ភ្នំពេញៈ សិង្ហបុរី​មានបំណង​ចង់​វិនិយោគ​ទៅលើ​ឃ្លាំង​ស្តុក​ទំនិញ​ត្រជាក់​នៅ​កម្ពុជា ខណៈ​វិស័យ​កសិកម្ម​កំពុង​ត្រូវការ​ឃ្លាំង​ត្រជាក់​ជា​ចាំបាច់ ដើម្បី​រក្សាទុក​ផលិតផល​ដោយ​សុវត្ថិភាព និង​គុណភាព​សម្រាប់​ជំរុញ​ការនាំចេញ​។

ក្នុង​ជំនួប​ជាមួយ​លោក ហ៊ុន សែន នាយករដ្ឋមន្ត្រី​នៃ​កម្ពុជា​កាលពី​ថ្ងៃទី ​១៦ ខែកុម្ភៈ ឆ្នាំ​ ២០២២ នៅ​វិមាន​សន្តិភាព លោក Vivian Balakrishnan រដ្ឋមន្ត្រី​ក្រសួងការបរទេស​សិង្ហបុរី និង​ក្រុម​វិនិយោគិន​សិង្ហបុរី​បានបង្ហាញ​ពី​ចំណាប់អារម្មណ៍​ក្នុងការ​ចូលមក​បណ្តាក់​ទុន​នៅ​កម្ពុជា ជាពិសេស​ការវិនិយោគ​លើ​ឃ្លាំង​ស្តុក​ទំនិញ​ត្រជាក់ ក៏ដូចជា​វិស័យ​ដឹកជញ្ជូន​ផងដែរ ដើម្បី​ពង្រីង​កិច្ចសហប្រតិបត្តិការ​ទ្វេភាគី​រវាង​ប្រទេស​ទាំង​ ២ ​បន្ថែមទៀត​។

រដ្ឋមន្ត្រី​ក្រសួង​កសិកម្ម រុក្ខាប្រមាញ់ និង​នេសាទ លោក វេង សាខុន បាន​ប្រាប់​ភ្នំពេញ​ប៉ុស្តិ៍​ថា ការចាប់អារម្មណ៍​ការវិនិយោគ​ឃ្លាំង​ស្តុក​ទំនិញ​ត្រជាក់​នៅ​កម្ពុជា​ពី​វិនិយោគិន​សិង្ហបុរី គឺជា​ចំណុច​ដ៏ល្អ ដែល​ក្រសួងកសិកម្ម​តែង​ចង់បាន ព្រោះ​នៅពេល​អនាគត ក្រសួង​ចង់បាន​ឃ្លាំង​ត្រជាក់​ដែល​អាចជួយ​សម្រួល​ដល់​ដំណើរការ​បង្កក​ត្រី​សាច់ ដើម្បី​កាត់បន្ថយ​ហានិភ័យ​ចំពោះ​សុខភាព​។

លោក​បន្ថែមថា ដើម្បី​អាច​នាំចេញ​ផលិតផល​កែច្នៃ​ពី​ត្រី សាច់ ទៅ​ក្រៅប្រទេស​បាន នាពេល​ខាងមុខ វិស័យ​ឯកជន​នៅក្នុង​ផ្នែក​នេះ​ត្រូវតែ​មាន​ឃ្លាំង​ត្រជាក់​រៀងៗ​ខ្លួន និង​វេចខ្ចប់​ឱ្យបាន​ត្រឹមត្រូវ​តាម​ស្តង់ដា​។ ទោះយ៉ាងណា ការអនុវត្ត​នេះ​នៅមាន​ភាពយឺតយ៉ាវ​ដោយសារ​តែ​តម្លៃ​អគ្គិសនី​នៅ​ខ្ពស់​។

លោក​រដ្ឋមន្ត្រី​បាន​បញ្ជាក់ថា​៖ «​កន្លងទៅ​មាន​ក្រុមហ៊ុន​ឯកជន​មួយ​ដែលមាន​ឈ្មោះ​មេគង្គ​អ៊ិចប្រេស​បាន​វិនិយោគ​សាងសង់​ឃ្លាំង​ត្រជាក់​នេះ ដែលមាន​សីតុណ្ហភាព​រហូតដល់ -៣០ ​អង្សាសេ​មាន​ទីតាំងនៅ​តំបន់​ចោមចៅ រាជធានី​ភ្នំពេញ​ដោយ​ឃ្លាំង​នេះ​នឹង​អាច​ស្តុក​ទុក​ផលិត​កសិកម្ម ដើម្បី​នាំចេញ​ទៅកាន់​ប្រទេស​ជប៉ុន​។ ប៉ុន្តែ​មានការ​រអាក់រអួល​ខ្លះ ដោយ​អគ្គិសនី​មិន​ប្រក្រតី ក្រោយមក​ក៏​ប្រែ​ទៅជា​ឃ្លាំង​ស្តុក​សម្ភារ​វិញ​»​។

លោក​បន្តថា ឃ្លាំង​ត្រជាក់​ដើរតួនាទី​យ៉ាងសំខាន់​ក្នុង​ការរក្សា​សុវត្ថិភាព និង​គុណភាព​ទំនិញ​កសិកម្ម ពិសេស​ប្រភេទ​ត្រី សាច់ ព្រោះ​មុននឹង​អាច​នាំចេញ​សាច់សត្វ​ទាំងអស់​បាន​គឺ​ត្រូវ​បង្កក​វា​ជាមុនសិន​។ លោក​ថា បច្ចុប្បន្ន​កម្ពុជា​មាន​លទ្ធភាព​ក្នុង​ការផ្គត់ផ្គង់​សាច់សត្វ​ក្នុងស្រុក​បាន​ហើយ ដែល​អាច​នាំ​ចេញទៅ​ក្រៅប្រទេស​ឆាប់ៗ​ដែរ ដូចនេះ​ទើប​កម្ពុជា​ត្រូវការ​ឃ្លាំង​ត្រជាក់​កាន់​ច្រើន ដើម្បី​ជំរុញ​ការងារ​ឱ្យទទួល​បាន​ភាពជោគជ័យ​។

លោក ហ៊ុន ឡាក់ អគ្គនាយក​ក្រុមហ៊ុន រីចហ្វាម អេស៊ា ដែល​វិនិយោគ​លើ​វិស័យ​កសិកម្ម បាន​ឱ្យដឹងថា កន្លងមក​មិនសូវមាន​ការវិនិយោគ​ក្នុងការ​សាងសង់​ឃ្លាំង​ត្រជាក់ ឬ​ទូ​កុងតឺន័រ​ដឹកជញ្ជូន​ដែលមាន​ប្រព័ន្ធ​ត្រជាក់​នេះ​ទេ ដោយសារ​ផលិតផល​ស្រស់​ដូចជា ផ្លែឈើ និង​សាច់​ស្រស់​ជាដើម​នៅមាន​កម្រិត ខណៈដែល​តម្លៃ​អគ្គិសនី​ក៏មាន​កម្រិត​ខ្ពស់ មិនអាច​ប្រកួតប្រជែង​ជាមួយ​ប្រទេស​ជិតខាង​បាន​។

លោក​លើកឡើង​ថា​៖ «​មាន​បញ្ហា​ប្រឈម​មួយ​គឺ​តម្លៃ​ភ្លើង ខណៈ​ការប្រើប្រាស់​ឃ្លាំង​ត្រជាក់​នេះ គឺ​ត្រូវ​ចំណាយ​ថ្លៃដើម​ច្រើន ដូចនេះ​ដើម្បី​អភិវឌ្ឍ​លើ​ការបង្កើត​ឃ្លាំង​ត្រជាក់​នេះ​បាន គឺត្រូវធ្វើ​យ៉ាងណា​ឱ្យ​តម្លៃ​នៃ​ការទុកដាក់​នៅក្នុង​ឃ្លាំង​ត្រជាក់ មាន​តម្លៃ​សមរម្យ​ប្រហាក់​ប្រហែល​នឹង​ប្រទេសជិតខាង​ទើប​យើង​អាច​ជំរុញ​កំណើន​នៃ​ការនាំចេញ​បាន​»​។

កាលពី​ខែវិច្ឆិកា ឆ្នាំ​ ២០២១ ក្រសួង​សេដ្ឋកិច្ច និង​ហិរញ្ញវត្ថុ សហការ​ជាមួយ​ក្រុមហ៊ុន​ដៃគូ​ដែលមាន​មូលដ្ឋាន​នៅ​ប្រទេស​សិង្ហបុរី ដោយ​មាន​ការចូលរួម​ពី​ភាគី​ពាក់ព័ន្ធ​បាន​បើក​កិច្ចប្រជុំ ពិភាក្សា​លើ​ករណី​សំណើ​រៀបចំ​អភិវឌ្ឍ​គម្រោង​ឃ្លាំង​ត្រជាក់​នៅ​កម្ពុជា ដើម្បី​ជំរុញ​ការនាំចេញ​ផលិតផល​កសិកម្ម​ទៅ​លក់​នៅ​ទីផ្សារ​អន្តរជាតិ និង​លើកកម្ពស់​ស្តង់ដា​អនាម័យ​ចំណីអាហារ និង​ធ្វើឱ្យ​ប្រសើរឡើង​ប្រព័ន្ធ​ទីផ្សារ​ក្នុងស្រុក​៕ LA