.jpg)
ជំនួបសន្ទនារវាងថ្នាក់ដឹកនាំក្រុមប្រឹក្សាអភិវឌ្ឍន៍កម្ពុជា លោក សុខ ចិន្តាសោភា (កណ្តាល) ជាមួយនឹងភាគីប្រទេសឥណ្ឌូនេស៊ី។ រូបថត សហការី
ភ្នំពេញៈ ឯកអគ្គរដ្ឋទូតឥណ្ឌូនេស៊ីប្រចាំនៅកម្ពុជា លោក Sudirman Haseng បាននិយាយថា ស្ថានទូតឥណ្ឌូនេស៊ីនឹងសហការជាមួយសភាពាណិជ្ជកម្មឥណ្ឌូនេស៊ីនៅកម្ពុជាដើម្បីជំរុញការដោះដូរទំនិញ និងជំរុញវិនិយោគិនរបស់ខ្លួនឱ្យចូលមកវិនិយោគនៅកម្ពុជាកាន់តែច្រើន។
ការលើកឡើងនេះធ្វើឡើងនៅក្នុងកិច្ចសន្ទនាវិនិយោគកម្ពុជា-ឥណ្ឌូនេស៊ីកាលពីថ្ងៃទី ២២ ខែកុម្ភៈ ឆ្នាំ ២០២២ ក្រោមកិច្ចសហការជាមួយស្ថានទូតនៃសាធារណរដ្ឋឥណ្ឌូនេស៊ីប្រចាំកម្ពុជាជាមួយសភាពាណិជ្ជកម្មឥណ្ឌូនេស៊ីនៅកម្ពុជា នៅទីស្តីការនៃក្រុមប្រឹក្សាអភិវឌ្ឍន៍កម្ពុជា (CDC) និងមានផ្សាយផ្ទាល់តាមរយៈប្រព័ន្ធវីដេអូ ដើម្បីពិភាក្សាពីការជំរុញកិច្ចសហប្រតិបត្តិការវិនិយោគ ក៏ដូចជាផ្សព្វផ្សាយច្បាប់ស្តីពីវិនិយោគថ្មីនៃប្រទេសកម្ពុជាជូនដល់វិនិយោគិនឥណ្ឌូនេស៊ីនៅកម្ពុជា និងនៅក្រៅប្រទេសដោយមានអ្នកចូលរួមផ្ទាល់ និងតាមប្រព័ន្ធវីដេអូ ប្រមាណ ១៥០ នាក់។
លោក Sudirman Haseng បានសាទរចំពោះលទ្ធផលដ៏ល្អនៃការចាក់វ៉ាក់សាំងជូនប្រជាពលរដ្ឋដោយឥតគិតថ្លៃក្នុងអត្រា ១ ខ្ពស់គួរឱ្យកត់សម្គាល់ ដែលធ្វើឱ្យស្ថានភាពឆ្លងរីករាលដាលជំងឺកូវីដ ១៩ នៅកម្ពុជាអាចគ្រប់គ្រងបាន និងការធ្វើឱ្យប្រសើរឡើងនូវបរិស្ថានវិនិយោគតាមរយៈការអនុម័តច្បាប់ស្តីពីវិនិយោគថ្មីដែលបានប្រកាសដាក់ឱ្យប្រើប្រាស់កាលពីថ្ងៃទី ១៥ ខែតុលា ឆ្នាំ ២០២១។
លោកលើកឡើងថា៖ «សភាពាណិជ្ជកម្មឥណ្ឌូនេស៊ីនៅកម្ពុជាដែលទើបបានបង្កើតឡើងជាផ្លូវការកាលពីថ្ងៃទី ២៣ ខែកញ្ញា ឆ្នាំ ២០២១ និងស្ថានទូតឥណ្ឌូនេស៊ីប្រចាំកម្ពុជានឹងសហការជាមួយក្រសួងស្ថាប័នពាក់ព័ន្ធរបស់កម្ពុជាក្នុងការជំរុញការវិនិយោគឥណ្ឌូនេស៊ីមកកម្ពុជាបន្ថែមទៀត»។
បន្ថែមលើនេះលោក Luhut Binsar Panjaitan រដ្ឋមន្ត្រីសម្របសម្រួលការវិនិយោគ និងកិច្ចការសមុទ្រនៃសាធារណរដ្ឋឥណ្ឌូនេស៊ីក៏បានកត់សម្គាល់ពីភាពជឿនលឿននៃកិច្ចសហប្រតិបត្តិការវិនិយោគទ្វេភាគីឥណ្ឌូនេស៊ី និងកម្ពុជា ក្នុងរយៈពេលជាង ២ ទសវត្សរ៍កន្លងមក។ លោកបានកោតសរសើរក្រុមប្រឹក្សាអភិវឌ្ឍន៍កម្ពុជា ដែលបានរៀបចំច្បាប់ស្តីពីវិនិយោគថ្មីគឺអនុលោមតាមអភិក្រមបុរេសកម្មក្នុងការជំរុញ, ផ្តល់កិច្ចសម្រួល, ការធានា, ការការពារ និងការថែទាំវិនិយោគឱ្យបានគ្រប់ជ្រុងជ្រោយ។
លោកក៏បានលើកឡើងអំពីការធ្វើសាមញ្ញកម្មនីតិវិធីអនុម័តគម្រោងវិនិយោគនៅឥណ្ឌូនេស៊ី តាមរយៈការច្របាច់បញ្ចូលគ្នានូវច្បាប់ពាក់ព័ន្ធនឹងការវិនិយោគតាមវិស័យនីមួយៗចំនួន ៧៦ ឱ្យក្លាយជាច្បាប់គោល (Omnibus Law 2020)។
លោក សុខ ចិន្តាសោភា បានថ្លែងថា វិនិយោគិនឥណ្ឌូនេស៊ីកំពុងចូលរួមចំណែកដល់កំណើនសេដ្ឋកិច្ចកម្ពុជា និងបានបង្ហាញនូវសុទិដ្ឋិនិយមលើសក្ដានុពលនៃការវិនិយោគមកពីប្រទេសឥណ្ឌូនេស៊ីដែលជាប្រទេសមានប្រជាជនច្រើនជាងគេ និងសេដ្ឋកិច្ចធំជាងគេនៅតំបន់អាស៊ាន ស្របពេលនៃការចូលជាធរមាននៃកិច្ចព្រមព្រៀងពាណិជ្ជកម្មសេរីនានាដែលនឹងបើកទីផ្សារដល់កម្ពុជាបន្ថែមទៀតដូចជា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់, កិច្ចព្រមព្រៀងពាណិជ្ជកម្មសេរីកម្ពុជា-ចិន, និងកិច្ចព្រមព្រៀងពាណិជ្ជកម្មកម្ពុជា-កូរ៉េ។
លោកបញ្ជាក់ថា៖ «អត្រាប្រជាជនបានចាក់វ៉ាក់សាំងកូវីដ ១៩ នៅកម្ពុជាជាអត្រាមួយខ្ពស់ក្នុងចំណោមបណ្តាប្រទេសក្នុងតំបន់ និងពិភពលោកដែលផ្ដល់លទ្ធភាពឱ្យកម្ពុជាអាចបើកដំណើរការប្រទេសពេញលេញលើគ្រប់វិស័យ។ ឈរលើមូលដ្ឋាននេះរាជរដ្ឋាភិបាលកម្ពុជាបានដាក់ចេញ និងប្រកាសឱ្យអនុវត្តជាផ្លូវការកាលពីថ្ងៃទី ២២ ខែធ្នូ ឆ្នាំ ២០២១ នូវក្របខ័ណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជាក្នុងការរស់នៅជាមួយកូវីដ ១៩ តាមគន្លងប្រក្រតីភាពថ្មីសម្រាប់ឆ្នាំ ២០២១-២០២៣ ដោយឈរលើសសរស្តម្ភចំនួន ៣ (3Rs) គឺការស្តារឡើងវិញ, ការកែទម្រង់ និងការកសាងភាពធន់។
លោកជឿថា តាមរយៈកិច្ចសន្ទនានេះ សហគមន៍ធុរកិច្ចឥណ្ឌូនេស៊ីនឹងបានយល់កាន់តែច្បាស់ និងស៊ីជម្រៅពីច្បាប់ស្តីពីវិនិយោគថ្មី ហើយនឹងជួយផ្សព្វផ្សាយដល់វិនិយោគិនឥណ្ឌូនេស៊ីឱ្យចូលមកវិនិយោគនៅកម្ពុជាបន្ថែមទៀត៕ LA
