.jpg)
អង្ករព្រះវិហារ ក្នុងពិធីសម្ពោធឱ្យប្រើប្រាស់ កាលពីថ្ងៃទី ២១ កុម្ភៈ។ រូបថត ក្រសួងពាណិជ្ជកម្ម
ភ្នំពេញៈ «អង្ករព្រះវិហារ» ត្រូវបានរដ្ឋាភិបាលកម្ពុជាប្រកាសដាក់សម្ពោធជាម៉ាកសមូហភាព (Collective Mark) ដែលនេះ គឺជាការបើកផ្លូវក្នុងការជំរុញការនាំចេញទៅទីផ្សារអន្តរជាតិកាន់តែច្រើន ព្រមទាំងអាចទទួលបានតម្លៃបន្ថែមកាន់តែច្រើនទាំងនៅទីផ្សារក្នុងស្រុកផងដែរ។
ពិធីប្រកាសសម្ពោធ «អង្ករព្រះវិហារ» ជាម៉ាកសមូហភាពត្រូវបានធ្វើឡើងកាលពីថ្ងៃទី ២១ ខែកម្ភៈ នៅសហភាពសហគមន៍កសិកម្មព្រះវិហារមានជ័យ ខេត្តព្រះវិហារ ដោយមានការចូលរួមពីសំណាក់ថ្នាក់ដឹកនាំក្រសួងពាណិជ្ជកម្ម, អាជ្ញាធរខេត្ត, អង្គការអ្នកក្សេត្រសាស្ត្រ និងពេទ្យគ្មានព្រំដែន (AVSF), តំណាងស្ថានទូតបារាំងប្រចាំកម្ពុជា, ទីភ្នាក់ងារបារាំងសម្រាប់ការអភិវឌ្ឍ, អង្គការក្រៅរដ្ឋាភិបាល, ដៃគូអភិវឌ្ឍន៍ និងតំណាងវិស័យឯកជន, សមាគម, សហគមន៍ និងក្រុមអ្នកផលិត។
រដ្ឋលេខាធិការក្រសួងពាណិជ្ជកម្ម លោក អ៊ុក ប្រជា បានលើកឡើងក្នុងពិធីសម្ពោធម៉ាកសមូហភាព «អង្ករព្រះវិហារ»ថា ការចុះបញ្ជីម៉ាកសមូហភាពនេះគឺជាការធានាផ្លូវច្បាប់ ដើម្បីធ្វើឱ្យការប្រកួតប្រជែងដោយស្មោះត្រង់នៅលើទីផ្សារ និងទប់ស្កាត់ការក្លែងបន្លំផលិតផល, បង្កើនកេរ្តិ៍ឈ្មោះ និងទំនុកចិត្តពីអ្នកបញ្ជាទិញ និងអ្នកប្រើប្រាស់ចុងក្រោយ។
លោកបន្តថា ការចុះបញ្ជីម៉ាកសមូហភាព «អង្ករព្រះវិហារ» ត្រូវបានធ្វើឡើងនៅក្នុងគោលបំណងសំខាន់ៗមួយចំនួនដូចជា ការផ្តល់កិច្ចការពារកម្មសិទ្ធិបញ្ញាដល់សហភាពសហគមន៍កសិកម្មព្រះវិហារមានជ័យដែលជាម្ចាស់ម៉ាកសមូហភាពក្រោមច្បាប់ស្តីពីម៉ាកពាណិជ្ជនាម និងអំពើនៃការប្រកួតប្រជែងមិនស្មោះត្រង់ និងការទប់ស្កាត់ការក្លែងបន្លំម៉ាកសមូហភាព,ការអភិរក្សចំណេះដឹងចំណេះធ្វើតាមបែបប្រពៃណីរបស់ប្រជាកសិករក្នុងខេត្តព្រះ-វិហារតាមរយៈការរៀបចំចងក្រងបទបញ្ជារួមគ្រប់គ្រងការប្រើប្រាស់ម៉ាកសមូហភាព។
បន្ថែមពីលើនេះ វាក៏នឹងជួយផ្សព្វផ្សាយអំពីកេរ្តិ៍ឈ្មោះម៉ាកសមូហភាព និងចូលរួមអភិវឌ្ឍហេដ្ឋារចនាសម្ព័ន្ធក្នុងតំបន់ដាំដុះ និងទាក់ទាញភ្ញៀវទេសចរ, ការលើកកម្ពស់គុណភាព និងស្តង់ដាអនាម័យម៉ាកសមូហភាព និងបង្កើនចង្វាក់តម្លៃ បង្កើតការងារ និងលើកកម្ពស់ជីវភាពកសិករក្នុងតំបន់។
លោកបានបញ្ជាក់ថា៖ «ម៉ាកសមូហភាព «អង្ករព្រះវិហារ» មិនត្រឹមតែជាការកំណត់អត្តសញ្ញាណផលិតផលជារបស់សហភាពសហគមន៍ក្នុងខេត្តព្រះវិហារតែមួយប៉ុណ្ណោះទេ ប៉ុន្តែម៉ាកសមូហភាពនេះ ក៏នឹងក្លាយជាផ្នែកមួយនៃការផ្សព្វផ្សាយកេរ្តិ៍ឈ្មោះ និងវប្បធម៌ប្រពៃណីរបស់ប្រជាជនកម្ពុជាក្នុងឆាកអន្តរជាតិផងដែរ»។
ជាមួយគ្នានេះ លោក ប្រជា ក៏បានបញ្ជាក់ថា ដើម្បីថែរក្សា និងធានាបានកេរ្តិ៍ឈ្មោះ«អង្ករព្រះវិហារ» និងការទាញយកអត្ថប្រយោជន៍ពីការចុះបញ្ជីនេះ គឺជាការចាំបាច់ដែលសមាជិកម្នាក់ៗនៅក្នុងសហគមន៍ត្រូវមានសាមគ្គីភាព ភាពស្មោះត្រង់ សុចរិត និងអភិបាលកិច្ចគ្រប់គ្រងល្អ ប្រកបដោយតម្លាភាព និងគណនេយ្យភាព ទើបម៉ាកសមូហភាព «អង្ករព្រះវិហារ» ផ្តល់នូវគុណតម្លៃពិតប្រាកដ ព្រមទាំងធានាបាននូវនិរន្តរភាពសម្រាប់អ្នកជំនាន់ក្រោយ។
ប្រធានមន្ទីរកសិកម្ម រុក្ខាប្រមាញ់ និងនេសាទ លោក ពីង ទ្រីដា បានប្រាប់ភ្នំពេញប៉ុស្តិ៍កាលពីថ្ងៃទី ២២ ខែកុម្ភៈថា ការប្រកាសដាក់ «អង្ករព្រះវិហារ» ជាម៉ាកសមូហភាពនឹងផ្តល់នូវប្រយោជន៍ជាច្រើនដល់ប្រជាកសិករក្នុងខេត្តព្រះវិហារដោយមិនត្រឹមតែកេរ្តិ៍ឈ្មោះត្រូវបានគេទទួលស្គាល់ជាអន្តរជាតិ និងមានច្បាប់ការពារប៉ុណ្ណោះទេ ប៉ុន្តែវាថែមទាំងអាចជួយឱ្យកសិករទទួលបានតម្លៃលក់ចេញកាន់តែខ្ពស់ និងជំរុញឱ្យមានការបង្កបង្កើនផលស្រូវកាន់តែច្រើនផងដែរ។
លោកបញ្ជាក់ថា៖ «ខ្ញុំសង្ឃឹមថា ការទទួលបានម៉ាកសមូហភាពនេះនឹងជួយឱ្យផលិតផលអង្ករព្រះវិហារ ទទួលបានការបញ្ជាទិញកាន់តែច្រើន ហើយតម្លៃក៏នឹងកើនឡើងខ្ពស់ជាងមុនដែរ ពោលគឺដូចផលិតផលម្រេចកំពត ដែលទទួលបានការបញ្ជាទិញកាន់តែច្រើនពេលបានចុះបញ្ជី ព្រោះជាផលិតផលដែលមានការធានាគុណភាព និងការដាំដុះ ជាដើម»។
បើតាមលោក ទ្រីដា បច្ចុប្បន្នទូទាំងខេត្តព្រះវិហារមានផ្ទៃដីបង្កបង្កើនផលស្រូវជិត ១០ ម៉ឺនហិកតា។ កាលពីឆ្នាំ ២០២១ ខេត្តព្រះវិហារទាំងមូលប្រមូលផលស្រូវបានជិត ៣០ ម៉ឺនតោន ខណៈអង្ករល្អមានតម្លៃមធ្យម ១ ៣៥០ រៀលក្នុង ១ គីឡូក្រាម។
ប្រធានសហព័ន្ធស្រូវអង្ករកម្ពុជា លោក សុង សារ៉ន បាននិយាយថា នេះជាមោទនភាពមួយសម្រាប់ប្រជាកសិករ និងសហគមន៍ផលិតស្រូវនៅខេត្តព្រះវិហារ ដែលបានខិតខំបង្កបង្កើនផលស្រូវមួយដែលមានគុណភាពល្អរហូតត្រូវបានរដ្ឋាភិបាលទទួលស្គាល់ជាម៉ាកសមូហភាព «អង្ករព្រះវិហារ»។ លោកបន្តថា ការចុះបញ្ជីម៉ាកសមូហភាពនេះ គឺដើម្បីធ្វើឱ្យការប្រកួតប្រជែងមានភាពស្មោះត្រង់ និងទប់ស្កាត់ការក្លែងបន្លំផលិតផល និងជំនឿទំនុកចិត្តពីអ្នកបញ្ជាទិញ។
លោកបញ្ជាក់ថា៖ «ខ្ញុំគិតថា តាមរយៈការទទួលបានម៉ាកសមូហភាព «អង្ករព្រះវិហារ» នឹងជួយធ្វើឱ្យផលិតផលស្រូវ-អង្កររបស់ប្រជាកសិករក្នុងខេត្តព្រះវិហារ កាន់តែមានទីផ្សារធំជាងមុន ហើយវាក៏នឹងជួយឱ្យ «អង្ករព្រះវិហារ» ទទួលបាននូវតម្លៃបន្ថែមផងដែរ»។
របាយការណ៍ក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា នៅក្នុងឆ្នាំ ២០២១ កម្ពុជាបាននាំចេញអង្ករចំនួន ៦១៧ ០៦៩ តោន គិតជាប្រាក់ចំនួន ៤១៨ លានដុល្លារ និងនាំស្រូវចេញ ៣ ៥២៧ ៤១៨ តោនគិតទឹកប្រាក់ ៨៤៥,៩៥ លានដុល្លារ៕ LA
