The Phnom Penh Post Search

Search form

Logo of Phnom Penh Post newspaper Phnom Penh Post - រដ្ឋាភិបាល​បើក​យុទ្ធនាការ ស្វែង​រក​នូវ​ភាព​អច្ឆរិយៈ​របស់​ប្រទេស​កម្ពុជា

រដ្ឋាភិបាល​បើក​យុទ្ធនាការ ស្វែង​រក​នូវ​ភាព​អច្ឆរិយៈ​របស់​ប្រទេស​កម្ពុជា

Content image - Phnom Penh Post

រដ្ឋាភិបាល​បើក​យុទ្ធនាការ ស្វែង​រក​នូវ​ភាព​អច្ឆរិយៈ​របស់​ប្រទេស​កម្ពុជា

ភ្នំពេញៈ ក្រសួង​ទេសចរណ៍ បាន​និង​កំពុង​រៀបចំ​យុទ្ធនាការ​ទីផ្សារ​ឌីជីថល ដែល​មាន​ឈ្មោះ​ថា “យុទ្ធនាការ​ស្វែង​រក​នូវ​ភាព​អច្ឆរិយៈ​របស់​ប្រទេសក​ម្ពុជា” ក្នុង​គោលដៅ​ផ្សព្វផ្សាយ​ពី​តំបន់​អេកូទេសចរណ៍ និង​ទេសចរណ៍​ធម្មជាតិ​នៅ​ទូទាំង​ប្រទេស​កម្ពុជា។

យុទ្ធនាការ​នេះ ត្រូវ​បាន​រៀបចំ​ឡើង​រយៈពេល ២​ខែ គឺ​ចាប់​ពី​ខែមករា ដល់​ខែ​កុម្ភៈ ឆ្នាំ ២០២២នេះ ដោយ​មាន​ជំនួយ​ហិរញ្ញប្បទាន​ពី​ទីភ្នាក់ងារ​អភិវឌ្ឍន៍​បារាំង AFD និង​កិច្ច​សហការ​ជាមួយ​ក្រុមហ៊ុន​ប្រឹក្សា​យោបល់ Redhill Communications។

យុទ្ធនាការ​នេះ មាន​គោល​បំណង​ពង្រឹង​វិស័យ​ទេសចរណ៍ ដោយ​ពង្រឹង​សមត្ថភាព​ទាំង​ក្នុង​វិស័យ​រដ្ឋ និង​ឯកជន។ កម្មវិធី​នេះ បាន​ដាក់​ចេញ​នូវ​សកម្មភាព​ថ្មីៗ​រួមមាន ការ​រៀបចំ​យុទ្ធនាការ​វីដេអូ​ផ្សព្វផ្សាយ​ពី​ម្ហូប​អាហារ​ខ្មែរ (Taste Cambodia), ការ​សិក្សា​ដើម្បី​ជួយ​ពង្រឹង​ការ​ធ្វើ​ទីផ្សារ និង​ការ​បណ្ដុះ​បណ្ដាល​ដល់​មន្ត្រី​ជំនាញ​នៃ​ក្រសួង​ទេសចរណ៍ និង​បុគ្គលិក​សមាគម​ទេសចរណ៍​ផ្នែក​ឯកជន។

នៅ​ក្នុង​អំឡុង​ខែ​មករា កន្លង​ទៅ​ថ្មីៗ​នេះ តារា​ល្បី​ឈ្មោះ​តាម​ប្រព័ន្ធ​អ៊ីនធឺណិត បាន​ចូលរួម​ក្នុង​កម្មវិធី​ដំណើរ​កម្សាន្ត​អាថ៌កំបាំង និង​កម្មវិធី មហោស្រព​ម្ហូប​អាហារ​និម្មិត (Virtual Food Festival) ដើម្បី​ផ្សព្វផ្សាយ​ម្ហូប​ខ្មែរ​បែប​ប្រពៃណី​របស់​ខ្មែរ​ផងដែរ។

លោក ថោង ខុន រដ្ឋមន្ត្រី​ក្រសួង​ទេសចរណ៍ បាន​មាន​ប្រសាសន៍​ថា ក្រសួង​ទេសចរណ៍ មាន​ក្តី​សោមនស្ស​ក្នុង​ការ​បង្ហាញ​ពី​អច្ឆរិយៈភាព​របស់​កម្ពុជា តាម​រយៈការ​ណែនាំ​ពី​គោលដៅ​អេកូទេសចរណ៍ និង​ទេសចរណ៍​ធម្មជាតិ​នៅ​ទូទាំង​ប្រទេស ដែល​មិន​សូវ​មាន​អ្នក​ស្គាល់​ច្រើន​នៅ​ឡើយ រួម​ជាមួយ​នឹង​ការ​បង្ហាញ​ពី​ម្ហូប​អាហារ​ខ្មែរ​ដ៏​អស្ចារ្យ​ដែល​យើង​មាន​នៅ​ក្នុង​ព្រះរាជាណាចក្រ​កម្ពុជា»។

លោក​បាន​បន្ថែម​ថា តាម​រយៈ «កម្មវិធី​ពង្រឹង​សមត្ថភាព​ពាណិជ្ជកម្ម​ក្នុង​វិស័យ​ទេសចរណ៍» (TCBP) ដែល​ផ្តល់​មូលនិធិ​ដោយ​ទីភ្នាក់ងារ​អភិវឌ្ឍន៍​បារាំង (AFD) និង​ដោយ​មាន​កិច្ច​សហការ​ពី​ក្រុមហ៊ុន Redhill Communications យើង​សង្ឃឹម​ថា​កម្មវិធី “ដំណើរ​កម្សាន្ត​អាថ៌កំបាំង” និង “មហោស្រព​ម្ហូប​អាហារ​និម្មិត” នឹង​ជួយ​បង្កើន​ចំណាប់​អារម្មណ៍​របស់​ពលរដ្ឋ​ខ្មែរ​ក្នុង​ស្រុក និង​ជនបរទេស​ដែល​រស់នៅ​កម្ពុជា​ទាំង​អស់ ក្នុង​ការ​ស្វែង​យល់​អំពី​ព្រះរាជាណាចក្រ​កម្ពុជា កាន់​តែ​ស៊ី​ជម្រៅ​បន្ថែម​ទៀត លើស​ពី​តំបន់​ដែល​មាន​កេរ្តិ៍​ឈ្មោះ​ស្រាប់ ក៏​ដូចជា​លើក​ទឹក​ចិត្ត​ពួកគាត់​ឱ្យ​ភ្លក់​រសជាតិ​ម្ហូប​អាហារ​ខ្មែរ»។

លោក​អះអាង​ថា សកម្មភាព​នេះ​នឹង​មិន​ត្រឹម​តែ​លើក​ទឹក​ចិត្ត​ប្រជាជន​ឱ្យ​ស្វែងរក​នូវ​ភាព​អច្ឆរិយៈ​របស់​ប្រទេស​កម្ពុជា​តែ​ប៉ុណ្ណោះ​ទេ ប៉ុន្តែ​ក៏​នឹង​ជួយ​ជំរុញ​ការ​ស្តារ​សេដ្ឋកិច្ច​កម្ពុជា​ក្រោយ​ពី​រង​ផល​ប៉ះពាល់​ដ៏​ធ្ងន់ធ្ងរ​ពី​វិបត្តិ​ជំងឺ​កូវីដ១៩ ផងដែរ៕

អត្ថបទគួរចាប់អារម្មណ៍