.jpg)
ដូងខ្ទិះបាត់ដំបង ដែលរសជាតិរបស់វាត្រូវបានគេនិយមចូលចិត្ត។ រូបថត សហការី
បាត់ដំបងៈ ក្រសួងពាណិជ្ជកម្មបានសម្រេចជ្រើសរើស «ដូងខ្ទិះបាត់ដំបង» ដើម្បីចុះបញ្ជីម៉ាកសមូហភាពនាពេលខាងមុខ ខណៈការចុះបញ្ជីនេះនឹងជួយធានានិរន្តរភាព ក៏ដូចជារក្សាបាននូវអត្ថប្រយោជន៍ដល់ប្រជាកសិករ និងប្រជាពលរដ្ឋក្នុងមូលដ្ឋាន ព្រមទាំងរួមចំណែកផ្សព្វផ្សាយពីទំនៀមទម្លាប់វប្បធម៌ និងប្រពៃណីក្នុងតំបន់ទៅកាន់ឆាកអន្តរជាតិ។
ក្នុងសិក្ខាសាលាពិគ្រោះយោបល់ស្តីពីការកសាងកេរ្តិ៍ឈ្មោះម៉ាកសមូហភាព «ដូងខ្ទិះបាត់ដំបង» នៅខេត្តបាត់ដំបងកាលពីថ្ងៃទី ៧ កុម្ភៈ ឆ្នាំ ២០២២ លោក សួន វិជ្ជា ប្រធានលេខាធិការដ្ឋាននៃគណៈកម្មាធិការជាតិគ្រប់គ្រងកម្មសិទ្ធិបញ្ញា និងជាប្រធាននាយកដ្ឋានកម្មសិទ្ធិបញ្ញាបានលើកឡើងថា ការជ្រើសរើសយក «ដូងខ្ទិះបាត់ដំបង» គឺដើម្បីទាញប្រយោជន៍ជាអតិបរមាពីផលិតផលសក្តានុពលក្នុងខេត្តនីមួយៗដោយ ទី១ ជំរុញផលិតកម្មកសិកម្មទៅជាកសិពាណិជ្ជកម្មដែលអាចផ្គត់ផ្គង់បរិមាណច្រើន ទី ២ លើកកម្ពស់កសិឧស្សាហកម្មដើម្បីជំរុញការកែច្នៃ ផ្តល់នូវតម្លៃបន្ថែមខ្ពស់ និងពិពិធកម្មទំនិញច្រើនមុខពីផលិតផលគោលមួយមុខ និងទី ៣ កែច្នៃតំបន់ផលិតកម្មដាំដុះទៅជាគោលដៅទេសចរណ៍បែបកសិទេសចរណ៍ ដើម្បីបង្កើតការងារ និងចំណូលបន្ថែមដល់ប្រជាពលរដ្ឋមូលដ្ឋាន ស្របតាមគោលដៅយុទ្ធសាស្ត្ររបស់រាជរដ្ឋាភិបាល។
លោកបន្តថា យ៉ាងណាមិញការអភិវឌ្ឍវិស័យទាំងនេះត្រូវការកត្តាមួយមិនអាចខ្វះបាន គឺការកសាងកេរិ៍្តឈ្មោះផលិតផលលើទីផ្សារដែលអតិថិជនងាយកត់សម្គាល់ និងការកសាងទំនុកចិត្តដល់អ្នកប្រើប្រាស់តាមរយៈការប្រើប្រាស់ច្បាប់កម្មសិទ្ធិបញ្ញាដើម្បីការពារកម្មសិទិ្ធបញ្ញាស្របច្បាប់របស់ម្ចាស់សិទ្ធិដែលអាចជា បុគ្គលឯកជន ក្រុមហ៊ុន ឬសមាគមក្នុងការប្រើប្រាស់កម្មសិទ្ធិបញ្ញាជាក់លាក់ណាមួយ ដូចជា ការប្រើប្រាស់ម៉ាកសមូហភាព។
លោកថ្លែងថា៖ «ត្រង់ចំណុចនេះ ខ្ញុំសូមបញ្ជាក់ថា ដោយសារកំណើននៃផលិតផលលើទីផ្សារកាន់តែសម្បូរបែបទាំងផលិតផលក្នុងស្រុក និងផលិតផលនាំចូល បានធ្វើឱ្យចំនួននៃការចុះបញ្ជីម៉ាកនៅនាយកដ្ឋានកម្មសិទ្ធិបញ្ញានៃក្រសួងពាណិជ្ជកម្មកើនដល់ប្រមាណ ១០ ម៉ឺនម៉ាក ដែលឆ្លុះបញ្ចាំងឱ្យឃើញពីសារៈសំខាន់យ៉ាងខ្លាំងនៃម៉ាកសម្គាល់ផលិតផល»។
បើតាម លោក វិជ្ជា ដោយមើលឃើញពីលក្ខណពិសេសនៃដូងខ្ទិះបាត់ដំបង និងសក្តានុពលនៃការផ្សារភ្ជាប់ផលិតផលនេះជាមួយទីផ្សារដែលជាការចូលរួមបង្កើនចំណូលប្រជាពលរដ្ឋមូលដ្ឋាន ហើយដូងខ្ទិះបាត់ដំបងអាចជាសក្តានុពលនៅក្នុងការស្រូបទាញការវិនិយោគផ្នែកឧស្សាហកម្មចំណីអាហារផងដែរ។
លោក សឿម ប៊ុនរិទ្ធិ អភិបាលរងខេត្តបាត់ដំបងបានប្រាប់ភ្នំពេញប៉ុស្តិ៍នៅថ្ងៃទី ៩ ខែកុម្ភៈ ថា នៅខេត្តបាត់ដំបងមានស្រុកមួយចំនួនដូចជា ស្រុកសង្កែ និងស្រុកឯកភ្នំ ដែលនៅជាប់ក្រុងបាត់ដំបងមានប្រជាពលរដ្ឋតាំងពីដូនតាមកបានដាំដូងខ្ទិះច្រើន ដូច្នេះក្រសួងពាណិជ្ជកម្មក៏សម្រេចជ្រើសរើស «ដូងខ្ទិះបាត់ដំបង» នេះដើម្បីចុះបញ្ជីម៉ាកសមូហភាព សម្រាប់សម្គាល់ម៉ាកភូមិសាស្ត្ររបស់ខេត្ត។
លោកថ្លែងថា៖ «និយាយទៅដូងខ្ទិះ មិនមែនដាំឥឡូវទេ គឺគេដាំតាំងពីជីដូនជីតារហូតមក។ វាមានអាយុកាលយូរហើយ ដូងនេះវាមានខ្ទិះឡើងខ្លាំងមិនដូចកន្លែងផ្សេងទេ»។
បើតាម លោក ប៊ុនរិទ្ធិ សម្រាប់ខេត្តបាត់ដំបងមិនមែនលើកទី ១ ទេដែលក្រសួងពាណិជ្ជកម្មជ្រើសរើសផលិតផលរបស់ខេត្ត «ដូងខ្ទិះបាត់ដំបង» សម្រាប់ការចុះបញ្ជីម៉ាកសម្គាល់បែបនេះ ដោយកន្លងមកក៏មានផលិតផលផ្សេងទៀតដែរដែលត្រូវបានចុះបញ្ជី។ ជាមួយគ្នានេះ ខេត្តក៏មានផលិតផលម្នាស់ នៅស្រុកមោងឫស្សី និងស្រុករុក្ខគិរីមានរសជាតិឈ្ងុយឆ្ងាញ់ ដែលក្រសួងពាណិជ្ជកម្មក៏កំពុងពិនិត្យ និងត្រៀមចុះបញ្ជីម៉ាកសមូហភាពដែរ។
លោកបន្តថា បន្ទាប់ពីចុះបញ្ជីម៉ាកសម្គាល់នេះនឹងធ្វើឱ្យខេត្តកាន់តែមានភាពល្បីល្បាញ និងទាក់ទាញការវិនិយោគបន្ថែមទៀត ជាពិសេសលោកស្នើសុំឱ្យប្រជាពលរដ្ឋកុំកាប់ដើមដូងដែលជាមរតករបស់ខ្លួន និងរក្សាឱ្យបានគង់វង្ស និងបណ្តុះពូជដើម្បីដាំដុះបន្ត ដើម្បីទទួលបានផលប្រយោជន៍ខ្ពស់ព្រោះតម្លៃផ្លែដូង ១ ផ្លែមានរហូតដល់ជាង ៤ ម៉ឺនរៀល និងទាបបំផុតមានតម្លៃ ២ ម៉ឺនរៀលក្នុង ១ ផ្លែ។
របាយការណ៍នាយកដ្ឋានកម្មសិទ្ធិបញ្ញាឱ្យដឹងថា នាយកដ្ឋានកំពុងធ្វើការយ៉ាងជិតស្និទ្ធ និងយកចិត្តទុកដាក់បំផុតក្នុងការពង្រឹងសមត្ថភាពសហគ្រាសធុនតូច និងមធ្យម សហគមន៍កសិកម្ម សមាគម ឱ្យប្រើប្រាស់កម្មសិទ្ធិបញ្ញា ដើម្បីជំរុញ ផ្សព្វផ្សាយ អភិវឌ្ឍអាជីវកម្ម និងផលិតផលរបស់ខ្លួនតាមរយៈគម្រោងកសាងកេរ្តិ៍ឈ្មោះម៉ាក ព្រមទាំងបានចុះបញ្ជីម៉ាកសម្គាល់ភូមិសាស្ត្រទំនិញសក្តានុពល ដូចជា ម្រេចកំពត ស្ករត្នោតកំពង់ស្ពឺ ក្រូចត្លុងកោះទ្រង់ ទឹកឃ្មុំព្រៃមណ្ឌលគិរី និងគ្រោងចុះបញ្ជីម៉ាកសម្គាល់ភូមិសាស្ត្រទំនិញបន្ថែមទៀត ដូចជា «អំបិល និងផ្កាអំបិលកំពត» «បង្កងតាកែវ» និង «ទឹកត្រីកំពត»។
របាយការណ៍នេះបន្តថា ក្រៅពីម៉ាកសម្គាល់ភូមិសាស្ត្រទំនិញ នាយកដ្ឋានកម្មសិទ្ធិបញ្ញាក៏បានចុះបញ្ជីម៉ាកសមូហភាព «គុយទាវភ្នំពេញ, អំបុកកំពង់ធំ, និងអង្ករព្រះវិហារ» និងគ្រោងចុះបន្ថែមម៉ាកសមូហភាពដូចជា «ចម្លាក់ប្រាក់ស្ពាន់ខេត្តកណ្តាល, ក្រូចពោធិ៍សាត់ និងនំបញ្ចុកសៀមរាប»។ ភាពជោគជ័យក្នុងការកសាងម៉ាកសម្គាល់ភូមិសាស្ត្រទំនិញ ម៉ាកសមូហភាពនាពេលកន្លងមក បានធ្វើឱ្យផលិតផលកម្ពុជាជាច្រើនអាចឈានចូលទីផ្សារអន្តរជាតិ និងមានឈ្មោះល្បីជាខ្លាំង ដូចជា ម្រេចកំពត គុយទាវភ្នំពេញ និងស្ករតោ្នតកំពង់ស្ពឺ។ ផលិតផលទាំងនេះមិនត្រឹមតែទទួលបានថ្លៃខ្ពស់ប៉ុណ្ណោះទេ ប៉ុន្តែក្លាយជាផលិតផលរួមចំណែកផ្សព្វផ្សាយនូវសក្តានុពលទេសចរណ៍របស់ខេត្ត វប្បធម៌ប្រពៃណី ទំនៀមទម្លាប់ប្រវត្តិសាស្ត្រកម្ពុជានៅលើឆាកអន្តរជាតិផងដែរ៕ LA
វីដេអូ៖
