.jpg)
ជំនួបពិភាក្សារវាងអាជ្ញាធរខេត្តព្រះសីហនុ និងភាគីរុស្ស៊ីនៅក្នុងខេត្តព្រះសីហនុ។ រូបថត សហការី
ព្រះសីហនុៈ មន្ត្រីជាន់ខ្ពស់រដ្ឋបាលខេត្តព្រះសីហនុបានឱ្យដឹងថា តំណាងរាស្ត្រ និងជាអនុប្រធានគណៈកម្មាធិការទទួលបន្ទុកកិច្ចការអន្តរជាតិរដ្ឋសភារុស្ស៊ី លោក Alexey V. Chepa បានអះអាងថា លោកនឹងខិតខំកៀរគរអ្នកវិនិយោគរុស្ស៊ីដើម្បីមកបណ្ដាក់ទុន និងធ្វើធុរកិច្ចនៅក្នុងខេត្តព្រះសីហនុឱ្យបានកាន់តែច្រើនថែមទៀត ជាពិសេសវិនិយោគផ្នែកបច្ចេកវិទ្យា និងឧស្សាហកម្មធុនធ្ងន់។
លោក ឡុង ឌីម៉ង់ អភិបាលរងខេត្តព្រះសីហនុ បានប្រាប់ភ្នំពេញប៉ុស្តិ៍កាលពីថ្ងៃទី ២៧ ខែ កុម្ភៈថា ការអះអាងនេះធ្វើឡើងក្នុងជំនួបពិភាក្សារវាងលោក គួច ចំរើន អភិបាលខេត្តព្រះសីហនុជាមួយតំណាងរាស្ត្រ និងជាអនុប្រធានគណៈកម្មាធិការទទួលបន្ទុកកិច្ចការអន្តរជាតិនៃរដ្ឋសភារុស្ស៊ី លោក Alexey V. Chepa កាលពីថ្ងៃទី ២៦ ខែកុម្ភៈ ខណៈដែលលោក Alexey V. Chepa ទៅបំពេញទស្សនកិច្ចនៅក្នុងខេត្តព្រះសីហនុ។
លោកបន្តថា លោក Alexey V. Chepa បានសន្យានឹងជំរុញឱ្យវិនិយោគិនរុស្ស៊ីចូលមកវិនិយោគក្នុងខេត្តព្រះសីហនុ បន្ទាប់ពីលោកមើលឃើញជាក់ស្តែងនូវការអភិវឌ្ឍយ៉ាងលឿនរបស់ខេត្តព្រះសីហនុ ព្រមទាំងកោតសរសើរនូវគោលនយោបាយរបស់រាជរដ្ឋាភិបាលដែលបានបោះទុនវិនិយោគសាធារណៈ កសាងហេដ្ឋារចនាសម្ព័ន្ធជាច្រើន ដើម្បីប្រែក្លាយខេត្តនេះទៅជាតំបន់សេដ្ឋកិច្ចពិសេសគំរូពហុបំណង។
លោក ឌីម៉ង់ បានប្រាប់ថា៖ «បន្ថែមលើនេះ លោក Alexey V. Chepa ក៏សន្យានឹងជំរុញឱ្យក្រុមហ៊ុនរុស្ស៊ីដែលកំពុងវិនិយោគលើកោះពស់អភិវឌ្ឍបន្តទោះបីជាក្នុងកាលៈទេសៈនៃវិបត្តិកូវីដក៏ដោយ»។
បើយោងតាមការផ្សព្វផ្សាយនៅលើទំព័រហ្វេសប៊ុករបស់រដ្ឋបាលខេត្តព្រះសីហនុកាលពីថ្ងៃទី ២៦ ខែកុម្ភៈ នៅក្នុងជំនួបពិភាក្សានោះ លោក គួច ចំរើន បានលើកឡើងថា ដោយសារទំនាក់ទំនងពាណិជ្ជកម្មកម្ពុជា និងរុស្ស៊ីនៅមានកម្រិត ហេតុនេះតាមរយៈទស្សនកិច្ចរបស់លោក Alexey V. Chepa លោកសូមឱ្យវិនិយោគិនរុស្ស៊ីចូលបានមកបណ្តាក់ទុនលើវិស័យទេសចរណ៍នៅក្នុងខេត្តព្រះសីហនុបន្តទៀត។
លោក គួច ចំរើន បញ្ជាក់ថា ខេត្តព្រះសីហនុមានការអភិវឌ្ឍលើគ្រប់វិស័យ ដូចជា កំពង់ផែទឹកជ្រៅ អាកាសយានដ្ឋានអន្តរជាតិ ផ្លូវដែក ផ្លូវល្បឿនលឿនតភ្ជាប់ពីរាជធានីភ្នំពេញមកខេត្តព្រះសីហនុ ដែលទាំងនេះ គឺជាសក្តានុពលសម្រាប់ផ្តល់ឱកាសឱ្យអ្នកវិនិយោគចូលមកបណ្តាក់ទុនក្នុងនោះក៏មានវិនិយោគិនរុស្ស៊ីផងដែរ។
លោក គួច ចំរើន បានថ្លែងថា៖ «ដោយសារបច្ចុប្បន្នខេត្តព្រះសីហនុមានអាកាសយានដ្ឋានអន្តរជាតិអាចឱ្យយន្តហោះឆ្លងទ្វីបចុះចតបាន ហេតុនេះខ្ញុំសង្ឃឹមថាឯកឧត្តម Alexey V. Chepa នឹងជួយផ្សព្វផ្សាយដល់អ្នកទេសចររុស្ស៊ី និងអ្នកវិនិយោគរុស្ស៊ីមកធ្វើការវិនិយោគនៅក្នុងខេត្តព្រះសីហនុកាន់តែច្រើននាពេលខាងមុខ ព្រោះកន្លងមកទេសចររុស្ស៊ីមកកាន់ខេត្តព្រះសីហនុជាប់ចំណាត់ថ្នាក់លេខ ៣ បន្ទាប់ពីទេសចរចិន និងវៀតណាម»។
តាមរយៈទំព័រហ្វេសប៊ុកខាងលើ លោក Alexey V. Chepa បានថ្លែងថា ការមកបំពេញទស្សនកិច្ចរបស់លោកក្នុងខេត្តព្រះសីហនុ គឺដើម្បីបង្កើនទំនាក់ទំនងកិច្ចសហប្រតិបត្តិការ សេដ្ឋកិច្ច និងវប្បធម៌ ឱ្យកាន់តែល្អថែមទៀត ខណៈខេត្តព្រះសីហនុមានការរីកចម្រើនលឿន ជាពិសេសការអភិវឌ្ឍហេដ្ឋារចនាសម្ព័ន្ធសម្បូរបែប និងសំណង់អគារខ្ពស់ជាច្រើន។
លោកនិយាយថា៖ «កាលពីលោកមកកាន់ខេត្តព្រះសីហនុកាលពីប៉ុន្មានឆ្នាំមុន មិនសូវឃើញមានជនជាតិរុស្ស៊ីច្រើនទេ បន្ទាប់ពីការផ្សព្វផ្សាយរបស់ទេសចររុស្ស៊ី បង្ហាញពីការស្វាគមន៍រាក់ទាក់របស់ប្រជាជនកម្ពុជាធ្វើឱ្យអ្នកទេសចររុស្ស៊ីចង់មកកម្ពុជាកាន់តែច្រើន។ យើងរំពឹងថា ទេសចររុស្ស៊ីនឹងបង្វែរមកកាន់កម្ពុជា ពិសេសខេត្តព្រះសីហនុ»។
ជាមួយគ្នានេះលោក Alexey V. Chepa បានគាំទ្រការហោះហើរត្រង់មកកាន់ខេត្តព្រះសីហនុ និងសៀមរាបផងដែរ។ ពាក់ព័ន្ធនឹងក្នុងដំណើរទស្សនកិច្ចនាពេលនោះលោក Alexey V. Chepa បានបង្ហាញបំណងអញ្ជើញប្រតិភូខេត្តព្រះសីហនុទៅទស្សនកិច្ចនៅប្រទេសរុស្ស៊ី និងប្រតិភូរុស្ស៊ីមកទស្សនកិច្ចខេត្តព្រះសីហនុវិញ ដើម្បីចងសម្ព័ន្ធភាពទីក្រុងព្រះសីហនុ និងទីក្រុង Veliky Novgorod នៃប្រទេសរុស្ស៊ីនៅពេលខាងមុខផងដែរ»៕ LA
