវិនិយោគរបស់សហគ្រិនជប៉ុនក្នុងប្រទេសកម្ពុជា។
លោក សូរស័ក្តិ បានកត់សម្គាល់ថា កិច្ចជំនួបពិភាក្សាការងារនេះ គឺជាជំហានមួយរបស់កម្ពុជាក្នុងការកសាងផែនទីចង្អុលបង្ហាញផ្លូវ សម្រាប់កិច្ចសហប្រតិបត្តិការនាពេលអនាគត ហើយនឹងក្លាយជាសូចនាករគោលដៅរបស់ក្រសួងពាណិជ្ជកម្ម និងសមាគមកម្ពុជា-ជប៉ុន ក្នុងការសម្រេចគោលដៅជំរុញផលិតកម្ម និងការនាំចេញរបស់សហគ្រាសធុនមីក្រូ តូច និងមធ្យម (MSMEs) ព្រមទាំងអ្នកផលិត នៅពេលមានកិច្ចព្រមព្រៀងពាណិជ្ជកម្មសេរីទ្វេភាគីរវាងប្រទេសទាំង ២៕