ភ្នំពេញៈ ក្រុមហ៊ុនអភិវឌ្ឍន៍អចលនទ្រព្យ JS Land Plc ទទួលបានការចុះបញ្ជីផ្លូវការនៅក្រុមហ៊ុនផ្សារមូលបត្រកម្ពុជា (CSX) កាលពីថ្ងៃទី ១០ ខែកុម្ភៈ ដោយបានប្រមូលទុនប្រមាណ ៤៩ ពាន់លានរៀល ឬប្រមាណ ១២ លានដុល្លារសម្រាប់ពង្រីកអាជីវកម្មរបស់ខ្លួន។
លោក ហុង សុហួរ អគ្គនាយកនៃក្រុមហ៊ុនផ្សារមូលបត្រកម្ពុជាបានឱ្យដឹងថា JS Land បានក្លាយជាក្រុមហ៊ុនទី ២ ដែលបោះផ្សាយលក់មូលបត្រកម្មសិទ្ធិ និងចុះបញ្ជីលក់មូលបត្រកម្មសិទ្ធិរបស់ខ្លួននៅក្នុងទីផ្សារកំណើននៃផ្សារមូលបត្រកម្ពុជា បន្ទាប់ពីក្រុមហ៊ុន DBD Engineering Plc។ គិតមកដល់ពេលនេះ ផ្សារមូលបត្រកម្ពុជាមានក្រុមហ៊ុនចុះបញ្ជី ១៥ ក្នុងនោះក្រុមហ៊ុន ៩ បានចុះបញ្ជីជាភាគហ៊ុន និង ៦ បានចុះបញ្ជីសញ្ញាបណ្ណសាជីវកម្ម។ ក្រុមហ៊ុនទាំង ១៥ បានប្រមូលទុនសរុបពីទីផ្សារមូលបត្រប្រមាណជាង ២៨១ លានដុល្លារ។
លោកថ្លែងថា៖ «ក្រុមហ៊ុនទាំងនេះ មិនត្រឹមតែមានលទ្ធភាពទទួលបាននូវប្រភពទុនដែលមានតម្លៃដើមទាប និងជាទុនរយៈពេលវែងប៉ុណ្ណោះទេ ប៉ុន្តែថែមទាំងទទួលបានការលើកទឹកចិត្តពន្ធដារពីរដ្ឋាភិបាល បង្កើនកិត្តិនាមរបស់ខ្លួននៅទីផ្សារជាតិ និងអន្តរជាតិទទួលបានការចាប់អារម្មណ៍ពីដៃគូអាជីវកម្មសក្ដានុពល និងទទួលបានទំនុកចិត្តខ្ពស់ពីអតិថិជន វិនិយោគិន និងសាធារណជនទូទៅទៀតផង។
អគ្គនាយកនិយតករមូលបត្រកម្ពុជាលោក ស៊ូ សុជាតិ បានឱ្យដឹងថា ជាមួយនឹងការចុះបញ្ជីជាផ្លូវការរបស់ JS Land នៅក្នុងទីផ្សារកំណើនក្នុងអំឡុងពេលការរីករាលដាលជំងឺកូវីដ ១៩ វាឆ្លុះបញ្ចាំងថា ទីផ្សារមូលធនកម្ពុជាកំពុងតែមានការរីកចម្រើនជាមួយនឹងកំណើននៃក្រុមហ៊ុនថ្មីៗ ព្រមទាំងបានបញ្ជាក់ថា សាធារណជនកំពុងសម្លឹងមើលទីផ្សារនេះ។
លោកបានថ្លែងថា៖ «ខ្ញុំសូមចូលរួមអបអរសាទរដល់ក្រុមហ៊ុន JS Land ដែលចុះបញ្ជីនៅទីផ្សារកំណើនរបស់ក្រុមហ៊ុនផ្សារមូលបត្រកម្ពុជា ប្រកបដោយជោគជ័យនៅថ្ងៃនេះ។ បន្ទាប់ពីការចុះបញ្ជី ក្រុមហ៊ុននេះបានក្លាយជាក្រុមហ៊ុនទី ២ ដែលចុះបញ្ជីនៅក្នុងទីផ្សារកំណើន។ ខ្ញុំជឿជាក់ថា នឹងមានប្រភេទក្រុមហ៊ុន សហគ្រាសធុនតូច និងមធ្យមផ្សេងទៀតនឹងធ្វើការចុះបញ្ជីលក់មូលបត្រកម្មសិទ្ធិជាសាធារណៈរបស់ខ្លួនជាបន្តបន្ទាប់»។
លោក Jack Yap នាយកប្រតិបត្តិនៃក្រុមហ៊ុន JS Land បានឱ្យដឹងថា ដោយមានបទពិសោធមកពីទីផ្សារប្រទេសម៉ាឡេស៊ី និងទីក្រុងហុងកុង ក្រុមហ៊ុន JS Land បានកំណត់ទីតាំងខ្លួនឯង និងផ្តោតលើការសាងសង់ផ្ទះតម្លៃសមរម្យ ដែលឆ្លើយតបទៅនឹងតម្រូវការរបស់កម្ពុជា។ បន្ទាប់ពីរយៈពេល ៧ ឆ្នាំ ក្រុមហ៊ុន JS Land នៅពេលនេះគឺជាក្រុមហ៊ុនមួយក្នុងចំណោមក្រុមហ៊ុនឈានមុខគេដែលសាងសង់ផ្ទះតម្លៃសមរម្យក្នុងប្រទេសកម្ពុជា ពិសេសខុនដូតម្លៃសមរម្យ។
លោកបញ្ជាក់ថា ក្នុងរយៈពេលជាច្រើនឆ្នាំខាងមុខ ក្រុមហ៊ុនចង់ផ្តល់រង្វាន់ដល់ភាគទុនិករបស់ខ្លួនជាមួយនឹងការទទួលបានដើមទុនជាក់ស្តែង និងការទូទាត់ភាគលាភប្រកបដោយនិរន្តរភាព។
លោក Jack បន្ថែមថា៖ «យើងបានរៀបចំផែនការទុករួចហើយ ហើយទិញបានដីទំហំ ៤,២ ហិកតា ដើម្បីធានាការអភិវឌ្ឍរបស់យើង។ ដី ៤,២ ហិកតា គឺធំល្មមសម្រាប់យើងសាងសង់ខុនដូពី ១០ ទៅ ១៥ បន្ថែមទៀត»។
បើយោងតាមលោក ហុង សុហួរ សម្រាប់ឆ្នាំ ២០២១ បរិមាណជួញដូរភាគហ៊ុនប្រចាំថ្ងៃជាមធ្យមបានកើនដល់ ២៣៤ ៦២៨ ហ៊ុនក្នុង ១ ថ្ងៃ ពោលគឺកើនឡើងប្រមាណ ៤០០ ភាគរយ រីឯទំហំជួញដូរភាគហ៊ុនប្រចាំថៃ្ងជាមធ្យមបានកើនដល់ ២៦៩ ១៦៩ ដុល្លារកើនឡើង ១២៧ ភាគរយ និងចំនួនគណនីជួញដូរក៏បានកើនឡើងជាង ៤ ពាន់គណនី ពោលគឺកើនឡើងដល់ជាង ៣ ម៉ឺនគណនី។
លោក សុហួរ បានលើកឡើងថា៖ «ខ្ញុំសង្ឃឹមថា ជាមួយនឹងវត្តមានថ្មីរបស់ក្រុមហ៊ុន JS land នៅក្រុមហ៊ុនផ្សារមូលបត្រកម្ពុជា វានឹងជាគំរូនាំមុខមួយសម្រាប់ក្រុមហ៊ុននានា ក្នុងវិស័យអចលនទ្រព្យ ក៏ដូចជាសហគ្រាសធុនតូច និងមធ្យម ទាំងឡាយដែលមានសក្ដានុពល ពិចារណាពីការធ្វើពិពិធកម្មប្រភពទុនតាមរយៈផ្សារហ៊ុនដែលការណ៍នេះបញ្ជាក់ឱ្យឃើញថាផ្សារហ៊ុនមិនមែនជាច្រកហិរញ្ញប្បទានសម្រាប់តែក្រុមហ៊ុនធំៗនោះទេ តែក៏ជួយគាំទ្រដល់សហគ្រាសធុនតូច និងមធ្យម និងធុរកិច្ចបង្កើតថ្មីផងដែរ៕ LA