ភ្នំពេញៈ ក្រុមហ៊ុន Mercan Group មានមូលដ្ឋាននៅប្រទេសកាណាដាបានចុះកិច្ចព្រមព្រៀងភាពជាដៃគូជាមួយក្រុមហ៊ុនអចលនទ្រព្យ និងហិរញ្ញវត្ថុក្នុងស្រុកចំនួន ៤ ដើម្បីសហការគ្នា បង្កើតឱកាសវិនិយោគថ្មី និងទាក់ទាញវិនិយោគិនកាន់តែច្រើនចូលក្នុងទីផ្សារអចលនទ្រព្យនៅកម្ពុជា។
កាលពីថ្ងៃទី ១៨ ខែកុម្ភៈ ក្រុមហ៊ុន Zillennium Co.,Ltd(Z1 Group), Z1 Financial, Century 21 Fortuna Investment, និងក្រុមហ៊ុន Mercan Group ដែលមានមូលដ្ឋាននៅប្រទេសកាណាដា និង Mercadia Cambodia ដែលជាក្រុមហ៊ុនបុត្រសម្ព័ន្ធរបស់ខ្លួនបានចុះហត្ថលេខាលើអនុស្សរណៈនៃការយោគយល់គ្នា (MoU) លើកិច្ចសហប្រតិបត្តិការដើម្បីទាក់ទាញវិនិយោគិនពីបណ្ដារដ្ឋជាសមាជិករបស់សហភាពអឺរ៉ុបឱ្យចាក់បញ្ចូលសាច់ប្រាក់នៅក្នុងទីផ្សារអចលនទ្រព្យកម្ពុជា។
លោក Jerry Morgan ប្រធាននាយកប្រតិបត្តិ Mercan Group បានឱ្យដឹងថា ស្ថិតក្រោមការវិនិយោគរបស់ក្រុមហ៊ុនលោកគម្រោងចំនួន ៤០ កំពុងវិនិយោគនៅអាមេរិក និង ១៥ ទៀតនៅក្នុងប្រទេសព័រទុយហ្គាល់។ លោកបន្តថា៖ «ភាពជាដៃគូនេះនឹងផ្តល់លទ្ធភាពឱ្យវិនិយោគិននៅកម្ពុជាទទួលបានគម្រោងវិនិយោគដែលផ្ដល់ប្រាក់ចំណេញ»។
លោក វ៉ា វីរៈ អគ្គនាយកក្រុមហ៊ុន Century 21 Fortuna Investment បានឱ្យដឹងថា ព័រទុយហ្គាល់មិនត្រឹមតែជាប្រទេសមានសក្តានុពលខ្ពស់សម្រាប់ការវិនិយោគលើអចលនទ្រព្យប៉ុណ្ណោះទេ ប្រទេសនេះក៏ជាកន្លែងដ៏គួរឱ្យទាក់ទាញសម្រាប់ការរស់នៅផងដែរ ដោយសារប្រព័ន្ធសន្តិសុខ និងការថែទាំសុខភាពដ៏ទំនើប ហើយតម្លៃនៃការរស់នៅមានកម្រិតទាបនៅក្នុងប្លុកសហភាពអឺរ៉ុប។
លោកលើកឡើងថា៖ «ការវិនិយោគផ្នែកអចលនទ្រព្យនៅប្រទេសព័រទុយហ្គាល់គួរឱ្យទាក់ទាញ។ ជនបរទេសអាចទទួលបានប្រាក់កម្ចីរហូតដល់ ៧០ ភាគរយនៃតម្លៃអចលនទ្រព្យ និង ៣០ ភាគរយសម្រាប់ការទូទាត់លើកដំបូង។ អត្រាការប្រាក់ពិតជាគួរឱ្យចាប់អារម្មណ៍ និងមានកម្រិតទាបត្រឹម ១,២ ភាគរយក្នុងមួយឆ្នាំ»។ លោកបន្តថា៖ «កិច្ចសហប្រតិបត្តិការនេះក៏នឹងធ្វើឱ្យកាន់តែមានភាពងាយស្រួលសម្រាប់វិនិយោគិនកម្ពុជាដែលកំពុងស្វែងរកភាពជាដៃគូជាមួយក្រុមវិនិយោគិនផ្សេងទៀតមកពីបណ្ដារដ្ឋជាសមាជិកសហភាពអឺរ៉ុប ដើម្បីវិនិយោគលើវិស័យជាច្រើនប្រកបដោយសក្តានុពលរបស់កម្ពុជា។ ជាពិសេសវិស័យអចលនទ្រព្យ»។
Mercan Group គឺជាក្រុមហ៊ុនវិនិយោគផ្នែកពលករជំនាញចំណាកស្រុកឈានមុខគេ និងទទួលជោគជ័យនៅក្នុងប្រទេសកាណាដា។ ក្រុមហ៊ុននេះបានបង្កើតឡើងកាលពីឆ្នាំ ១៩៨៩ ដោយលោក Jerry Morgan។ ក្រុមហ៊ុន Mercan Capital Ltd បានក្លាយជាក្រុមហ៊ុននាំមុខគេក្នុងវិស័យពលករចំណាកស្រុក ហើយបានបង្កើតកេរ្តិ៍ឈ្មោះសម្រាប់សុចរិតភាព ភាពស្មោះត្រង់ និងប្រសិទ្ធភាព។ ក្រុមហ៊ុន Mercan Group មានក្រុមហ៊ុនចំនួន ៥ ដែលក្រុមហ៊ុននីមួយៗមានឯកទេសខាងវិស័យពលករចំណាកស្រុក ការវិនិយោគ ការអប់រំ និងការជ្រើសរើសពលករបរទេស។
ក្រុមហ៊ុនមួយនេះមានការិយាល័យកណ្តាលរបស់ខ្លួននៅទីក្រុង Montreal ប្រទេសកាណាដា ជាមួយនឹងការិយាល័យប្រចាំតំបន់នៅទូទាំងប្រទេសកាណាដា ទូទាំងអាស៊ី មជ្ឈិមបូព៌ា អឺរ៉ុប អាហ្វ្រិក និងអាមេរិក។ ជាមួយនឹងបទពិសោធជិត ៣០ ឆ្នាំក្នុងការប្រឹក្សាផ្នែកអន្តោប្រវេសន៍ ការវិនិយោគ និងការជ្រើសរើសបុគ្គលិក ក្រុមហ៊ុន Mercan Group បានបង្កើតបណ្តាញការិយាល័យអន្តរជាតិនៅក្នុងប្រទេសកាណាដា ចិន ហ្វីលីពីន ឥណ្ឌា បង់ក្លាដែស វៀតណាម អេមីរ៉ាតអារ៉ាប់រួម និងអាមេរិក ជាដើម។
យោងតាមរបាយការណ៍ធនាគារពិភពលោក វិស័យសំណង់ និងអចលនទ្រព្យ គឺជាក្បាលម៉ាស៊ីនកំណើនឈានមុខគេក្នុងរយៈជាច្រើនឆ្នាំ ដែលរួមចំណែកជាង ១ ភាគ ៣ នៃកំណើនផលិតផលក្នុងស្រុកសរុប (GDP) របស់កម្ពុជាកាលពីឆ្នាំ ២០១៩។ វិស័យនេះភាគច្រើនតំណាងដោយការវិនិយោគផ្ទាល់ពីបរទេស (FDI)។ បរិមាណ FDI នៅកម្ពុជាមានតម្លៃ ៣,៤ ពាន់លានដុល្លារកាលពីឆ្នាំ ២០១៩ ហើយបានកើនដល់ ៣,៦ ពាន់លានដុល្លារកាលពីឆ្នាំ ២០២០៕ LA