The Phnom Penh Post Search

Search form

Logo of Phnom Penh Post newspaper Phnom Penh Post - កម្ពុជា​បង្ហាញ​បំណង​ចុះ​កិច្ចព្រមព្រៀង​ពាណិជ្ជកម្ម​សេរី​ជាមួយ​កាណាដា

កម្ពុជា​បង្ហាញ​បំណង​ចុះ​កិច្ចព្រមព្រៀង​ពាណិជ្ជកម្ម​សេរី​ជាមួយ​កាណាដា

Content image - Phnom Penh Post
ជំនួបពាណិជ្ជកម្ម​សេរី​ទ្វេភាគី​កម្ពុជា​-​កាណាដា និង​ស្នើ​ឱ្យមាន​ការរៀបចំ​កិច្ច​ជំនួប​ពាណិជ្ជកម្ម រវាង​វិនិយោគិន​នៃ​ប្រទេស​ទាំង​ ២​។​ រូបថត ក្រសួងពាណិជ្ជកម្ម

កម្ពុជា​បង្ហាញ​បំណង​ចុះ​កិច្ចព្រមព្រៀង​ពាណិជ្ជកម្ម​សេរី​ជាមួយ​កាណាដា

ភ្នំពេញៈ កម្ពុជាស្នើ​កាណាដា ពិនិត្យ​លទ្ធភាព​ក្នុងការ​សិក្សា​ទៅលើ​លទ្ធភាព​នៃ​ការបង្កើត​កិច្ចព្រមព្រៀង ពាណិជ្ជកម្ម​សេរី​ទ្វេភាគី​កម្ពុជា​-​កាណាដា និង​ស្នើ​ឱ្យមាន​ការរៀបចំ​កិច្ច​ជំនួប​ពាណិជ្ជកម្ម រវាង​វិនិយោគិន​នៃ​ប្រទេស​ទាំង​ ២​។​

​នៅក្នុង​ជំនួប​ពិភាក្សា ជាមួយ​ឯកអគ្គរដ្ឋទូត​កាណាដា ប្រចាំ​កម្ពុជា លោក ប៉ាន សូរ​ស័ក្តិ រដ្ឋមន្ដ្រីក្រសួង​ពាណិជ្ជកម្ម បាន​លើកឡើងថា ការធ្វើ​ពាណិជ្ជកម្ម​ទ្វេភាគី​រវាង​ប្រទេស​ទាំង​២​មានការ​កើនឡើង​គួរឱ្យកត់សម្គាល់ ដោយ​ក្នុងនោះ កម្ពុជា​បាន​នាំ​ចេញទៅ​ប្រទេស​កាណាដា​ក្រោម​កម្មវិធី​ពន្ធគយ​សេរី និង​កូតា​សេរី ដែលមាន​ទំហំ​ទឹកប្រាក់​រហូតដល់ ៩៥៤,៨២ លាន​ដុល្លា​អាមេរិក ក្នុង​ឆ្នាំ​២០២១​។​

​លោក​បានស្នើ​ដល់​ភាគី​កាណាដា​ថា សូមឱ្យ​ប្រទេស​ទាំង​២ ពិនិត្យ​លទ្ធភាព​ក្នុងការ​សិក្សា​ទៅលើ​លទ្ធភាព​នៃ​ការបង្កើត​កិច្ចព្រមព្រៀង​ពាណិជ្ជកម្ម​សេរី​ទ្វេភាគី​កម្ពុជា​-​កាណាដា និង​ស្នើ​ឱ្យមាន​ការរៀបចំ​កិច្ច​ជំនួប​ពាណិជ្ជកម្ម រវាង​វិនិយោគិន​កាណាដា ដែល​បាន​វិនិយោគ​នៅ​ប្រទេស​ថៃ និង​ទ្បា​វ ជាមួយ​កម្ពុជា ដើម្បី​ទាញយក​ប្រយោជន៍​ពី​កិច្ចព្រមព្រៀង​ពាណិជ្ជកម្ម​សេរី​ទ្វេភាគី​កម្ពុជា​-​ចិន (CCFTA) កិច្ចព្រមព្រៀង​ពាណិជ្ជកម្ម​សេរី​ទ្វេភាគី​កម្ពុជា​-​កូរ៉េ (CKFTA) និង​កិច្ចព្រមព្រៀង​ភាពជា​ដៃគូ​សេដ្ឋកិច្ច​គ្រប់​ជ្រុងជ្រោយ​តំបន់ (RCEP) ដែល​កម្ពុជា​ទើប​សម្រេចបាន នាពេល​ថ្មីៗ​នេះ​។

​លោក​បញ្ជាក់ថា​៖​​«​ក្រៅពី​កិច្ចព្រមព្រៀង​សំខាន់ៗ​ទាំងនេះ កម្ពុជា​បានធ្វើ​កំណែទម្រង់ និង​កសាង​ច្បាប់​វិនិយោគ​ថ្មីៗ​ជាច្រើន សំដៅ​ជួយ​សម្រួល​ដល់​បរិយាកាស​ធុរកិច្ច​នៅ​កម្ពុជា​ឱ្យ​កាន់តែ​ប្រសើរឡើង​»​។​

​លើសពីនេះ លោក​រដ្ឋមន្ត្រី ក៏បាន​ស្នើ​ដល់​ភាគី​កាណាដា បន្ត​នូវ​ជំនួយ​ក្រោម​គម្រោង CTIF នេះ លើ​ជំនួយ​បច្ចេកទេស​ដល់​កម្ពុជា ទាក់ទង​ការអភិវឌ្ឍន៍​សមត្ថភាព SMEs ការចូលរួម​តាំងពិព័រណ៍ និង​ការផ្គូផ្គង​ឱ្យមាន​ជំនួប​ពាណិជ្ជកម្ម និង​ការវិនិយោគ​រវាង​ប្រទេស​ទាំង ​២ និង​ស្នើ​ឱ្យមាន​ការផ្តល់​ការអនុគ្រោះ​ពិសេស​ដល់​កម្ពុជា ដែលជា​ប្រទេស​មាន​គម្លាត​សេដ្ឋកិច្ច​តិចជាង​ប្រទេស​អាស៊ាន​មួយចំនួន​។

​លោកស្រី សា​រ៉ា ថៃ​ល័​រ (Sarah Taylor) ឯកអគ្គរដ្ឋទូត​កាណាដា ប្រចាំ​កម្ពុជា បាន​ឆ្លើយតប​ថា កាណាដា​នឹង​ជំរុញ​ការចរចា​ពាណិជ្ជកម្ម​សេរី​អាស៊ាន​-​កាណាដា និង​ពិនិត្យ​លទ្ធភាព​លើ​ការសិក្សា​ទៅលើ​លទ្ធភាព​នៃ​ការបង្កើត​កិច្ចព្រមព្រៀង​ពាណិជ្ជកម្ម​សេរី​ទ្វេភាគី​កម្ពុជា​-​កាណាដា ព្រោះ​កិច្ចការ​នេះ​ជា​កិច្ចការ​ស្របគ្នា​ជាមួយ​គោលនយោបាយ​ពាណិជ្ជកម្ម​របស់​កាណាដា ក្រោម​រដ្ឋបាល​ថ្មី ដែល​ត្រូវ​បង្កើន​ពាណិជ្ជកម្ម​របស់ខ្លួន​ជាមួយ​តំបន់​អាស៊ី​ប៉ាស៊ីហ្វិក​។​

​លោកស្រី​បញ្ជាក់ថា នឹង​យក​សំណើ​របស់​ក្រសួងពាណិជ្ជកម្ម​ទាំងអស់ ទៅ​ពិភាក្សា​ជាមួយ​ស្ថាប័ន​ពាក់ព័ន្ធ និង​ជំរុញ​មន្ត្រី​របស់ខ្លួន​ឱ្យធ្វើ​ការ​ជាមួយ​កម្ពុជា​ឱ្យ​កាន់តែ​ជិតស្និទ្ធ​បន្ថែមទៀត សំដៅ​នាំយក និង​បង្កើតបាន​គម្រោង​ជាក់លាក់​ក្រោម​កិច្ចសហប្រតិបត្តិការ​ក្របខ័ណ្ឌ CTIF ព្រមទាំង​ដើម្បី​ធ្វើកា​លើកសំណើ​ជំនួយ​បច្ចេកទេស​ពី​គម្រោង CTIF របស់​រដ្ឋាភិបាល​កាណាដា​ផងដែរ​៕​

អត្ថបទគួរចាប់អារម្មណ៍