.jpg)
ព្រះសីហនុៈ ក្រសួងទេសចរណ៍ និងអាជ្ញាធរខេត្តព្រះសីហនុ ព្រមទាំងវិស័យឯកជន កំពុងខិតខំជំរុញការអនុវត្តផែនការអភិវឌ្ឍន៍ទេសចរណ៍ខេត្តព្រះសីហនុ ២០២១- ២០២៥ តាមរយៈកិច្ចប្រជុំពិភាក្សាលើសេចក្តីព្រាងចុងក្រោយនៃផែនការអភិវឌ្ឍន៍ទេសចរណ៍បច្ចុប្បន្នកម្ម។
កិច្ចប្រជុំនេះត្រូវបានធ្វើឡើងកាលពីថ្ងៃទី៤ ខែកុម្ភៈ ឆ្នាំ២០២២ ដោយមានការចូលរួមពីលោក សុខ សុគុណ អគ្គនាយករង និងជាប្រធានចាត់ចែងគម្រោងក្រសួងទេសចរណ៍ លោក ឡុង ឌីម៉ង់ អភិបាលរងខេត្តព្រះសីហនុ ព្រមទាំងមានការចូលរួមពីលោក លោកស្រីជាមន្ត្រីរាជការ ប្រធានសមាគមភ្នាក់ងារដឹកជញ្ជូនទេសចរណ៍ជលយានខេត្ត ប្រធានសមាគមសណ្ឋាគារ និងភោជនីយដ្ឋាន។
គោលបំណងនៃកិច្ចប្រជុំ «ស្តីពីសេចក្តីព្រាងផែនការអភិវឌ្ឍន៍ទេសចរណ៍បច្ចុប្បន្នកម្មខេត្តព្រះសីហនុ ២០២១- ២០២៥» គឺដើម្បីពិភាក្សាលើកិច្ចការមួយចំនួនដើម្បីគាំទ្រ និងធ្វើឱ្យផែនការអភិវឌ្ឍន៍ទេសចរណ៍ខេត្តព្រះសីហនុដំណើរការដោយរលូន ដែលមានដូចជា ការរៀបចំផែនការ, ការវិភាគចំណុចខ្លាំង ចំណុចខ្សោយ ឱកាស និងការគំរាមកំហែង (SWOT), ចក្ខុវិស័យ, គោលដៅ និងគោលបំណង, ការព្យាករចំនួនទេសចរណ៍ឆ្នាំ២០២១-២០២៥, និងទិសដៅផែនការអភិវឌ្ឍន៍ទេសចរណ៍។
លោក សុខ សុគុណ បាននិយាយថា ផែនការអភិវឌ្ឍន៍ទេសចរណ៍ ៥ឆ្នាំ (២០២១-២០២៥) ពិតជាមានសារៈសំខាន់ណាស់ក្នុងការជួយជំរុញកំណើនភ្ញៀវទេសចរ កំណើនសេដ្ឋកិច្ចសង្គម ថែរក្សាធនធានធម្មជាតិ និងវប្បធម៌កាន់តែល្អប្រសើរ។ លោកបន្តថា ផែនការនេះ ក៏ត្រូវរំពឹងថានឹងប្រែក្លាយខេត្តព្រះសីហនុ ឱ្យទៅជាគោលដៅទេសចរណ៍តំបន់ឆ្នេរ ដែលមានសុវត្ថិភាព មានភាពទាក់ទាញ និងប្រកួតប្រជែងកម្រិតអន្តរជាតិ។
លោកថ្លែងថា៖«ផែនការអភិវឌ្ឍទេសចរណ៍ទទួលបានជោគជ័យចាំបាច់ត្រូវមានការគាំទ្រ និងសហការអនុវត្តល្អពីគ្រប់ភាគី ហើយការប្រកួតប្រជែងទីផ្សារគឺផ្តោតលើកញ្ចប់ទស្សនកិច្ច។ ម្យ៉ាងទៀតខេត្តព្រះសីហនុមានព្រលានយន្តហោះអន្តរជាតិ យន្តហោះប្រភេទធំអាចចុះចតបាន និងមានឆ្នេរខ្សាច់ និងប្រជុំកោះ ដែលជាសក្តានុពលទេសចរណ៍ដ៏សម្បូរបែប»។
ទោះយ៉ាងណា លោកលើកឡើងថា ទន្ទឹមនឹងមានសក្តានុពលទាំងអស់នេះ ខេត្តព្រះសីហនុក៏មានបញ្ហាប្រឈមផងដែរ ដូចជា តំបន់ទំនប់រលក ដែលមានសំរាម និងថង់ប្លាស្ទិកច្រើន ដែលធ្វើឱ្យប៉ះពាល់ដល់វិស័យទេសចរណ៍។ លោកបញ្ជាក់ថា៖« យើងចង់ប្រែក្លាយតំបន់ទំនប់រលក ក្លាយជាតំបន់ទេសចរណ៍ទាក់ទាញ ហើយសេចក្តីព្រាងផែនការអភិវឌ្ឍន៍ទេសចរណ៍ នឹងក្លាយជាត្រីវិស័យមួយក្នុងការស្តារវិស័យទេសចរណ៍ឡើងវិញក្រោយពីវិបត្តិកូវីដ១៩»។
អភិបាលរងខេត្តព្រះសីហនុ លោក ឡុង ឌីម៉ង់ បានបង្ហាញការគាំទ្រយ៉ាងខ្លាំងចំពោះផែនការអភិវឌ្ឍន៍ទេសចរណ៍ខេត្តព្រះសីហនុ ដែលផែនការនេះទាមទារឱ្យមានការចូលរួមពីមន្ទីរ អង្គភាព ភាគីពាក់ព័ន្ធ វិស័យឯកជន និងប្រតិបត្តិករទេសចរណ៍ អ្នកវិនិយោគ។ លោកបានបញ្ជាក់ថា៖«រដ្ឋបាលខេត្តបេ្តជ្ញាចិត្តនឹងជួយជ្រោមជ្រែងផែនការអភិវឌ្ឍទេសចរណ៍ខេត្តព្រះសីហនុ»។
បន្ថែមពីលើនេះ លោក ឌីម៉ង់ ក៏បាននិយាយថា រាជរដ្ឋាភិបាលកំពុងរៀបចំប្លង់មេក្នុងការអភិវឌ្ឍខេត្តព្រះសីហនុ នាពេលខាងមុខ។ រាជរដ្ឋាភិបាលក៏បានកំណត់ខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង និងជាតារារះនាទិសនិរតី ដែលមានខេត្តជាប់សមុទ្រ៤ មានដូចជា ខេត្តព្រះសីហនុ ខេត្តកោះកុង ខេត្តកែប និងខេត្តកំពត៕
