ចម្ការកៅស៊ូ ១ កន្លែងក្នុងខេត្តកំពង់ចាម។ កម្ពុជាកំពុងជំរុញឱ្យខ្សែចង្វាក់តម្លៃកៅស៊ូធម្មជាតិ កាន់តែមាននិរន្តរភាព។ ហុង មិនា
មណ្ឌលគិរីៈ ក្រសួងកសិកម្ម និងសង្គមស៊ីវិលកំពុងរួមគ្នាធ្វើឱ្យប្រសើរឡើងនូវខ្សែចង្វាក់តម្លៃកៅស៊ូធម្មជាតិ ដើម្បីធ្វើឱ្យការផលិតកៅស៊ូនៅកម្ពុជាកាន់តែមាននិរន្តរភាព និងជំរុញកំណើនសេដ្ឋកិច្ច ខណៈកាលពីឆ្នាំ ២០២១ កម្ពុជាបាននាំចេញកៅស៊ូក្នុងតម្លៃជាង ៦១០ លានដុល្លារ កើន ២៦ ភាគរយធៀបឆ្នាំ ២០២០។ ទិន្នន័យពីអគ្គនាយកដ្ឋានកៅស៊ូបង្ហាញថា ចាប់ពីខែមករា ដល់ខែធ្នូ ឆ្នាំ ២០២១ កម្ពុជារកចំណូលបានប្រមាណ ៦១១,៧៧ លានដុល្លារពីការនាំចេញជ័រកៅស៊ូ និងឈើកៅស៊ូក្នុងនោះបរិមាណជ័រកៅស៊ូមានចំនួន ៣៦៦,៣០០ តោន ស្មើនឹងទឹកប្រាក់ ៦១០,២៥ លានដុល្លារ និងឈើកៅស៊ូសម្រេចបាន ៤៥៤ ម៉ែត្រគុប មានទឹកប្រាក់ ១,៥១ លានដុល្លារ។
ដើម្បីរក្សាកំណើននេះអគ្គនាយកដ្ឋានកៅស៊ូនៃក្រសួងកសិកម្មបាននិងកំពុងស្វែងរកការសហការជាមួយនឹងសង្គមស៊ីវិល និងអ្នកដាំដុះកៅស៊ូនៅតាមបណ្តាខេត្តមួយចំនួន ដើម្បីជំរុញឱ្យការផលិតកៅស៊ូមានស្ថិរភាពតម្លៃ និងបង្កើនការផលិតកៅស៊ូធម្មជាតិប្រកបដោយនិរន្តរភាព។
ក្នុងសិក្ខាសាលាស្តីពីភាពជាដៃគូពហុភាគីលើខ្សែចង្វាក់តម្លៃកៅស៊ូធម្មជាតិប្រកបដោយនិរន្តរភាពកាលពីថ្ងៃទី ១៥ ខែកុម្ភៈ នៅខេត្តមណ្ឌលគិរី លោក ផេង មុត្ថាវី ប្រធាននាយកដ្ឋានអភិវឌ្ឍន៍កៅស៊ូនៃអគ្គនាយកដ្ឋានកៅស៊ូ បានប្រាប់ថា ក្រសួងមានមោទនភាពដែលបានឃើញវិស័យកៅស៊ូធម្មជាតិនៅកម្ពុជាបានបោះជំហានទៅមុខមួយយ៉ាងសំខាន់ក្នុងការប្តេជ្ញាចិត្តចំពោះភាពជាដៃគូពហុភាគីសម្រាប់ខ្សែចង្វាក់តម្លៃកៅស៊ូធម្មជាតិប្រកបដោយនិរន្តរភាព។
លោកនិយាយថា៖ «កៅស៊ូត្រូវបានចាត់ទុកជាមាសស ហើយផលិតកម្មកៅស៊ូជាឧស្សាហកម្មដ៏សំខាន់មួយដែលត្រូវបានរដ្ឋាភិបាលយកចិត្តទុកដាក់ខ្ពស់ បន្ទាប់ពីផលិតកម្មស្រូវ និងជាដំណាំយុទ្ធសាស្ត្រដែលបាននាំមកនូវអត្ថប្រយោជន៍ជាច្រើនដល់សេដ្ឋកិច្ចជាតិ សង្គម និងបរិស្ថាន ពិសេសរួមចំណែកក្នុងការបង្កើនប្រាក់ចំណូលដល់គ្រួសារកសិករ បង្កើតការងារ និងមុខរបរនៅតំបន់ទីជនបទ ហើយចូលរួមកាត់បន្ថយការធ្វើចំណាកស្រុក»។
លោក សេង ទៀក នាយកអង្គការ WWF បានប្រាប់ថា នេះជាលទ្ធផលនៃកិច្ចខិតខំប្រឹងប្រែងរបស់គ្រប់ភាគីពាក់ព័ន្ធដែលធ្វើឱ្យអាចឈានមកដល់ចំណុចបច្ចុប្បន្ននេះ។ តួអង្គពាក់ព័ន្ធសំខាន់ៗទាំងអស់មានទាំងវិស័យសាធារណៈ ឯកជន សហគមន៍មូលដ្ឋាន ក្រុមអ្នកស្រាវជ្រាវ និងសង្គមស៊ីវិល។
លោកថ្លែងថា៖ «យើងពិតជាដឹងថា នៅមានកិច្ចការចំពោះមុខជាច្រើនទៀតដែលកំពុងរង់ចាំ ប៉ុន្តែតាមរយៈសិក្ខាសាលានេះយើងបានបញ្ជ្រាបខ្លឹមសារដ៏សំខាន់មួយនោះ គឺភាពជាដៃគូពហុភាគី។ វាគឺជាវេទិការួមរបស់ភាគីពាក់ព័ន្ធចម្រុះដែលរួមគ្នាផ្តោតការយកចិត្តទុកដាក់ចំពោះការធ្វើសកម្មភាពរួម ដើម្បីកំណើនសេដ្ឋកិច្ចបៃតងប្រកបដោយបរិយាប័ន្ន»។
លោកបន្ថែមថា ដំណើរការនៃភាពជាដៃគូពហុភាគីដែលប្រព្រឹត្តទៅយ៉ាងសកម្ម នឹងអាចគាំទ្រដល់តម្លាភាព និងការតាមដាននៃខ្សែចង្វាក់ផ្គត់ផ្គង់កៅស៊ូ ក៏ដូចលើកកម្ពស់ការអនុវត្តធុរកិច្ចដោយនិរន្តរភាព និងយុត្តិធម៌ ព្រមទាំងបង្កើនទិន្នផលកៅស៊ូ។
លោក Ben Corrigan អ្នកសម្របសម្រួលគម្រោងប្រចាំតំបន់សម្រាប់អង្គការ Welthungerhilfe បាននិយាយថា វេទិកានេះមានសារៈសំខាន់ចំពោះភាពជាដៃគូយុទ្ធសាស្ត្ររបស់អង្គការជាមួយបណ្តាញរបស់ WWF ហើយវាក៏ជាការបោះជំហានមួយមិនត្រឹមតែសម្រាប់ប្រទេសកម្ពុជាប៉ុណ្ណោះទេ ប៉ុន្តែសម្រាប់កម្មវិធីក្នុងតំបន់អាស៊ី-អាគ្នេយ៍ផងដែរ។
លោកបន្ថែមថា៖ «ខ្ញុំមានទំនុកចិត្តថាយើងអាចកំណត់ និងជំរុញឱ្យមានការអនុវត្តយន្តការដំណោះស្រាយរួមសម្រាប់កៅស៊ូធម្មជាតិប្រកបដោយនិរន្តរភាពបាន ដោយយើងប្រមែប្រមូលដាក់បញ្ចូលគ្នានូវធនធាន និងសមត្ថភាពជំនាញពីដៃគូរដ្ឋាភិបាល វិស័យឯកជន អង្គការសង្គមស៊ីវិល អ្នកពាក់ព័ន្ធក្នុងខ្សែចង្វាក់ឧស្សាហកម្ម ព្រមទាំងពីក្រុមកសិករកៅស៊ូគ្រួសារ»។
លោកបានបន្តថា ក្រុមសមាជិកនៃសហគមន៍កសិកម្មកៅស៊ូគ្រួសារស្រុកពេជ្រាដា ពិតជាមានសារៈសំខាន់ក្នុងការដំណើររៀបចំនេះ ព្រោះពួកគាត់ជាផ្នែកមួយនៃក្រុមអ្នកផលិតទិន្នផលកៅស៊ូ ៨៥ ភាគរយនៃទិន្នផលកៅស៊ូសរុប ជាពិសេសសម្រាប់ផ្គត់ផ្គង់ដល់ឧស្សាហកម្មផលិតរថយន្ត៕
