.jpg)
ទិដ្ឋភាពរាជធានីភ្នំពេញនាពេលកន្លងមក។ យូសុះ អាប់ឌុលរ៉ាស់ហ៊ីម
ភ្នំពេញៈ មន្ត្រីជាន់ខ្ពស់ក្រសួងសេដ្ឋកិច្ចអះអាងថា កំណើននៃវិស័យឧស្សាហកម្មកម្មន្តសាលបានជំរុញកំណើនសេដ្ឋកិច្ចឱ្យកើនដល់ ៣ ភាគរយ ក្នុងឆ្នាំ ២០២១ ខណៈឆ្នាំ ២០២២ រំពឹងថា នឹងកើនដល់ ៥,៦ ភាគរយ និងកើនដល់៦,៥ ភាគរយក្នុងឆ្នាំ ២០២៣។
នៅក្នុងវេទិកាសាធារណៈ ស្តីពីគ្រប់គ្រងម៉ាក្រូសេដ្ឋកិច្ច និងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ ២០២២ នៅសណ្ឋាគារ សូហ្វីតែលភ្នំពេញភូគីត្រា នៅព្រឹកថ្ងៃទី ១៨ ខែកុម្ភៈនេះ លោក វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ បានលើកឡើងថា ដោយសារសមិទ្ធកម្ម ផ្នែកកម្មន្តសាលធ្វើបានល្អ ទើបធ្វើឱ្យតម្លៃបន្ថែមផ្នែកនេះ កើនដល់តែវាកើនដល់ ៨ ភាគរយ ខណៈការគ្រោងទុកត្រឹមតែ ៤,៦ ភាគរយប៉ុណ្ណោះ។
លោកបានបញ្ជាក់ថា៖ «នៅក្នុងឆ្នាំ ២០២១ ការនាំចេញក្នុងវិស័យកម្មន្តសាលឡើងដល់ ២២ ភាគរយ ដែលជាកត្តាជំរុញសេដ្ឋកិច្ចកម្ពុជា និងមានកំណើន ៣ ភាគរយ នៅឆ្នាំ ២០២១ ។ ចំណែក វិស័យកសិកម្ម យើងគ្រោង ១,៤ ប៉ុន្តែបានត្រឹម ១,១ ភាគរយ ដោយសារតែវិស័យវារីវប្បកម្មធ្លាក់ចុះខ្លាំងមែនទែន តែវិស័យដំណាំកើនឡើង ការនាំចេញវិស័យកសិកម្មឆ្នាំកន្លងទៅកើនជាង ២០ ភាគរយ ប៉ុន្តែតម្លៃបន្ថែមក្នុងវិស័យកសិកម្ម ដែលជាកំណើនសេដ្ឋកិច្ចនោះ បានតែ ១,១ ភាគរយទេ»។
ដោយឡែក ចំពោះវិស័យសេវាកម្មលោកបានបន្ថែមថា នៅមានសភាពជាប់គាំងដដែល ដោយសារវិស័យទេសចរណ៍ឆ្នាំ ២០២០ ធ្លាក់ ៨០% ហើយក្នុងឆ្នាំ ២០២១ ធ្លាក់ ៤០ ភាគរយបន្ថែមទៀត។ ចំណែកវិស័យសំណង់ឆ្នាំ ២០២០ ដក ៤ ភាគរយ ខណៈឆ្នាំ ២០២១ មានកំណើនត្រឹម ១,៤ ភាគរយ ហើយឆ្នាំ ២០២២ នេះ នឹងបន្តមានកំណើនតិចតួចវិញ។
លោកបានគូសបញ្ជាក់ថា៖«វិស័យគមនាគមន៍ និងអ៊ីនធឺណិត មានកំណើនច្រើន តែវិស័យដឹកជញ្ជូននៅពិបាកនៅឡើយវិស័យទេសចរណ៍មិនទាន់ងើប ចំណែកវិស័យលក់រាយក៏នៅមានភាពត្រដាបត្រដួសដែរ»។
មន្ត្រីជាន់ខ្ពស់រូបនេះ បានបន្តថា មានកត្តាសំខាន់ៗចំនួន ៣ ដែលធ្វើឱ្យទទួលបានលទ្ធផលបែបនេះ ទី១ការដឹកនាំរបស់រដ្ឋាភិបាល ទី២ ការចូលរួមរបស់ប្រជាពលរដ្ឋ ក្នុងការទប់ស្កាត់ការរីករាលដាល ស្របពេលកម្ពុជាមានវ៉ាក់សាំងជូនជាបន្តបន្ទាប់ និងទី៣ ការឧបត្ថម្ភ ពីមិត្តជាដៃគូតំបន់ និងអន្តរជាតិ។
លោកថា បច្ចុប្បន្ន កម្ពុជាកំពុងស្ថិតនៅដំណើរគន្លងមួយដែលងើបឡើងវិញ ប៉ុន្តែនៅជួបប្រឈមច្រើន ដែលបញ្ហាប្រឈមទាំងនោះមួយផ្នែកទាក់ទងនឹងសកល ដូចជាប្រេងឥន្ធនៈឡើងថ្លៃ និងមួយផ្នែកទៀតគឺជាបញ្ហារបស់ខ្លួនយើង ដូចជាបញ្ហាអតិផរណា។
លោក វិស្សុត បានគូសបញ្ជាក់ថា៖ «ការធ្វើពិពិធកម្មសេដ្ឋកិច្ច និងបង្កើនភាពប្រកួតប្រជែងរបស់សេដ្ឋកិច្ច នៅតែជាគន្លឹះធំបំផុត ដែលមិនអាចខ្វះបាននោះទេ។ ហើយអ្វីដែលអាចរុញឱ្យយើងធ្វើបាន គឺត្រូវដោះស្រាយ ការកែទម្រង់ត្រូវតែបន្តធ្វើ, ការអនុវត្តវិធានការគោលនយោបាយផ្សេងៗរបស់រដ្ឋាភិបាលត្រូវតែមានប្រសិទ្ធភាព ដូចនេះ យើងមិនអាចបង្កើតជន្ទល់សេដ្ឋកិច្ចថ្មីក៏មិនបាន ហើយជន្ទល់ចាស់ដុសខាត់មិនល្អ វានឹងប៉ះពាល់ដល់ការងើបឡើងនៃសេដ្ឋកិច្ចរបស់យើង។ បើមិនដូច្នោះទេ វានឹងជួបបញ្ហាទៅថ្ងៃមុខហើយយើងនឹងមិនអាចសម្រេចបាននូវកំណើន ឆ្នាំ២០២២ ៥,៦ ភាគរយ, ២០២៣ ៦,៥ ភាគរយ ២០២៤ ៧ ភាគរយនោះទេ»៕
