ព្រះសីហនុៈ ក្រុងព្រះសីហនុត្រូវបានរំពឹងថា នឹងអាចទាក់ទាញភ្ញៀវទេសចរឱ្យធ្វើដំណើរទៅកម្សាន្តក្នុងចំនួនច្រើននៅពេលពិភពលោកអាចគ្រប់គ្រងការឆ្លងរាលដាលជំងឺកូវីដ ១៩ បាន ខណៈបច្ចុប្បន្ននេះអាជ្ញាធរខេត្តកំពុងរៀបចំកិច្ចការជាច្រើន។ នេះបើយោងតាម លោក ឡុង ឌីម៉ង់ អភិបាលរងខេត្តព្រះសីហនុ។
បច្ចុប្បន្នរដ្ឋាភិបាលកម្ពុជាតាមរយៈក្រសួងទេសចរណ៍កំពុងរៀបចំសេចក្តីព្រាងចុងក្រោយស្តីពីផែនការអភិវឌ្ឍន៍ទេសចរណ៍ខេត្តព្រះសីហនុ ២០២១-២០២៥ ជាមួយក្តីរំពឹងថា នឹងក្លាយទៅជាកម្លាំងចលករ ឬមេដែកដ៏ខ្លាំងក្នុងការទាក់ទាញអ្នកវិនិយោគ និងភ្ញៀវទេសចរជាតិ-អន្តរជាតិឱ្យទៅកម្សាន្តនៅទីនោះនាពេលដ៏ខ្លីខាងមុខ។
អភិបាលរងខេត្តព្រះសីហនុលោក ឡុង ឌីម៉ង់ បានប្រាប់ ភ្នំពេញ ប៉ុស្តិ៍ កាលពីចុងសប្តាហ៍មុនថា ក្រុមការងារពាក់ព័ន្ធ និងមន្ត្រីនៃមន្ទីរទេសចរណ៍ខេត្តព្រះសីហនុកំពុងធ្វើកិច្ចការជាច្រើនដើម្បីរួមចំណែកជំរុញឱ្យផែនការអភិវឌ្ឍន៍ទេសចរណ៍រយៈពេល ៥ ឆ្នាំ អាចសម្រេចបានដូចការគ្រោងទុក។
លោកប្រាប់ទៀតថា សកម្មភាពការងារសំខាន់ៗដែលអាជ្ញាធរខេត្តកំពុងធ្វើមានដូចជា ការបណ្តុះបណ្តាលវិជ្ជាជីវៈទេសចរណ៍ដល់អ្នកពាក់ព័ន្ធ, ការបណ្តុះបណ្តាលគ្រូបង្គោលសម្រាប់បណ្តុះបណ្តាលបន្ត, ការផ្សព្វផ្សាយព័ត៌មានពីវិស័យទេសចរណ៍ក្នុងខេត្តតាមរយៈគេហទំព័រ និងបណ្តាញសង្គម ទស្សនាវដ្តី, និងការបង្កើត Application (Sihanouk Ville Tourism App)។
បន្ថែមពីលើនេះមន្ទីរទេសចរណ៍ខេត្តក៏កំពុងរៀបចំតំបន់អេកូទេសចរណ៍ចំនួន ២ កន្លែងថែមទៀតនៅតំបន់រាម សម្រាប់បង្កើនភាពទាក់ទាញដល់ការធ្វើធុរកិច្ច និងសម្រាកលម្ហែ, ការចុះទៅពិនិត្យ ពង្រឹងគុណភាពសេវាកម្មទេសចរណ៍, ការចុះទៅពិនិត្យនូវការអនុវត្តច្បាប់ស្តង់ដាទេសចរណ៍ នីតិវិធីស្តង់ដាអប្បបរមា (SOP) នៅតាមសណ្ឋាគារ ផ្ទះសំណាក់ និងភោជនីយដ្ឋាន ដើម្បីជំរុញយុទ្ធនាការទីក្រុងស្អាតផងដែរ។ នេះបើតាមលោក ឌីម៉ង់។
លោកបានថ្លែងថា៖ «ដើម្បីឱ្យយន្តការគ្រប់គ្រងកាន់តែមានប្រសិទ្ធភាព មន្ទីរទេសចរណ៍-ខេត្តដែលជាសេនាធិការរបស់គណៈកម្មាធិការជាតិអភិវឌ្ឍន៍ទេសចរណ៍បានបង្កើតឱ្យមានសមាគមទេសចរណ៍ចំនួន ៣ ដើម្បីបង្កើនភាពងាយស្រួលក្នុងការធ្វើកិច្ចការជាមួយផ្នែកសារធារណៈ មន្ទីរ និងអង្គភាពពាក់ព័ន្ធផងដែរ»។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជាបាននិយាយថា ខេត្តព្រះសីហនុមិនត្រឹមតែជាទីក្រុងសេដ្ឋកិច្ច និងកំពង់ផែសមុទ្ររបស់កម្ពុជាប៉ុណ្ណោះទេ ប៉ុន្តែក៏ជាទីតាំងមានសក្តានុពលខ្លាំងសម្រាប់វិស័យទេសចរណ៍ផងដែរ។ តាមរយៈសកម្មភាពនៃការអភិវឌ្ឍធំៗដែលមានដូចជា ហេដ្ឋារចនាសម្ព័ន្ធផ្លូវថ្នល់ សំណង់អគារធំៗ និងកំពង់ផែសមុទ្រនោះ ទីនោះប្រាកដជានឹងទទួលបានការមកកម្សាន្ត និងវិនិយោគកាន់តែច្រើននៅពេលស្ថានភាពជំងឺកូវីដ ១៩ អាចគ្រប់គ្រងបានទាំងស្រុង។
ទោះយ៉ាងណា លោកនិយាយថា ក្នុងពេលនេះភ្ញៀវទៅកម្សាន្តនៅខេត្តព្រះសីហនុ គឺមានតែអ្នកនៅក្នុងស្រុកប៉ុណ្ណោះ ខណៈភ្ញៀវមកពីក្រៅប្រទេស គឺនៅមានចំនួនតិចតួចនៅឡើយ។
លោកបញ្ជាក់ថា៖ «ខ្ញុំមានជំនឿយ៉ាងមុតមាំថា នៅពេលពិភពលោកអាចគ្រប់គ្រងជំងឺកូវីដ ១៩ បាន ក្រុងព្រះសីហនុនឹងក្លាយជាទីក្រុងគំរូ (Icon) មួយរបស់កម្ពុជា ខណៈបច្ចុប្បន្នទីនោះបានកំពុងមានការអភិវឌ្ឍទៅមុខយ៉ាងឆាប់»។
យោងតាមលោក ឡុង ឌីម៉ង់ បច្ចុប្បន្នមានក្រុមហ៊ុនអាកាសចរណ៍ ២ ប៉ុណ្ណោះដែលហោះហើរពីបរទេសមកអាកាសយានដ្ឋានអន្តរជាតិខេត្តព្រះសីហនុ គឺក្រុមហ៊ុនឡានម៉ី និងអង្គរអ៊ែរ ដោយមានជើងហោះហើរទាំងជើងហោះហើរ Charter flight គឺចន្លោះពី ៤-៥ ជើងក្នុង ១ សប្តាហ៍។
ទិន្នន័យក្រសួងទេសចរណ៍បានបង្ហាញថា ក្នុងឆ្នាំ ២០២១ កម្ពុជាទទួលបានភ្ញៀវទេសចរបរទេស ១៩៦ ៤៩៥ នាក់ ធ្លាក់ចុះ ៨៥ ភាគរយបើធៀបនឹងឆ្នាំ ២០២០៕ LA