ភ្នំពេញៈ អង្គការអាកាសចរស៊ីវិលអន្តរជាតិ និង ទីភ្នាក់ងារសុវត្ថិភាពសហគមន៍អឺរ៉ុប ផ្តល់ជំនួយបច្ចេកទេសបន្ថែមដល់រដ្ឋលេខាធិការដ្ឋានអាកាសចរស៊ីវិលកម្ពុជា ដើម្បីធានាសន្តិសុខ និងសុវត្ថិភាពនៃការដឹកជញ្ជូនតាមផ្លូវអាកាស។
ជំនួយបច្ចេកទេសពីអាជ្ញាធរអាកាសចរស៊ីវិលបារាំង (French DGAC) លើជំនាញ អាកាសយានដ្ឋាន (AGA) ជំនាញអាជ្ញាប័ណ្ណបុគ្គលិក ( PEL ) និងលទ្ធភាពហោះហើរ (AIR ) និងការផ្តល់ជំនួយបច្ចេកទេសពីទីភ្នាក់ងារសុវត្ថិភាពសហគមន៍អឺរ៉ុប ហៅកាត់ EASA ជួយលើជំនាញ អាជ្ញាប័ណ្ណបុគ្គលិក ប្រតិបត្តិការហោះហើរ (OPS )និងលទ្ធភាពហោះហើរ ( AIR) ព្រមទាំងការរៀបចំលិខិតបទដ្ឋានបច្ចេកទេសឱ្យសមស្របតាមស្តង់ដាមួយដែលអាចទទួលយកបាន។
នៅក្នុងនោះដែរ គម្រោងការជំនួយបច្ចេកទេសពី French DGAC នឹងជួយលើជំនាញ AGA, PEL and AIR និងជំនួយបច្ចេកទេសពី EASA លើជំនាញ PEL OPS និង AIR ដើម្បីជួយដល់រដ្ឋលេខាធិការដ្ឋានអាកាសចរស៊ីវិលលើការរៀបចំ PEL OPS និង AIR សម្រាប់ត្រៀមទទួល ការធ្វើសវនកម្មហៅកាត់ ថា ICVM នាពេលខាងមុខ ការងារបរិស្ថាន និងបច្ចេកវិទ្យាព័ត៍មាន។
នៅក្នុងជំនួបពិភាក្សាការងារជាមួយការិយាល័យអង្គការអាកាសចរស៊ីវិលអន្តរជាតិ និងតំណាងទីភ្នាក់ងារសុវត្ថិភាពសហគមន៍អឺរ៉ុប (EASA ) កាលពីថ្ងៃទី ២៣ ខែកុម្ភៈ ឆ្នាំ ២០២២ លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិលបានលើកឡើងថា វិស័យផ្សេងៗនៅកម្ពុជាត្រូវបានស្តារឡើងវិញ ក្រោយសម័យខ្មែរក្រហម រួមទាំងវិស័យអាកាសចរណ៍ផងដូចនេះការជួយជ្រោមជ្រែងពីសហគមន៍អន្តរជាតិ គឺពិតជាមានសារៈសំខាន់ណាស់។
លោកបញ្ជាក់ថា៖ «គោលដៅចម្បងរបស់យើងគឺ ធានាសន្តិសុខនិងសុវត្ថិភាពនៃការដឹកជញ្ជូនតាមផ្លូវអាកាស ហើយនេះជាការរួមចំណែកពីថ្នាក់ដឹកនាំ និងមន្ត្រីនៃរដ្ឋលេខាធិការដ្ឋានអាកាសចរស៊ីវិល ទាំងមូល និងការជួយជ្រោមជ្រែងពីសហគមន៍អន្តរជាតិនានា»។
លោក នីកូឡាស ប្រធាន កិច្ចសហប្រតិបត្តិការអភិវឌ្ឍនៃកម្មវិធីលទ្ធភាពហោះហើរ និងសុវត្ថិភាព តំបន់អាស៊ីអាគ្នេយ៍នៃការិយាល័យអង្គការអាកាសចរស៊ីវិលអន្តរជាតិ ប្រចាំទីក្រុងបាងកកប្រទេសថៃបានឱ្យដឹងថា កម្ពុជាជាប្រទេសមួយតូច តែមានប្រភពសក្តានុពលទាក់ទាញសម្រាប់ទេសចរ ព្រោះហេតុនោះវិស័យអាកាសចរណ៍មានសារៈសំខាន់ខ្លាំងណាស់សម្រាប់ការដឹកជញ្ជូនទាំងមនុស្ស និងទំនិញ។
លោកបានបញ្ជាក់ថា៖ «យើងចាំបាច់ត្រូវតែរៀបចំឱ្យបានល្អ និងមានការយកចិត្តទុកដាក់ខ្ពស់ពីគ្រប់ភាគីពាក់ព័ន្ធទាំងអស់ក្នុងការធានាឱ្យបានទាំងសន្តិសុខ និងសុវត្ថិភាព»។
លោក ហ្សង់ទី តំណាងទីភ្នាក់ងារសុវត្ថិភាពសហគមន៍អឺរ៉ុប (EASA ) បានលើកឡើងថា រហូតមកដល់ពេលនេះ រដ្ឋលេខាធិការដ្ឋានអាកាសចរស៊ីវិលធ្វើកិច្ចការបានល្អប្រសើរច្រើន តែត្រូវយកចិត្តទុកដាក់បន្ថែមលើការស្នើសុំរដ្ឋាភិបាលអនុម័តច្បាប់ឱ្យបានឆាប់ដើម្បីជំរុញការងារស្នូលសំខាន់ៗមួយចំនួនទៀត ការពិនិត្យលទ្ធភាពហិរញ្ញវត្ថុសម្រាប់ការងារសុវត្ថិភាព និងការបណ្តុះបណ្តាល ការគិតគូរពីឥឡូវលើការចាត់ចែងមន្ត្រីបន្តវេន ជាពិសេសផ្នែក PEL OPS and ANS ដែលមន្ត្រីចាស់នឹងចូលនិវត្តន៍នៅពេល ១ ឆ្នាំ ឬ ២ ឆ្នាំខាងមុខនេះ និងត្រូវរៀបចំគេហទំព័រឡើងវិញឱ្យបានល្អ និងអភិវឌ្ឍ E-Library។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជាបានប្រាប់ថា ជារឿងចាំបាច់ណាស់ដែល វិស័យអាកាសចរណ៍កម្ពុជាត្រូវមានជំនាញបច្ចេកទេសឱ្យកាន់តែល្អប្រសើរ ដើម្បីទទួលបានការទុកចិត្តពីអ្នកដំណើរ និងអ្នកប្រកបអាជីវកម្ម។
លោកថា៖ «ការផ្តល់ជំនួយផ្នែកបច្ចេកទេសពីខាងអង្គការអន្តរជាតិផ្នែកអាកាសចរស៊ីវិលនេះ គឺជាការផ្តល់ទំនុកចិត្តដល់អ្នកប្រកបអាជីវកម្មដឹកជញ្ជូនតាមផ្លូវអាកាស ជាពិសេសក្រុមហ៊ុនអាកាសចរណ៍ដែលហោះហើរពិតប្រាកដ ដែល ត្រៀមដឹកជញ្ជូនភ្ញៀវទេសចរពីប្រទេសនានាមកកាន់កម្ពុជា ស្របពេលដែលកម្ពុជាបើកទទួលទេសចរវ៉ាក់សាំង»។
លោក ស៊ិន ចន្ធី ប្រធានសមាគមភ័ស្តុភារកម្មកម្ពុជា បានប្រាប់ភ្នំពេញ ប៉ុស្តិ៍ថា ក្នុងបទពិសោធជាង ១០ ឆ្នាំដែលលោកបានធ្វើការងារជុំវិញការដឹកជញ្ជូនទំនិញ នៅអាកាសយានដ្ឋានអន្តរជាតិភ្នំពេញ ពិតជាចាំបាច់ខ្លាំងណាស់អំពីការយល់ដឹងផ្នែកបច្ចេកទេស។
លោកថា៖ «ទំនិញ ដែលដឹកជញ្ជូនតាមផ្លូវអាកាសមានច្រើនប្រភេទ ដូចជា ទំនិញដែលមានហានិភ័យច្រើន ដែលទាមទារឱ្យមានការយល់ដឹងច្រើន ដើម្បីកាត់បន្ថយផលប៉ះពាល់ និងធានាសុវត្ថិភាពនៃការដឹកជញ្ជូន ដូចនេះការគាំទ្រជំនួយផ្នែកបច្ចេកទេសពីស្ថាប័នជំនាញអន្តរជាតិ គឺជារឿងសំខាន់ដែលខាងវិស័យដឹកជញ្ជូនដូចពួកយើងចង់បាន»។
របាយការណ៍ពីអាកាសចរស៊ីវិលបានបង្ហាញ ការដឹកជញ្ជូនទំនិញតាមផ្លូវអាកាសមានកំណើននៅក្នុងឆ្នាំ ២០២១ មានចំនួន ៥៥ ពាន់តោន មានកំណើនប្រមាណ ២៨% ខណៈដែលការដឹកជញ្ជូនភ្ញៀវទេសចរនៃអាកាសយានដ្ឋានទាំង ៣ ថយចុះ ៨៧ ភាគរយ បើធៀបនឹងរយៈពេលដូចគ្នាក្នុងឆ្នាំ ២០២០៕LA