ភ្នំពេញៈ រយៈពេល ១ ខែដំបូងក្នុងឆ្នាំ ២០២២ វិស័យនាំចេញស្រូវ-អង្ករកម្ពុជា បានបង្ហាញសញ្ញាវិជ្ជមានគួរឱ្យកត់សម្គាល់ ដោយសម្រេចបានក្នុងទឹកប្រាក់ជាង ៩៦ លានដុល្លារ ក្នុងនោះការនាំចេញអង្ករមានជាង ៣៥ លានដុល្លារ។ នេះបើតាមទិន្នន័យពីសហព័ន្ធស្រូវអង្ករកម្ពុជា (CRF)។
ទិន្នន័យ CRF បង្ហាញថា នៅក្នុងខែមករា ឆ្នាំ ២០២២ កម្ពុជាប្រមូលបានប្រាក់ ៣៥,៧២ លានដុល្លារពីការនាំចេញអង្ករក្នុងបរិមាណ ៥៣ ០៣៦ តោន កើនឡើង ៥៤,៧៤ ភាគរយបើធៀបនឹងខែមករា ឆ្នាំ ២០២១ ដែលមានបរិមាណ ៣៤ ២៧៣ តោន។ ទីផ្សារគោលដៅនាំចេញអង្ករកម្ពុជាមាន ៣៤ ប្រទេស ក្នុងនោះប្រទេសចិន និងតំបន់ស្វយ័តហុងកុង ស្រូបយក ៣១ ១៨១ តោន (៥៨,៧៩ ភាគរយ), ប្រទេសចំនួន ១៦ ក្នុងទ្វីបអឺរ៉ុប ១២ ៥៤២ តោន (២៣,៥៨ ភាគរយ), ប្រទេសក្នុងតំបន់អាស៊ាន ៣ មានចំនួន ៦ ២៧៧ តោន (១១,៨៤ ភាគរយ) និងគោលដៅផ្សេងៗចំនួន ៣ ០៧២ តោន (៥,៥២ ភាគរយ)។
ដោយឡែកសម្រាប់ការនាំចេញស្រូវសម្រេចបាន ២៧៥ ៥១១ តោន គិតជាទឹកប្រាក់ប៉ាន់ស្មានប្រមាណ ៦០,៦១ លានដុល្លារ។ ការនាំចេញភាគច្រើន គឺទៅប្រទេសវៀតណាម។
ការនាំចេញអង្ករទៅទីផ្សារអឺរ៉ុបក្នុងឆ្នាំ ២០២២ នេះត្រូវរំពឹងថានឹងមានកំណើនល្អប្រសើរឡើងវិញ បន្ទាប់ពីវិធានការរបស់សហភាពអឺរ៉ុបលើអង្ករកម្ពុជា ត្រូវបានបិទបញ្ចប់កាលពីថ្ងៃទី ១៨ ខែមករា ឆ្នាំ ២០២២។
កាលពីថ្ងៃទី ១៧ ខែមករា ឆ្នាំ ២០១៩ គណៈកម្មការអឺរ៉ុបបានសម្រេចហូតពន្ធនាំចូលរយៈពេល ៣ ឆ្នាំលើអង្ករដែលនាំចេញពីប្រទេសកម្ពុជា និងមីយ៉ាន់ម៉ា តាមរយៈការអនុវត្តវិធានការការពារដោយសារការកើនឡើងការនាំចូលអង្ករប្រភេទ Indica ពីប្រទេសទាំង ២ ធ្វើឱ្យប៉ះពាល់ដល់សេដ្ឋកិច្ចបណ្ដាប្រទេសផលិតអង្ករនៅអឺរ៉ុប។
តាមរយៈវិធានការនេះបានតម្រូវឱ្យកម្ពុជាត្រូវបង់ពន្ធនាំចូលចំនួន ១៧៥ អឺរ៉ូក្នុង ១ តោននៅឆ្នាំដំបូង (២០១៩) ១៥០ អឺរ៉ូ នៅឆ្នាំទី ២ (២០២០) និង ១២៥ អឺរ៉ូ នៅឆ្នាំទី ៣ (២០២១)។
លោក សុង សារ៉ន ប្រធានសហព័ន្ធស្រូវអង្ករកម្ពុជាបានប្រាប់ភ្នំពេញប៉ុស្តិ៍ ក្នុងថ្ងៃទី ៦ ខែកុម្ភៈថា បរិមាណនៃការនាំចេញស្រូវអង្ករ ក្នុងឆ្នាំ ២០២២ នឹងមានកំណើនបើធៀបនឹងឆ្នាំ ២០២១ ដោយសារកត្តារួមផ្សំមួយចំនួនដូចជា ការផ្តល់កូតានាំចេញអង្ករទៅកាន់ប្រទេសចិន (៤០ ម៉ឺនតោន) និងសម្ទុះនៃការបញ្ជាទិញពីទីផ្សារអឺរ៉ុប។
លោកថ្លែងថា៖ «តាមការព្យាករក្នុងត្រីមាសទី ១ នេះ កំណើននឹងបន្តក្នុងខែកុម្ភៈ និងមីនាបន្តទៀត ខណៈផលស្រូវដែលប្រមូលបានមានចំនួនកាន់តែច្រើន និងកាន់តែល្អ ហើយកត្តាទីផ្សារក៏បើកទូលាយជាងមុន»។
លោកបានបន្ថែមទៀតថាជាមួយភាពល្អប្រសើរនៃបរិមាណគុណភាព និងទិន្នផល ព្រមទាំងទីផ្សារក៏កំពុងទាក់ទាញឱ្យមានការវិនិយោគលើឡសម្ងួត និងឃ្លាំងស្តុកផងដែរ។ លោកបញ្ជាក់ថា៖ «ការវិនិយោគនេះកំពុងចូលរួមចំណែកយ៉ាងសំខាន់ក្នុងការពង្រឹង និងពង្រីកការនាំចេញអង្កររបស់កម្ពុជាឱ្យកាន់តែមានស្ថិរភាព និងកំណើននៅឆ្នាំបន្តបន្ទាប់ទៀត»។
ក្នុងឆ្នាំ ២០២២ នេះសហព័ន្ធស្រូវអង្ករកម្ពុជាបានដាក់ផែនការនាំចេញអង្ករក្នុងចន្លោះពី ៨០-៨៥ ម៉ឺនតោន។ នេះបើតាមលោក សារ៉ន។
កម្ពុជានឹងទទួលបានអត្ថប្រយោជន៍ពីក្របខ័ណ្ឌអនុគ្រោះពាណិជ្ជកម្មស្ថិតក្រោមផែនការទំនិញគ្រប់យ៉ាងលើកលែងតែអាវុធ (EBA) ដើម្បីប្រកួតប្រជែងនៅទីផ្សារសហភាពអឺរ៉ុប។
ចាប់ពីថ្ងៃទី ១៨ ខែមករា ឆ្នាំ ២០២២ មក អង្ករកម្ពុជាមិនស្ថិតនៅក្នុងបញ្ជីនៃការដក EBA មួយផ្នែកនោះទេ ដែលមានន័យថា ការនាំចេញអង្ករទៅទីផ្សារប្រទេសក្នុងសហគមន៍អឺរ៉ុប គឺមិនតម្រូវឱ្យមានការបង់ពន្ធឡើយខណៈក្នុងរយៈពេល ៣ ឆ្នាំកន្លងមក (ឆ្នាំ ២០១៩, ២០២០ និងឆ្នាំ ២០២១) ត្រូវបានតម្រូវឱ្យបង់ពន្ធចំនួន ១៧៥ អឺរ៉ូក្នុង ១ តោននៅឆ្នាំ ២០១៩១៥០ អឺរ៉ូក្នុង ១ តោននៅឆ្នាំ ២០២០ និងចំនួន ១២៥ អឺរ៉ូក្នុង ១ តោន នៅឆ្នាំ ២០២១។
កាលពីឆ្នាំ ២០២១ កម្ពុជាបាននាំចេញអង្ករទៅគោលដៅសរុបចំនួន ៥៦ ប្រទេស និងតំបន់ក្នុងបរិមាណសរុប ៦១៧ ០៦៩ តោន គិតជាទឹកប្រាក់ចំនួន ៤១៨ លានដុល្លារ និងបាននាំស្រូវចេញចំនួន ៣ ៥២៧ ៤១៨ តោនគិតជាទឹកប្រាក់ប្រមាណ ៨៤៥,៩៥ លានដុល្លារ៕ LA