ភ្នំពេញៈ ផ្សារមូលបត្រកម្ពុជា (CSX) បានធ្វើទំនើបកម្មកម្មវិធីជួញដូររបស់ខ្លួនដោយបានដាក់ឱ្យដំណើរការកម្មវិធីទូរស័ព្ទសម្រាប់ជួញដូរមូលបត្រ «CSX Trade» បន្ទាប់ពីការដាក់ឱ្យដំណើរការនូវកម្មវិធី MTS(Mobile Trading System) ដែលមានលក្ខណៈជាគេហទំព័រ (Web-based) តាំងពីឆ្នាំ ២០១៨ មក។
សម្រាប់កម្មវិធី CSX Trade នេះគឺជាវេទិកាសម្រាប់ជួញដូរមូលបត្រ ដែលជាការធ្វើទំនើបកម្មនៃប្រព័ន្ធជួញដូរចល័តបច្ចុប្បន្ន ដែលគ្រប់គ្នាស្គាល់ ថា MTS (Mobile Trading System) មកជាកម្មវិធីទូរស័ព្ទ ដែលដំណើរការបានទាំងក្នុងប្រព័ន្ធប្រតិបត្តិការ iOS និង Android។
លោក ហុង សុហួរ អគ្គនាយក CSX បានលើកឡើងក្នុងពិធីដាក់ឱ្យដំណើរការកម្មវិធីនេះកាលពីថ្ងៃទី ២២ ខែកុម្ភៈថា CSX Trade ត្រូវបានអភិវឌ្ឍឡើង ដោយក្រុមការងារបច្ចេកទេសផ្ទាល់របស់ CSX ដោយយកលំនាំតាម និងរក្សានូវមុខងារសំខាន់ៗដែលមាននៅក្នុងប្រព័ន្ធជួញដូរចល័ត NTS ប៉ុន្តែមានបន្ថែមនូវមុខងារសុវត្ថិភាព ការរចនាលម្អ ពិសេសគឺការបន្ថែមសមត្ថភាពប្រព័ន្ធមេ ដើម្បីទទួលបញ្ហាបានច្រើនជាងមុន និងរហ័សជាងមុន។
លោកថ្លែងថា៖ «ជាការពិតណាស់ យើងមិនអាចរំពឹងភាពឥតខ្ចោះចំពោះការផលិតកម្មវិធីជាលើកដំបូងនោះទេ ប៉ុន្តែយើងជឿ និងរំពឹងទុកនូវភាពល្អប្រសើរជាងមុន ប្រសិទ្ធភាពខ្ពស់ជាងមុន និងការបន្តអភិវឌ្ឍឥតឈប់ឈរ»។
«ដូច្នេះហើយការដាក់ឱ្យដំណើរការជាបឋម ពិតជាមានសារៈសំខាន់ដើម្បីសាកល្បង និងវាស់ស្ទង់សមត្ថភាពកម្មវិធីទូរស័ព្ទដែលយើងបានអភិវឌ្ឍឡើង។ ឆ្លៀតឱកាសនេះ ខ្ញុំសូមស្នើឱ្យវិនិយោគិនទាំងអស់ទាញយកកម្មវិធីនេះ និងចូលរួមប្រើប្រាស់សាកល្បងទាំងអស់គ្នា ព្រមទាំងចូលរួមផ្តល់ជាមតិយោបល់កែលម្អដើម្បីយើងអាចកែសម្រួលឱ្យបានកាន់តែប្រសើរ មុនពេលដាក់ឱ្យដំណើរការជាផ្លូវការដែលគ្រោងធ្វើនៅខែឧសភាខាងមុខ»។
លោកបន្ថែមថា ការបង្កើតគំនិតផ្តួចផ្តើមរៀបចំឱ្យមានប្រព័ន្ធជួញដូរចល័ត MTS និងកម្មវិធីទូរស័ព្ទ CSX Trade ដែលជាសមិទ្ធផលថ្មីនេះ គឺជាកិច្ចខិតខំប្រឹងប្រែង និងការវិនិយោគរបស់ផ្សារមូលបត្រកម្ពុជាដើម្បីសម្រួលបន្ទុក ចំណាយដល់សមាជិកទីផ្សារ ដែលជាក្រុមហ៊ុនឈ្មួញជើងសាមូលបត្រនៅដំណាក់កាលកកើតទីផ្សារដំបូង ដែលអាចជាខ្ទង់វិនិយោគខ្ពស់មួយក្នុងការបង្កើតវេទិកាបញ្ជាទិញលក់ផ្ទាល់ខ្លួន ដោយអាចមកប្រើប្រាស់វេទិការួមដែលផ្តល់ដោយ CSX ដោយឥតគិតថ្លៃ។
លោក សៀង ធីរិទ្ធ អគ្គនាយករងនៃនិយតករមូលបត្រកម្ពុជាបានថ្លែងថា រយៈពេល ៥ ឆ្នាំចាប់ពីពេលចាប់ផ្តើមក្នុងឆ្នាំ ២០១៨ រហូតដល់ឆ្នាំ ២០២២ នេះ ប្រព័ន្ធ MTS បានចូលរួមកាត់បន្ថយការខាតពេលវេលា, ការបាត់បង់ឱកាសវិនិយោគ និងភាពលំបាកក្នុងការវិនិយោគរបស់វិនិយោគិននៅក្នុងទីផ្សារមូលបត្រកម្ពុជា។ ប្រព័ន្ធជួញដូរចល័ត (MTS) បាននិងកំពុងដើរតួនាទីសំខាន់ក្នុងការសម្រួលដល់ការដាក់បញ្ជាទិញ-លក់របស់វិនិយោគិន ដោយក្នុងនោះការបញ្ជាទិញ-លក់មូលបត្រ តាមរយៈប្រព័ន្ធនេះមានរហូតដល់ ៩៦ ភាគរយនៃចំនួនបញ្ជាសរុប ខណៈការដាក់បញ្ជាតាមរយៈភ្នាក់ងារ ក្រុមហ៊ុនមូលបត្រមានត្រឹមតែ ៤ ភាគរយ។
លោកបន្តថា ទោះយ៉ាងណាប្រព័ន្ធជួញដូរចល័ត (MTS) នេះនៅខ្វះភាពបត់បែន និងអាចមានរអាក់រអួលមួយចំនួន។ ដូចនេះ ខ្ញុំរំពឹងថា ការអភិវឌ្ឍកម្មវិធីទូរស័ព្ទ CSX Trade ដែលដំណើរការលើប្រព័ន្ធ Android និង iOS នឹងបំពេញនូវចំណុចខ្វះខាតទាំងនេះ ព្រមផ្តល់កាលានុវត្តភាពថ្មីសម្រាប់ទីផ្សារមូលបត្រកម្ពុជា។
បើយោងតាមលោក សុហួរ ទំហំជួញដូរប្រចាំថ្ងៃចាប់ពីឆ្នាំ ២០១៣ ដល់ឆ្នាំ ២០១៧ ដែលមានមិនដល់ ១,៥ ម៉ឺនដុល្លារ បានកើនឡើងដល់ ២,៦ ម៉ឺនដុល្លារក្នុង ១ ថ្ងៃ និងបន្តកើនឡើងដល់ជិត ១៦ ម៉ឺនដុល្លារ នៅឆ្នាំ ២០១៩ មុនពេលមានការធ្លាក់ចុះបន្តិចវិញក្នុងឆ្នាំ ២០២០ ដោយសារឥទ្ធិពលវិបត្តិកូវីដ ១៩។ ដោយឡែក ក្នុងឆ្នាំ ២០២១ បានបំបែកកំណត់ត្រាថ្មីជាមួយនឹងតម្លៃជួញដូរជាមធ្យមក្នុង ១ ថ្ងៃជាង ១ ពាន់លានរៀល ប្រមាណជាង ២៧ ម៉ឺនដុល្លារ កើនឡើងរហូតដល់ ១២៧ ភាគរយ នៃតម្លៃជួញដូរជាមធ្យមប្រចាំថ្ងៃក្នុងឆ្នាំ ២០២០។
លោកបន្តថា ជាក់ស្តែងចំនួនបញ្ជាដែលដាក់មកទីផ្សារនៅឆ្នាំ ២០២១ បានកើនដល់ជិត ៥០ ម៉ឺនស្មើនឹង ៣២ ដងធៀបឆ្នាំ ២០១៧ ក្នុងនោះ ៩៩ ភាគរយនៃចំនួនបញ្ជាសរុបគឺជាបញ្ជាតាមរយៈប្រព័ន្ធជួញដូរចល័ត។
ប្រព័ន្ធជួញដូរ MTS មានគណនីអ្នកប្រើប្រាស់ដំបូងត្រឹម ៣ ៤៩១ គណនីប៉ុណ្ណោះ ខណ:នៅដំណាច់ឆ្នាំ ២០២១ ចំនួនគណនីបានកើនដល់ ១៧ ២០៧ គណនី ស្មើនឹង ៥៥ ភាគរយនៃគណនីជួញដូរសរុបដែលមានចំនួន ៣០ ៩៥៦ គណនី៕ LA