.jpg)
ស្នាក់ការកណ្ដាលធនាគារអេស៊ីលីដា។ ហុង មិនា
ភ្នំពេញៈ Acleda Financial Trust (AFT) ជាអង្គការមិនមែនរដ្ឋាភិបាល (NGO) ស្ថិតក្រោមធនាគារអេស៊ីលីដាបានចុះកិច្ចព្រមព្រៀងជាមួយធនាគារ Acleda Bank Plc. (ABC) សម្រាប់ផែនការរយៈពេល ៥ ឆ្នាំ ដើម្បីទិញភាគហ៊ុនរបស់ធនាគារមួយនេះនៅផ្សារមូលបត្រកម្ពុជា (CSX) ចាប់ពីឆ្នាំ ២០២២ ដល់ឆ្នាំ ២០២៦ ជាវិធានការមួយដើម្បីធ្វើឱ្យការលក់ភាគហ៊ុនរបស់ធនាគារនេះមានស្ថិរភាពថ្លៃនៅលើទីផ្សារ។
យោងតាមសេចក្ដីជូនដំណឹងរបស់ ABC ដល់ CSX កាលពីថ្ងៃទី ៤ ខែកុម្ភៈ អេស៊ីលីដា ភីអិលស៊ី ដែលជាធនាគារពាណិជ្ជដំបូងគេនៅកម្ពុជាបានចុះបញ្ជីភាគហ៊ុនរបស់ខ្លួននៅទីផ្សារមូលបត្រកម្ពុជា (CSX) សូមជូនដំណឹងដល់ភាគទុនិកទាំងអស់ថា បន្ទាប់ពីមានការជូនដំណឹងស្តីពីការវិនិយោគលើធនាគារអេស៊ីលីដារបស់ ACLEDA Financial Trust ចុះថ្ងៃទី ៤ ខែកុម្ភៈ ឆ្នាំ ២០២២ ស្របតាមសេចក្តីសម្រេចរបស់ក្រុមប្រឹក្សាភិបាលក្រុមហ៊ុនធានាទុកទ្រព្យ និងនិយតករ AFT នឹងទិញភាគហ៊ុននៅលើ CSX ពីឆ្នាំ ២០២២ ដល់ឆ្នាំ ២០២៦ ដោយផ្អែកលើផែនការថវិកាផ្ទៃក្នុង និងយុទ្ធសាស្ត្ររយៈពេល ៥ ឆ្នាំរបស់ខ្លួន។
អនុប្រធានប្រតិបត្តិជាន់ខ្ពស់ធនាគារអេស៊ីលីដា លោកស្រី ម៉ា អមរ៉ា បានប្រាប់ ភ្នំពេញ ប៉ុស្តិ៍ កាលពីថ្ងៃទី ៩ ខែកុម្ភៈ ថា AFT នឹងវិនិយោគលើធនាគារអេស៊ីលីដា តាមរយៈការទិញភាគហ៊ុនរបស់ ABC នៅលើ CSX ចាប់ពីឆ្នាំ ២០២២ ដល់ ២០២៦។
លោកស្រីថ្លែងថា៖ «ជាទូទៅ យើងជឿជាក់ និងរំពឹងថា ការវិនិយោគនេះនឹងរួមចំណែកយ៉ាងសកម្មបន្ថែមទៀតរបស់វិនិយោគិននៅ CSX សម្រាប់ការកើនឡើងសន្ទនីយភាពលើទីផ្សារ និងបង្កើនល្បឿនការអភិវឌ្ឍទីផ្សារមូលបត្រកម្ពុជា»។
លោកស្រី គឹម សុផានីតា ប្រធាននាយកដ្ឋានប្រតិបត្តិការទីផ្សារ CSX ឱ្យដឹងថា AFT គឺជាអ្នកស្នងតំណែងរបស់អង្គការមិនមែនរដ្ឋាភិបាលរបស់អេស៊ីលីដា ស្ថិតក្រោមបទប្បញ្ញត្តិទំនុកចិត្តផ្នែកហិរញ្ញវត្ថុ ហើយពេលនេះគឺជាភាគទុនិកឈានមុខគេរបស់អេស៊ីលីដា។
លោកស្រីបន្តថា៖ «ផែនការវិនិយោគរបស់ AFT បង្ហាញថា AFT មានទំនុកចិត្តលើការវិនិយោគរយៈពេលវែងជាមួយនឹងធនាគារអេស៊ីលីដា។ ខ្ញុំជឿថា ផែនការនេះនឹងជួយកែតម្រូវតម្លៃទីផ្សារបច្ចុប្បន្ន និងកែតម្រូវភាពមិនស៊ីគ្នានៃការផ្គត់ផ្គង់ និងតម្រូវការបច្ចុប្បន្ននៃភាគហ៊ុនរបស់ ABC នៅលើទីផ្សារ ព្រមទាំងទទួលបានទំនុកចិត្តឡើងវិញពីវិនិយោគិនដែលបារម្ភពីការបន្តធ្លាក់ចុះតម្លៃដោយសារតែការលក់ភាគហ៊ុនដែលនៅសល់នៅពេលខាងមុខ ដែលគ្រប់គ្រងដោយបុគ្គលិកអេស៊ីលីដាស្ថិតក្រោម ASA»។
លោកស្រីបញ្ជាក់ថា៖ «ទោះយ៉ាងណាក៏ដោយ ដើម្បីបង្ហាញការប្តេជ្ញាចិត្តរបស់ពួកគេ និងទទួលបានទំនុកចិត្តពីវិនិយោគិនសាធារណៈលើផែនការនេះ AFT គួរតែផ្សព្វផ្សាយជាសាធារណៈនូវផែនការវិនិយោគលម្អិត រួមទាំងគោលបំណងជាក់លាក់ ការកំណត់តម្លៃទិញពេលវេលាលម្អិតបន្ថែមទៀត និងប្រភពមូលនិធិ។ល។»។
បើតាមរបាយការណ៍ប្រចាំថ្ងៃរបស់ CSX ភាគហ៊ុនរបស់ ABC បិទកាលពីថ្ងៃពុធ ទី ៩ ក្នុងតម្លៃ ១៣ ៣០០ រៀលក្នុង ១ ហ៊ុនជាមួយនឹងទំហំភាគហ៊ុនសរុប ៣៨ ០៥១ ដែលមានតម្លៃសរុប ៥០៦ ០៧៨ ៣០០ រៀលបើធៀបនឹងការបិទកាលពីថ្ងៃទី ៤ កន្លងមកនេះ គឺតម្លៃភាគហ៊ុនរបស់ ABC មានតម្លៃត្រឹមតែ ១០ ៣០០ រៀលប៉ុណ្ណោះ ដែលមានភាគហ៊ុនសរុបចំនួន ១៦ ៩៤៧ និងមានតម្លៃសរុប ១៧៤ ៦១៩ ២៦០ រៀល៕ LA
