ភ្នំពេញៈ ទោះបីផលិតផលពីទឹកមាត់ត្រចៀកកាំមានតម្រូវការទីផ្សារខ្ពស់ ក៏តម្លៃ និងការវិនិយោគទៅលើការចិញ្ចឹមសត្វត្រចៀកកាំហាក់មិនបង្ហាញពីសញ្ញាវិជ្ជមានទេនារយៈពេលប៉ុន្មានឆ្នាំចុងក្រោយនេះ។ នេះបើតាមការអះអាងរបស់លោក ណាង សុធី ប្រធានសហព័ន្ធសម្បុកត្រចៀកកាំកម្ពុជា។
លោក ណាង សុធី បានប្រាប់ភ្នំពេញប៉ុស្តិ៍ នាថ្ងៃទី ១៥ ខែកុម្ភៈថា ការវិនិយោគលើផ្ទះអភិរក្សត្រចៀកកាំនៅកម្ពុជាក្នុងរយៈពេល ២-៣ ឆ្នាំចុងក្រោយនេះមិនមានសញ្ញាវិជ្ជមានណាមួយគួរឱ្យកត់សម្គាល់ទេ បើទោះបីទីផ្សារទទួលទិញមានច្រើនជាងមុនក៏ដោយ។ បញ្ហាទាំងនេះវាអាចបណ្តាលមកពីកត្តាមួយចំនួនដូចជា កង្វះទុនវិនិយោគ, ការចិញ្ចឹមធ្វើឡើងតាមគ្នាដោយមិនមានបច្ចេកទេសត្រឹមត្រូវ ជាដើម។ លោកបន្តថា មួយវិញទៀត ទឹកមាត់ត្រចៀកកាំកម្ពុជាក៏មិនទាន់មានការនាំចេញជាផ្លូវការទៅប្រទេសចិន ដែលជាទីផ្សារមានតម្រូវការខ្ពស់ផងដែរ។ បច្ចុប្បន្នផលិតផលទឹកមាត់ត្រចៀកកាំសម្អាតរួចមានតម្លៃចន្លោះពី ១ ៥០០ ទៅដល់ ៣ ៥០០ ដុល្លារ ក្នុង ១ គីឡូក្រាម និងមិនទាន់សម្អាត មានតម្លៃចន្លោះពី ៤៨០ ទៅដល់ ៧៥០ ដុល្លារ។
លោកនិយាយថា៖ «ក្រៅពីបំពេញតម្រូវការនៅក្នុងស្រុក ផលិតផលទឹកមាត់ត្រចៀកកាំកម្ពុជានៅមិនទាន់អាចនាំចេញជាផ្លូវការទៅទីផ្សារប្រទេសចិនបានឡើយ ដោយយើងតែងតែនាំចេញតាមប្រទេសវៀតណាម ម៉ាឡេស៊ី និងថៃ ជាដើម»។
បើតាមលោក ណាង សុធី នៅកម្ពុជាបច្ចុប្បន្នមានផ្ទះអភិរក្សត្រចៀកកាំប្រមាណ ៣ ០០០ ខ្នង។ ចំនួននេះគឺមានកម្រិតទាបខ្លាំងណាស់បើធៀបនឹងប្រទេសម៉ាឡេស៊ី ឥណ្ឌូនេស៊ី និងថៃ ដែលប្រទេសទាំងអស់នោះអាចមានផ្ទះអភិរក្សត្រចៀកកាំរហូតដល់ ១០ ម៉ឺនខ្នងផងក៏មាន។
លោក លឹម វឌ្ឍនៈ ម្ចាស់ផ្ទះត្រចៀកកាំ «ខ្មែរធម្មជាតិ សម្បុកទឹកមាត់ត្រចៀកកាំ» ដែលមានផ្ទះត្រចៀកកាំចំនួន ២ កន្លែងនៅស្រែអំបិល និងវាលរេញបាននិយាយថា ចាប់តាំងពីវត្តមានរបស់ជំងឺកូវីដ ១៩ មកទីផ្សារទឹកមាត់ត្រចៀកកាំនៅកម្ពុជាហាក់មិនមានភាពល្អប្រសើរទេ ដោយតម្លៃ និងតម្រូវការបានធ្លាក់ចុះខ្លះៗ។ ការធ្លាក់នេះអាចបណ្តាលមកពីការនាំចេញទៅក្រៅប្រទេសជួបការពិបាកជាងមុនដោយសារវិធានការប្រយុទ្ធប្រឆាំងនឹងជំងឺកូវីដ ១៩ ខណៈតម្រូវការ និងតម្លៃសម្រាប់ទីផ្សារក្នុងស្រុក គឺមិនមានបញ្ហានោះទេ។
លោកនិយាយថា៖ «បច្ចុប្បន្នផលិតផលទឹកមាត់ត្រចៀកកាំរបស់ខ្ញុំដែលសម្អាតស្អាតដាក់លក់ក្នុងតម្លៃ ១ ៨០០ ដុល្លារក្នុង ១ គីឡូក្រាម និងផលិតផលមិនទាន់សម្អាតមានតម្លៃ ៧០០ ដុល្លារ។ តម្លៃនេះគឺប្រហាក់ប្រហែលនឹងឆ្នាំមុនដែរ ប៉ុន្តែបើធៀបនឹង ២-៣ ឆ្នាំមុន គឺធ្លាក់ចុះបន្តិចបន្តួច»។
ជាមួយនឹងបទពិសោធក្នុងមុខរបរនេះរយៈពេល ៧-៨ ឆ្នាំ លោក វឌ្ឍនៈ បានលើកឡើងថា ការចិញ្ចឹមត្រចៀកកាំនឹងមានសម្ទុះខ្លាំងបើកម្ពុជាអាចធ្វើការនាំចេញទៅទីផ្សារប្រទេសចិន ដែលជាទីផ្សារមានប្រជាជនច្រើនជាងគេ និងនិយមទទួលទានផលិតផលពីទឹកមាត់ត្រចៀកកាំច្រើនផងដែរ។
ក្រសួងកសិកម្ម រុក្ខាប្រមាញ់ និងនេសាទកន្លងមកបានឱ្យដឹងថា ប្រទេសកម្ពុជាបានដាក់សំណើទៅរដ្ឋាភិបាលចិន ដើម្បីស្នើសុំនាំចេញផលិតផលកសិកម្មដូច ផ្លែមៀនប៉ៃលិន ម្រេច ទុរេន ក្រូចថ្លុង និងទឹកមាត់ត្រចៀកកាំ ជាដើម។
អគ្គនាយកនៃអគ្គនាយកដ្ឋានកសិកម្ម ក្រសួងកសិកម្ម រុក្ខាប្រមាញ់ និងនេសាទ លោក ងិន ឆាយ ធ្លាប់បានប្រាប់ ភ្នំពេញ ប៉ុស្តិ៍ថា ក្រុមការងាររបស់ក្រសួងកសិកម្មកំពុងតែធ្វើការជាមួយផ្នែកឯកជន និងអាជ្ញាធរប្រទេសចិន ដើម្បីនាំចេញផលិតផលពីទឹកមាត់ត្រចៀកកាំទៅប្រទេសចិន។ ទោះយ៉ាងណាផែនការនេះមានឧបសគ្គធំៗចំនួន ២ គឺការចរចាជាមួយភាគីចិន និងបញ្ហាក្នុងស្រុក។ លោកបន្តថា បញ្ហាខាងក្រៅ គឺភាគីចិនបានកំណត់គោលការណ៍ក្នុងការចរចា ១ ដង ១ មុខទំនិញ ចំណែកបញ្ហាខាងក្នុងគឺសមត្ថភាពកែច្នៃដែលនៅមិនទាន់ស្របតាមស្តង់ដាដែលប្រទេសចិនចង់បាន។
លោកនិយាយថា៖ «តាមការស្រាវជ្រាវ គឺកម្ពុជានៅមិនទាន់មានការរៀបចំរោងចក្រកែច្នៃណាមួយដែលមានកម្រិត ISO នៅឡើយទេ»៕ LA