ភ្នំពេញៈ សមាគមមីក្រូហិរញ្ញវត្ថុកម្ពុជា (CMA) និងក្រុមហ៊ុនក្រេឌីត ប្យួរ៉ូ ខេមបូឌា (CBC) រួមគ្នាបញ្ចេញថវិកាចំនួន ២ លានដុល្លារសម្រាប់គម្រោងលើកកម្ពស់បរិយាប័ន្នហិរញ្ញវត្ថុនៅកម្ពុជា ស្របតាមយុទ្ធសាស្ត្រថ្នាក់ជាតិស្តីពីបរិយាប័ន្នហិរញ្ញវត្ថុឆ្នាំ ២០១៩- ២០២៥ របស់ធនាគារជាតិនៃកម្ពុជា។
ពិធីចុះអនុស្សរណៈយោគយល់គ្នារវាងស្ថាប័នទាំង ២ ត្រូវបានធ្វើឡើងក្នុងមហាសន្និបាតប្រចាំឆ្នាំលើកទី ១៦ និងវេទិកាប្រចាំឆ្នាំលើកទី ២ ស្តីពីការពង្រឹងភាពធន់ និងនិរន្តរភាពនៃវិស័យមីក្រូហិរញ្ញវត្ថុនៅកម្ពុជា កាលពីថ្ងៃសុក្រសប្តាហ៍មុន។
គម្រោងលើកកម្ពស់បរិយាប័ន្នហិរញ្ញវត្ថុនៅកម្ពុជា ដែលមានទឹកប្រាក់ ២ លានដុល្លារនេះនឹងត្រូវប្រើប្រាស់សម្រាប់រយៈពេល ៥ ឆ្នាំ ដោយ CMA ចំណាយថវិកា ១,២ លានដុល្លារ ខណៈ CBC ចូលថវិកាបដិភាគ ជិត ១ លានដុល្លារ។ បរិយាប័ន្នហិរញ្ញវត្ថុ គឺសំដៅលើលទ្ធភាពទទួលបាន និងប្រើប្រាស់សេវាហិរញ្ញវត្ថុផ្លូវការទាន់ពេលវេលាស្របតាមតម្រូវការ មានតម្លៃសមរម្យ និងមានការការពារតាមផ្លូវច្បាប់។
លោក សុខ វឿន ប្រធានក្រុមប្រឹក្សាភិបាល CMA បានថ្លែងថា៖ «គម្រោងបរិយាប័ន្នហិរញ្ញវត្ថុប្រកបដោយការទទួលខុសត្រូវដំណាក់កាលទី ២ នឹងផ្តោតអាទិភាពលើកិច្ចការលើកកម្ពស់ចំណេះដឹងហិរញ្ញវត្ថុក្នុងចំណោមប្រជាជនកម្ពុជា លើកកម្ពស់តួនាទីរបស់វិស័យមីក្រូហិរញ្ញវត្ថុ និងការពង្រឹងភាពធន់នៃវិស័យមីក្រូហិរញ្ញវត្ថុ ដោយសម្របតាមយុទ្ធសាស្ត្របរិយាប័ន្នហិរញ្ញវត្ថុថ្នាក់ជាតិ ខណៈដែលសមាគមក៏បានរៀបចំយុទ្ធសាស្ត្រ ៥ ឆ្នាំរបស់ខ្លួនឱ្យស្របតាមយុទ្ធសាស្ត្រថ្នាក់ជាតិផងដែរ»។
លោក អឿ សុធារ័ត្ន ប្រធាននាយកប្រតិបត្តិ CBC បានឱ្យដឹងថា ក្នុងនាមក្រុមហ៊ុនឈានមុខគេក្នុងការផ្តល់នូវសេវាព័ត៌មានហិរញ្ញវត្ថុ ឧបករណ៍វិភាគទិន្នន័យ និងរបាយការណ៍ឥណទានទៅដល់ស្ថាប័នហិរញ្ញវត្ថុទាំងអស់នៅក្នុងប្រទេសកម្ពុជា CBC បានប្តេជ្ញាក្នុងការជំរុញបរិយាប័ន្នហិរញ្ញវត្ថុនៅកម្ពុជាតាមរយៈការចូលរួមថវិកាបដិភាគជិត ១ លានដុល្លារសម្រាប់រយៈពេល ៥ ឆ្នាំ ដោយថវិកានេះនឹងត្រូវដាក់ចូលរួមគ្នាជាមួយសមាគមមីក្រូហិរញ្ញវត្ថុកម្ពុជាក្នុងគម្រោងបរិយាប័ន្នហិរញ្ញវត្ថុប្រកបដោយការទទួលខុសត្រូវ ដំណាក់កាលទី ២។
លោកនិយាយថា៖ «CBC តែងជួយគាំទ្រយ៉ាងសកម្មដល់សកម្មភាពផ្សេងៗរបស់សមាគមមីក្រូហិរញ្ញវត្ថុកម្ពុជា និងបរិយាប័ន្ននៅកម្ពុជា ក៏ដូចជាការអភិវឌ្ឍវិស័យហិរញ្ញវត្ថុទាំងមូលរបស់កម្ពុជា»។
លោក កាំង តុងងី អ្នកនាំពាក្យ CMA បានប្រាប់ភ្នំពេញ-ប៉ុស្តិ៍បន្ថែមកាលពីថ្ងៃទី ១៦ ខែកុម្ភៈថា គម្រោងបរិយាប័ន្នហិរញ្ញវត្ថុប្រកបដោយការទទួលខុសត្រូវដំណាក់កាលទី ១ បានធ្វើចាប់ពីឆ្នាំ ២០១៩-២០២១ ដែលផ្តោតសំខាន់លើការអប់រំចំណេះដឹងផ្នែកហិរញ្ញវត្ថុដល់អតិថិជន ការបញ្ជ្រាបយន្តការការពារអតិថិជន និងបានធ្វើកិច្ចការជាច្រើនទៀតក្នុងបំណងធ្វើឱ្យវិស័យនេះមានភាពរឹងមាំប្រកបដោយនិរន្តរភាព។
លោក តុងងី បានបញ្ជាក់ថា៖ «នៅក្នុងគម្រោងទី ២ ដំណាក់កាលទី ២ នេះដែលយើងគ្រោងលុយ ២ លានដុល្លារនេះ យើងនឹងបន្តផ្តោតលើ ៣ ផ្នែកសំខាន់ៗ ទី១ ផ្តោតលើការផ្តល់សិទ្ធិអំណាចដល់អតិថិជនតាមរយៈចំណេះដឹងហិរញ្ញវត្ថុ, ទី ២ ផ្តោតទៅលើយន្តការការពារអតិថិជន ដោយធ្វើទៅលើ ២ ផ្នែក ទាំងអ្នកផ្តល់សេវា និងអ្នកទទួលសេវា ដើម្បីធានាតម្លាភាព ការទទួលខុសត្រូវ ហើយអតិថិជនរបស់យើងគាត់នឹងយល់ពីសិទ្ធិកាតព្វកិច្ចរបស់គាត់, និងទី ៣ នឹងផ្តោតលើការកសាងបណ្តាញទំនាក់ទំនងភាពជាដៃគូ និងពង្រឹងសេវាកម្មរបស់សមាជិក CMA ផងដែរ»៕ LA