ភ្នំពេញៈ បរិមាណនៃការនាំចេញ-នាំចូលទំនិញរបស់បណ្តារោងចក្រសហគ្រាសក្នុងតំបន់សេដ្ឋកិច្ចពិសេសក្រុងព្រះសីហនុ (SSEZ) រយៈពេល ១ ខែដើមឆ្នាំ ២០២២ នៅបន្តរក្សាបានភាពល្អប្រសើរ ដោយមានតម្លៃជាង ២១៧ លានដុល្លារ កើន ៤៥ ភាគរយបើធៀបនឹងរយៈពេលដូចគ្នាឆ្នាំ ២០២១។
ទិន្នន័យទើបចេញផ្សាយពី SSEZ ឱ្យដឹងថា ក្នុងខែមករា ឆ្នាំ ២០២២ ទឹកប្រាក់បានពីការនាំចេញ-ចូលទំនិញរបស់សហគ្រាសនៅក្នុងតំបន់សេដ្ឋកិច្ចពិសេសក្រុងព្រះសីហនុមានចំនួនសរុប ២១៧ លានដុល្លារ កើនឡើង ៤៥,៦៤ ភាគរយ បើធៀបនឹងខែមករា ឆ្នាំ ២០២១ ដែលមានចំនួន ១៤៩ លានដុល្លារ។ ទោះយ៉ាងណា ទិន្នន័យនេះមិនបានបង្ហាញពីចំនួនដាច់ដោយឡែកនៃទឹកប្រាក់នាំចេញ និងនាំចូលនោះទេ។
SSEZ បញ្ជាក់ថា៖ «ក្នុងខែដំបូងឆ្នាំនេះ សហគ្រាសនៅតំបន់សេដ្ឋកិច្ចពិសេសក្រុងព្រះសីហនុបានទទួលលទ្ធផលដ៏ល្អ ហើយបន្តរក្សាកំណើននៅតែមិនផ្លាស់ប្តូរ»។
យោងតាម SSEZ ចំនួនរោងចក្រដែលបើកដំណើរការក្នុងទីតាំងរបស់ខ្លួនមានកំណើនជាបន្តបន្ទាប់ ជាក់ស្តែងចាប់ពីដើមឆ្នាំ ២០២២ មកយ៉ាងហោចណាស់មានក្រុមហ៊ុនចំនួន ៣ បានបើកការដ្ឋានសាងសង់នៅទីនោះ រួមមាន ក្រុមហ៊ុន Flying Feather (Cambodia) Wood-Industry Co.,Ltd, ក្រុមហ៊ុន Wisdom Power Technology Cambodia Co.,Ltd និងក្រុមហ៊ុន General Intelligence (Cambodia) Co., Ltd។
លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូនទំនិញកម្ពុជា (LOBA) បានប្រាប់ភ្នំពេញប៉ុស្តិ៍នាថ្ងៃទី ១៧ ខែកុម្ភៈថា ទោះបីស្ថានភាពការឆ្លងរាលដាលជំងឺកូវីដ ១៩ ពិសេសមេរោគបំប្លែងថ្មីអូមីក្រុង នៅតែបន្តការគំរាមកំហែងដល់សកម្មភាពសេដ្ឋកិច្ច-កម្ពុជា និងពិភពលោកក៏សកម្មភាពនៃការវិនិយោគថ្មីៗ និងចំនួនទឹកប្រាក់នាំចេញ-នាំចូលទំនិញរបស់តំបន់សេដ្ឋកិច្ចពិសេសក្រុងព្រះសីហនុនៅតែបង្ហាញសញ្ញាវិជ្ជមានដដែល។
លោកបានថ្លែងថា៖ «តាមព័ត៌មានខ្ញុំទទួលបានគឺចំនួនរោងចក្រថ្មីៗជាច្រើនបានទៅបណ្តាក់ទុននៅទីនោះជាបន្តបន្ទាប់ ខណៈនៅទីនោះមានលក្ខណៈអំណោយផលច្រើនសម្រាប់ការបណ្តាក់ទុន ពិសេសការដឹកជញ្ជូនតាមផ្លូវសមុទ្រ»។
បើយោងតាមលោក ចាន់ដារ៉ា ភាគច្រើននៃក្រុមហ៊ុនដែលវិនិយោគនៅ SSEZ គឺមកពីប្រទេសចិន ហើយផលិតផលដែលផលិតនៅទីនោះភាគច្រើនជាគ្រឿងសង្ហារិម ទូសម្អាង តុ ក្តាបន្ទះ កាបូប គ្រឿងអេឡិចត្រូនិក ជាដើម។ ផលិតផលនៅ SSEZ ភាគច្រើនត្រូវបាននាំចេញទៅកាន់ទីផ្សារសហគមន៍អឺរ៉ុប។
សម្រាប់ទំហំទឹកប្រាក់នាំចេញ-នាំចូលរបស់ SSEZ នឹងបន្តកើនឡើងថែមទៀតនៅក្នុងឆ្នាំ ២០២២។ នេះបើតាមលោក ចាន់ដារ៉ា។
អនុប្រធានសភាពាណិជ្ជកម្មកម្ពុជាលោក លឹម ហេង បានប្រាប់ថា ភាពវិជ្ជមាននៃការនាំចេញ-នាំចូលទំនិញរបស់ SSEZ គឺបណ្តាលមកពីកត្តាមួយចំនួនដូចជា ស្ថិរភាពនយោបាយ, ភាពសម្បូរនៃកម្លាំងពលកម្មជំនាញ និងមានតម្លៃសមរម្យ, ទំនុកចិត្តរបស់អ្នកវិនិយោគ, ច្បាប់វិនិយោគមានភាពអំណោយផល ព្រមទាំងជាទីតាំងមានលក្ខណៈអំណោយផលសម្រាប់ការដឹកជញ្ជូនទំនិញទៅទីផ្សារអន្តរជាតិផងដែរ។ បន្ថែមពីលើនេះ កម្ពុជាក៏កំពុងទទួលបានភាពវិជ្ជមាននៃការនាំ-ចេញទំនិញទៅទីផ្សារអន្តរជាតិពីវិបត្តិដែលកំពុងកើតមានតាមប្រទេសមួយចំនួនផងដែរ(នយោបាយ, វិបត្តិសុខ-ភាពបណ្តាលពីជំងឺកូវីដ១៩ និងបញ្ហាជម្លោះពាណិជ្ជកម្មរវាងប្រទេសចិន និងអាមេរិក ជាដើម)។
លោកបានអះអាងថា៖ «ជាមួយនឹងការកែលម្អច្បាប់វិនិយោគថ្មីៗ និងអត្ថប្រយោជន៍ពីកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគីដែលកម្ពុជាបានចុះហត្ថលេខា នឹងធ្វើឱ្យការនាំចេញ និងនាំចូលរបស់ SSEZ មានទឹកប្រាក់កាន់តែច្រើនបន្ថែមទៀតក្នុងឆ្នាំ ២០២២ នេះ»។
កាលពីឆ្នាំ ២០២១ ការនាំចេញ-នាំចូលទំនិញក្នុងតំបន់សេដ្ឋកិច្ចពិសេសក្រុងព្រះសីហនុមានតម្លៃ ២ ២៣៤ លានដុល្លារ កើនឡើង ៤២,៧៥ ភាគរយបើធៀបនឹងឆ្នាំ ២០២០៕ LA