The Phnom Penh Post Search

Search form




Logo of Phnom Penh Post newspaper Phnom Penh Post - សមិទ្ធិ​លទ្ធភាព​នៃ​គម្រោង PPLC សម្រេចបាន​ប្រហែល ៥០%

សមិទ្ធិ​លទ្ធភាព​នៃ​គម្រោង PPLC សម្រេចបាន​ប្រហែល ៥០%

Content image - Phnom Penh Post
ជំនួប​ពិភាក្សា​រវាង​ថ្នាក់ដឹកនាំ​ក្រសួង​សាធារណការ និង​ថ្នាក់ដឹកនាំ​ស្ថានទូត និង​ក្រុមហ៊ុន​មកពី​សិង្ហបុរី​។ រូបថត សហការី

សមិទ្ធិ​លទ្ធភាព​នៃ​គម្រោង PPLC សម្រេចបាន​ប្រហែល ៥០%

ភ្នំពេញៈ ការសិក្សា​សមិទ្ធិ​លទ្ធភាព​នៃ​គម្រោង​អភិវឌ្ឍន៍​មជ្ឈមណ្ឌល​ភ័ស្តុភារកម្ម​ភ្នំពេញ ​(PPLC) របស់​ក្រុមហ៊ុន YCH និង​ក្រុមហ៊ុន PricewaterhouseCooper (PwC) ​របស់​ប្រទេស​សិង្ហបុរី បច្ចុប្បន​សម្រេចបាន​ប្រមាណ ៥០ ​ភាគរយ ដោយ​គ្រោង​នឹង​បញ្ចប់​នៅក្នុង​ត្រីមាស​ទី​ ២ ​ខាងមុខ ព្រមទាំង​អាច​បើក​ការដ្ឋាន​សាងសង់​នៅ​ចុងឆ្នាំ​ ២០២២ នេះ​។

នៅក្នុង​ជំនួប​ពិភាក្សា​ការងារ​ជាមួយ​លោក ស៊ុន ចាន់ថុល រដ្ឋមន្ត្រីក្រសួង​សាធារណការ និង​ដឹកជញ្ជូន កាលពី​ថ្ងៃទី ​២៣ ខែកុម្ភៈ លោក Lavan Thiru នាយក​ប្រតិបត្តិ Infrastructure Asia(IA) ​ឱ្យដឹងថា កាលពី​សប្តាហ៍​កន្លងទៅ​ក្រុមហ៊ុន YCH និង​ក្រុមហ៊ុន PricewaterhouseCooper (PwC) បាន​ប្រមូល​ទិន្នន័យ​ដើម្បី​ធ្វើការ​វិភាគ និង​បាន​ចុះទៅពិនិត្យ​ទីតាំង​ទាំង​ ៣ កន្លែង​នៃ​គម្រោង​អភិវឌ្ឍន៍​មជ្ឈមណ្ឌល​ភ័ស្តុភារកម្ម​ភ្នំពេញ ​(PPLC)​។

លោក Lavan Thiru បាន​ថ្លែងថា​៖ «​ជារួម ការសិក្សា​សមិទ្ធិ​លទ្ធភាព​នៃ​គម្រោង​អភិវឌ្ឍន៍​មជ្ឈមណ្ឌល​ភ័ស្តុភារកម្ម​ភ្នំពេញ​ (PPLC) សម្រេចបាន​ប្រមាណ​ ៥០ ​ភាគរយ​ហើយ ដោយ​គ្រោង​បញ្ចប់​នា​ពាក់កណ្តាល​ខែមេសា​ខាងមុខ ដើម្បី​ដាក់ជូន​ក្រសួង​សាធារណការ និង​ដឹកជញ្ជូន និង​ក្រសួង​សេដ្ឋកិច្ច ពិនិត្យ និង​សម្រេច​»​។

រដ្ឋមន្ដ្រីក្រសួង​សាធារណការ និង​ដឹកជញ្ជូន លោក ស៊ុន ចាន់ថុល បាន​សម្តែង​ការពេញចិត្ត​ចំពោះ​វឌ្ឍនភាព​នៃ​ការសិក្សា​សមិទ្ធិ​លទ្ធភាព​គម្រោង​អភិវឌ្ឍន៍​មជ្ឈមណ្ឌល​ភ័ស្តុភារកម្ម​ភ្នំពេញ និង​រង់​ចាំមើល​លទ្ធផល​នៃ​ការសិក្សា​នេះ​នៅក្នុង​ខែមេសា ដើម្បី​ឈានទៅ​បើក​ការដ្ឋាន​សាងសង់​មជ្ឈមណ្ឌល​នេះ​តាម​ផែនការ​ដែល​បាន​គ្រោងទុក​នៅក្នុង​ខែវិច្ឆិកា ឆ្នាំ​ ២០២២​។

លោក​បន្ថែមថា កិច្ចព្រមព្រៀង​ក្របខ័ណ្ឌ​គម្រោង​អភិវឌ្ឍន៍​មជ្ឈមណ្ឌល​ភ័ស្តុភារកម្ម​ភ្នំពេញ​ (PPLC) រវាង​ក្រសួង​សាធារណការ និង​ដឹកជញ្ជូន និង​ក្រុមហ៊ុន​ YCH និង​ក្រុមហ៊ុន Infrastructure Asia (IA) របស់​ប្រទេស​សិង្ហបុរី ត្រូវបាន​ចុះហត្ថលេខា​កាល​ថ្ងៃទី ​៤ ខែមីនា ឆ្នាំ​ ២០២១ តាម​ស្មារតី​នៃ​កិច្ចខិតខំ​ប្រឹងប្រែង​របស់​ក្រសួង​សាធារណការ និង​ដឹកជញ្ជូន ក៏ដូចជា ស្ថាប័ន​ពាក់ព័ន្ធ​នានា​របស់​រាជរដ្ឋាភិបាល​ផងដែរ​។

បើតាម លោក ចាន់ថុល គម្រោង​អភិវឌ្ឍន៍​មជ្ឈមណ្ឌល​ភ័ស្តុភារកម្ម​ភ្នំពេញ​នឹង​ដើរតួនាទី​យ៉ាងសំខាន់ និង​ចាំបាច់​ក្នុង​ការជួយ​សម្រួល​ដល់​ការងារ​ដឹកជញ្ជូន​ទំនិញ​ឱ្យ​កាន់តែមាន​ភាពងាយស្រួល និង​ឆាប់រហ័ស ព្រមទាំង​រួមចំណែក​ជំរុញ​ការធ្វើ​សមាហរណកម្ម​ភ័ស្តុភារ​កម្ម​កម្ពុជា​ទៅក្នុង​ខ្សែចង្វាក់​ផ្គត់ផ្គង់​តំបន់ និង​ពិភពលោក​។

លោក​ថ្លែងថា​៖ «​ការរីក​រាលដាល​នៃ​ជំងឺ​កូវីដ​ ១៩ បាន​បន្ថយល្បឿន​គម្រោង​នេះ​បន្តិច​មែន ប៉ុន្តែ​វា​មិនអាច​បញ្ឈប់​គម្រោង​នេះ​ទាំងស្រុង​ពី​ការសម្រេច​គោលដៅ​របស់​រាជរដ្ឋាភិបាល​បានទេ ដោយហេតុថា PPLC គឺជា​គម្រោង​ដឹកជញ្ជូន​យុទ្ធសាស្ត្រ​មាន​ទីតាំង​ស្ថិតនៅ​ចំ​ចំណុចកណ្តាល​ប្រទេស​កម្ពុជា​អាច​ផ្តល់​ការគាំទ្រ​ដល់​បណ្តាញ​ចែកចាយ​ទំនិញ និង​បណ្តាញ​តភ្ជាប់​គ្រប់​មធ្យោបាយ​ដឹកជញ្ជូន​ដូចជា ផ្លូវថ្នល់ ផ្លូវដែក ផ្លូវទឹក និង​ផ្លូវអាកាស​»​។

លោក ស៊ិន ចន្ធី ប្រធាន​សមាគម​ភ័ស្តុភារ​កម្ពុជា​កម្ពុជា​ប្រាប់​ភ្នំពេញ​ប៉ុស្តិ៍​ក្នុង​ថ្ងៃទី​ ២៤ ខែកុម្ភៈ​ថា ក្នុង​វិស័យ​ភ័ស្តុភារកម្ម​នេះ សមាគម​លោក​ក៏បាន​ជួយ​ដល់​ការសិក្សា​ស្រាវជ្រាវ​របស់​ក្រុមហ៊ុន YCH និង​ក្រុមហ៊ុន PricewaterhouseCooper (PwC) លើ​គម្រោង​អភិវឌ្ឍន៍​មជ្ឈមណ្ឌល​ភ័ស្តុភារកម្ម​ភ្នំពេញ​ (PPLC)​ ដែរ​។

លោក​បាន​បន្តថា នៅពេល​គម្រោង​អភិវឌ្ឍន៍​មជ្ឈមណ្ឌល​ភ័ស្តុភារកម្ម​ភ្នំពេញ​ (PPLC) កើតឡើង​ដូច​ការគ្រោងទុក វា​នឹង​បង្ក​ភាពងាយស្រួល និង​ជួយ​កាត់បន្ថយ​តម្លៃ​ភ័ស្តុភារកម្ម​នៅ​កម្ពុជា​បានជា​ច្រើន ពីព្រោះ​វា​បាន​ប្រមូលផ្តុំ​នូវ​សេវាកម្ម​ទាំងអស់ និង​ជាពិសេស​មាន​ទាំង​សមត្ថកិច្ច​គយ​នៅ​ទីនោះ​ក្នុង​ការត្រួតពិនិត្យ​ទំនិញ​ផងដែរ ខណៈ​បច្ចុប្បន្ននេះ​ផែស្ងួត និង​កន្លែង​ធ្វើ​បែបបទ​សម្រាប់​នាំ​ទំនិញ​ចេញ​-​ចូល​មាននៅ​កន្លែង​ជាច្រើន​នៅ​ទីក្រុង​ភ្នំពេញ​។

លោក​ថ្លែងថា​៖ «​ខ្ញុំ​គិតថា នៅពេល​មជ្ឈមណ្ឌល​ភ័ស្តុភារកម្ម​កើតឡើង វា​មាន​ភាពងាយស្រួល និង​មានការ​តភ្ជាប់​រវាងផ្លូវ​រថភ្លើង និង​ផ្លូវ​រថយន្ត​ជាដើម និង​ស្ថិតនៅ​ជាយក្រុង​មិនមាន​ការកកស្ទះ​ខ្លាំង វា​នឹងមាន​ការប្រមូលផ្តុំ ដែល​អាច​ផ្តល់​ផលចំណេញ​ច្រើន​ក្នុង​ការធ្វើ​ភ័ស្តុភារកម្ម​នេះ​។ ដូច្នេះ​ខ្ញុំ​សូម​គាំទ្រ​នូវ​គម្រោង​នេះ​»​។

លោក វ៉ាស៊ឹម សុរិយា អ្នកនាំពាក្យ​ក្រសួង​សាធារណការ និង​ដឹកជញ្ជូន ប្រាប់​ភ្នំពេញ​ប៉ុស្តិ៍​នៅ​ថ្ងៃទី​ ២៤ ខែកុម្ភៈ​ថា តាម​ផែនការ​របស់​រាជរដ្ឋាភិបាល​គឺ​ចង់បាន​មជ្ឈមណ្ឌល​ភ័ស្តុភារកម្ម​មួយ​ដែលមាន​ស្តង់ដា​នៅក្នុង​ទីក្រុង​ភ្នំពេញ និង​អាច​ប្រកួតប្រជែង​ជាមួយ​ប្រទេសជិតខាង និង​ពិភពលោក ទើប​រាជរដ្ឋាភិបាល​អនុញ្ញាត​ឱ្យ​ក្រុមហ៊ុន​សិង្ហបុរី​ទាំង​ ២ ​នេះ​ធ្វើការ​លើ​គម្រោង​អភិវឌ្ឍន៍​មជ្ឈមណ្ឌល​ភ័ស្តុភារកម្ម​ភ្នំពេញ​នេះ​។

លោក​ថ្លែងថា​៖ «​ក្រុមហ៊ុន YCH និង ក្រុមហ៊ុន PricewaterhouseCooper (PwC) គឺជា​អ្នកចំណាយ និង​សិក្សា​លើ​គម្រោង​នេះ​។ ក្រសួង​គ្រាន់តែ​ចង្អុលបង្ហាញ​ទីតាំង​នេះ ឬ​ទីតាំង​នោះ​ដែល​ត្រូវធ្វើ​ការសិក្សា​។ ពួកគាត់​បានមក​ពិភាក្សា​ជាមួយ​យើង​ដោយ​ពឹង​ផ្អែកលើ​ផែនការមេ​របស់​រាជរដ្ឋាភិបាល​កម្ពុជា​»៕ LA

អត្ថបទគួរចាប់អារម្មណ៍