The Phnom Penh Post Search

Search form

Logo of Phnom Penh Post newspaper Phnom Penh Post - ក្រសួង​នឹង​រៀបចំ​ការដេញថ្លៃ​នាំចូល​ជ្រូក​រស់ បើ​មានការ​ខ្វះខាត​នៅលើ​ទីផ្សារ

ក្រសួង​នឹង​រៀបចំ​ការដេញថ្លៃ​នាំចូល​ជ្រូក​រស់ បើ​មានការ​ខ្វះខាត​នៅលើ​ទីផ្សារ

Content image - Phnom Penh Post
បុរស​ម្នាក់​កំពុង​ដាក់​ចំណី​ឱ្យ​ជ្រូក​ក្នុង​កសិដ្ឋាន​ចិញ្ចឹមសត្វ ១​ កន្លែង​ក្នុង​ខេត្តកណ្តាល​។ ហុង មិនា

ក្រសួង​នឹង​រៀបចំ​ការដេញថ្លៃ​នាំចូល​ជ្រូក​រស់ បើ​មានការ​ខ្វះខាត​នៅលើ​ទីផ្សារ

ភ្នំពេញៈ ក្រសួង​សេដ្ឋកិច្ច និង​ហិរញ្ញវត្ថុ​បានស្នើ​ក្រសួង​កសិកម្ម​ឱ្យ​រៀបចំ​យន្តការ​ដេញថ្លៃ​នាំចូល​ជ្រូក​រស់​ប្រកប​ដោយ​ភាពប្រកួតប្រជែង ដើម្បី​រក្សា​ស្ថិរភាព​ថ្លៃ​នៅលើ​ទីផ្សារ​ក្នុង​កម្រិត​មួយ​សមរម្យ​នៅពេល​មាន​កង្វះ​ការផ្គត់ផ្គង់​ជ្រូក​នៅក្នុង​ស្រុក​។

នៅក្នុង​លិខិត​របស់​ក្រសួង​សេដ្ឋកិច្ច និង​ហិរញ្ញវត្ថុ​ដែល​ផ្ញើជូន​រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ​កាលពី​ថ្ងៃទី​ ៨ ខែកុម្ភៈ បានលើកឡើង​យោបល់​ចំនួន ៤​ ចំណុច​ដើម្បី​ឆ្លើយតប​ទៅនឹង​សំណើ​របស់​ក្រសួងកសិកម្ម​ជុំវិញ​ការស្នើសុំ​ផ្អាក​ការផ្តួចផ្តើម​លើ​ការរៀបចំ​នីតិវិធី​ដេញថ្លៃ​ជ្រូក​រស់​សម្រាប់​នាំ​ចូលមក​កម្ពុជា​។

លិខិត​របស់​ក្រសួង​សេដ្ឋកិច្ច​បានបញ្ជាក់​ថា ការរៀបចំ​យន្តការ​ដេញថ្លៃ​ជ្រូក​រស់ មិនមែន​ផ្អែកលើ​សំណើ​របស់​ក្រុមហ៊ុន​នាំចូល​ជ្រូក​រស់​ចំនួន ​៤ ដូចដែល​បានលើកឡើង​ក្នុង​លិខិត​របស់​ក្រសួងកសិកម្ម​ទេ ប៉ុន្តែ​ត្រូវ​ផ្អែកលើ​ការសិក្សា​ស៊ីជម្រៅ​របស់​ក្រុមការងារ​នៃ​អគ្គលេខាធិការដ្ឋាន​នៃ​គណៈកម្មាធិការ​គោលនយោបាយ​សេដ្ឋកិច្ច និង​ហិរញ្ញវត្ថុ​ (​គ.ស.ហ​) និង​ការប្រឹក្សា​យោបល់​ជាមួយ​ក្រុមហ៊ុន​ឯកជន​ដែល​ប្រកបរបរ​នាំ​ជ្រូក​ចូល ក៏ដូចជា​ស្មារតី​រួម​នៃ​កិច្ចប្រជុំ​អន្តរក្រសួង ជាដើម​។

លិខិតបញ្ជាក់​ទៀតថា ដោយសារ​តែ​តម្លៃ​សាច់ជ្រូក​មាន​ការឡើងថ្លៃ​ជា​បន្តបន្ទាប់​រហូតដល់​តម្លៃ​ពី​ ២៥ ០០០-២៦ ០០០​ រៀល​ក្នុង ​១​ គីឡូក្រាម ក្នុង​ឆ្នាំ​ ២០២១ ដែល​អាចធ្វើឱ្យ​ប៉ះពាល់​ដល់​ការរស់នៅ​របស់​ប្រជាពលរដ្ឋ ដូច្នេះ​ការរៀបចំ​យន្ត​ការដេញ​ថ្លៃ​ជ្រូក​រស់ ដើម្បី​ធានា​ឱ្យ​បានការ​នាំចូល​ជ្រូក​រស់​ស្ថិតក្នុង​តម្លៃ​មួយ​ប្រកបដោយ​ភាព​ប្រកួត​ប្រជែង រក្សា​ស្ថិរភាព​ថ្លៃ​ជ្រូក​រស់ និង​ថ្លៃ​លក់​សាច់ជ្រូក​នៅលើ​ទីផ្សារ​ក្នុង​កម្រិត​មួយ​សមរម្យ​។ ប៉ុន្តែ​យន្តការ​នេះ​ត្រូវ​ប្រើប្រាស់​នៅពេល​ដែលមាន​កង្វះ​ការផ្គត់ផ្គង់​ក្នុងស្រុក​តែប៉ុណ្ណោះ ពោលគឺ​ពុំ​ត្រូវបាន​យកមក​អនុវត្ត​ជាប្រចាំ​ឡើយ ដើម្បី​កុំឱ្យ​ប៉ះពាល់​ដល់​ផលប្រយោជន៍​អ្នក​ចិញ្ចឹម​ជ្រូក​នៅក្នុង​ស្រុក​។

រដ្ឋមន្ត្រី​ក្រសួងកសិកម្ម លោក វេង សាខុន បាន​ប្រាប់​ភ្នំពេញ-​ប៉ុស្តិ៍​ថា បច្ចុប្បន្ន​កម្ពុជា​មានលទ្ធភាព​ក្នុង​ការផ្គត់ផ្គង់​ជ្រូក ១០០​ ភាគរយ​ហើយ ហេតុនេះ​ពុំ​ចាំបាច់​អនុវត្ត​យន្ត​ការដេញថ្លៃ​ជ្រូក​រស់​នាំ​ចូលមក​នោះទេ​។ លោក​បន្ថែមថា លិខិត​របស់​ក្រសួង​សេដ្ឋកិច្ច​នៅក្នុង​ចំណុច​ទី​ ៣ បានបញ្ជាក់​ច្បាស់​ហើយ​ចំពោះ​យន្តការ​ដេញថ្លៃ​ជ្រូក​រស់​របស់​ក្រុមហ៊ុន​ឯកជន​អាច​ប្រព្រឹត្ត​ទៅបាន​នៅពេល​មាន​កង្វះ​ការផ្គត់ផ្គង់​ក្នុងស្រុក​តែប៉ុណ្ណោះ​។ ម្យ៉ាងទៀត​ក្រសួងកសិកម្ម​បាន​ពិនិត្យឃើញថា សមាគម​អ្នកចិញ្ចឹមសត្វ​កម្ពុជា​អាច​ធានា​ការផ្គត់ផ្គង់​ជ្រូក​នៅលើ​ទីផ្សារ​បាន​ដោយ​ពុំ​ចាំបាច់​នាំចូល​ទេ​។

លោក​បាន​បញ្ជាក់ថា​៖ «​ការចិញ្ចឹម​ជ្រូក​ក្នុងស្រុក​នាពេល​សព្វថ្ងៃ មិន​ត្រឹមតែ​អាច​ផ្គត់ផ្គង់​តម្រូវការ​បាន​គ្រប់គ្រាន់​ប៉ុណ្ណោះ​ទេ យើង​ក៏មាន​គម្រោង​នឹង​នាំចេញ​នាពេល​អនាគត​ផងដែរ ដោយមាន​ការចរចា​ជាមួយ​ភាគី​ចិន​ដើម្បី​នាំចេញ​នាពេលខាងមុខ ប៉ុន្តែ​សំខាន់​ពេលនេះ​យើង​ត្រូវ​ផ្គត់ផ្គង់​ក្នុងស្រុក​ឱ្យបាន​គ្រប់គ្រាន់​សិន​»​។

លោក​បន្តថា ក្នុង​បរិបទ​ជំងឺ​កូវីដ ​១៩ កំពុង​បន្ត​រីករាលដាល​នេះ មិនមែន​មានតែ​សាច់ជ្រូក​ទេ​ដែល​ឡើងថ្លៃ ទំនិញ​ផ្សេងៗ​ក៏​ឡើងថ្លៃ​ដូចគ្នា​ដោយសារ​ថ្លៃដើម​ផលិត​ឡើងថ្លៃ ដូចជា​ប្រេងឥន្ធនៈ និង​ការដឹកជញ្ជូន​។

ប្រធាន​សមាគម​អ្នក​ចិញ្ចឹមសត្វ​កម្ពុជា លោក ស្រ៊ុន ពៅ បាន​ឱ្យ​ភ្នំពេញ​ប៉ុស្តិ៍​ដឹងថា ការនាំចូល​ជ្រូក​ពី​ប្រទេស​ជិតខាង​បាន​ផ្អាក​ជាង ៤ ​ខែ​មកហើយ ព្រោះ​សមាគម​មាន​លទ្ធភាព​គ្រប់គ្រាន់​ក្នុង​ការផ្គត់ផ្គង់​។

លោក​និយាយថា​៖ «​សព្វថ្ងៃនេះ តម្លៃ​ជ្រូក​រស់​មិនមាន​ការប្រែប្រួល​ទេ​ដោយ​តម្លៃ​ចន្លោះ ១១ ០០០-១២ ០០០​ រៀល​ក្នុង ១​ គីឡូក្រាម ដែល​តម្លៃ​នេះ​បានត្រឹមតែ​អាច​រួចខ្លួន​ប៉ុណ្ណោះ​មិនទាន់​ចំណេញ​ទេ​។ ចំណែក​ការផ្គត់ផ្គង់​វិញ គឺ​មិនមាន​ការខ្វះខាត​ទេ ទោះ​យើង​ផ្អាក​នាំចូល​ក៏ដោយ នេះ​បានន័យថា យើង​មាន​សមត្ថភាព​គ្រប់គ្រាន់​ក្នុងការ​ផ្គត់ផ្គង់​ដោយ​ខ្លួនឯង​»​។

បើតាម​ប្រធាន​សមាគម​អ្នក​ចិញ្ចឹមសត្វ​កម្ពុជា បច្ចុប្បន្ននេះ​តម្រូវការ​សាច់ជ្រូក​នៅ​កម្ពុ​ជាមាន​ប្រមាណ​ពី ៨ ​ពាន់ ៩​ ពាន់​ក្បាល​ក្នុង​ ១​ ថ្ងៃ ដែល​សុទ្ធសឹង​ជា​ជ្រូក​ក្នុងស្រុក​៕ LA

អត្ថបទគួរចាប់អារម្មណ៍