ភ្នំពេញៈ គម្រោងវិនិយោគក្នុងវិស័យវាយនភណ្ឌចំនួន ៤ ដែលមានទុនវិនិយោគសរុប ១៨,៦ លានដុល្លារ និងបង្កើតការងារបាន ៦ ២០៧កន្លែង ត្រូវបានក្រុមប្រឹក្សាអភិវឌ្ឍន៍កម្ពុជា (CDC) យល់ព្រមអនុម័តចុះបញ្ជី កាលពីថ្ងៃទី ៤ ខែកុម្ភៈ ឆ្នាំ ២០២២។
សេចក្តីប្រកាសព័ត៌មានរបស់ CDC ឱ្យដឹងថា យោងតាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីឱ្យគម្រោងចំនួន ៤ ដែលរួមមាន គម្រោងបង្កើតរោងចក្រកាត់ដេរសម្លៀកបំពាក់ របស់ក្រុមហ៊ុន Toyoki Apparel (Cambodia) Co., Ltd ស្ថិតនៅស្រុក កំពង់ត្រឡាច ខេត្តកំពង់ឆ្នាំង មានទុនវិនិយោគ ៤,៥ លានដុល្លារនិងអាចបង្កើតការងារបាន ២ ៩២៩កន្លែង, គម្រោងបង្កើតរោងចក្រកាត់ដេរសម្លៀកបំពាក់ របស់ក្រុមហ៊ុន Kh Win Star Garment Co., Ltd នៅស្រុក សំរោងទង ខេត្តកំពង់ស្ពឺ មានទុនវិនិយោគ ៥,៣ លានដុល្លារ និងអាចបង្កើតការងារបាន ១ ៤១៤កន្លែង។
ចំណែកគម្រោង ២ ទៀតរួមមាន គម្រោងបង្កើតរោងចក្រកាត់ដេរសម្លៀកបំពាក់ របស់ក្រុមហ៊ុន Hong Ri (Cambodia) Clothing Co., Ltd នៅសង្កាត់ចោមចៅទី ២ ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគ ៥,៤ លានដុល្លារ អាចបង្កើតការងារបាន ១ ៦៨៤ កន្លែង និងគម្រោងបង្កើតរោងចក្រខារអំបោះ របស់ក្រុមហ៊ុន Global Xilin Garment Accessory Co., Ltd ស្ថិតនៅសួនឧស្សាហកម្មកាណាឌីយ៉ា ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគ ៣,៤ លានដុល្លារ និងអាចបង្កើតការងារបាន ១៨០ កន្លែង។
ក្នុងខែមករា ឆ្នាំ ២០២២ CDC បានអនុម័តលើគម្រោងវិនិយោគចម្រុះចំនួន ២៥ ដែលស្មើនឹងទុនវិនិយោគចំនួន ២ ២៨៥,៨៨ លានដុល្លារ និងបង្កើតការងារបាន ២៣ ១៧៥ កន្លែង ខណៈក្នុងខែមករា ឆ្នាំ ២០២១ គម្រោងវិនិយោគដែល CDC អនុម័តមានចំនួន ១១ ស្មើនឹងទុនវិនិយោគ ៤៣,៨ លានដុល្លារ និងបង្កើតការងារបាន ៧ ៨៥៤ កន្លែង៕