ភ្នំពេញៈធនាគារជាតិនៃកម្ពុជាបានសាទរចំពោះការដាក់ឱ្យប្រើប្រាស់នូវមូលនិធិបើកចំហរបស់ធនាគារក្នុងការទូទាត់អន្តរជាតិ (BIS) សម្រាប់ការវិនិយោគរបស់ធនាគារកណ្ដាលទៅលើសញ្ញាបណ្ណដែលមានចំណាត់ថ្នាក់ឥណទានខ្ពស់ ដែលបានចេញដោយរដ្ឋាភិបាល ស្ថាប័នហិរញ្ញវត្ថុអន្តរជាតិ និងក្រុមហ៊ុនសាជីវកម្ម។
មូលនិធិនេះត្រូវបានដាក់ឱ្យប្រើប្រាស់ជាផ្លូវការកាលពីថ្ងៃទី ២៥ ខែកុម្ភៈឆ្នាំ ២០២២ សម្រាប់ការវិនិយោគលើគម្រោងបៃតងនៅក្នុងតំបន់អាស៊ីប៉ាស៊ីហ្វិក ដើម្បីឆ្លើយតបនឹងការកើនឡើងនៃតម្រូវការ សម្រាប់ការវិនិយោគដែលគិតគូរដល់កិច្ចការពារបរិស្ថាន ក្នុងចំណោមស្ថាប័នផ្លូវការរបស់ខ្លួន។ គំនិតផ្ដួចផ្ដើមនេះ នឹងជួយដល់ធនាគារកណ្ដាលក្នុងការអនុវត្តគោលការណ៍បរិស្ថានប្រកបដោយចីរភាពទៅក្នុងការគ្រប់គ្រងទុនបម្រុង។ នេះបើយោងតាមសេចក្ដីប្រកាសព័ត៌មានរបស់ធនាគារជាតិនៃកម្ពុជា (NBC)។
សេចក្តីប្រកាសរបស់ NBC ឱ្យដឹងថា NBC មានសេចក្ដីសោមនស្ស ដោយបានក្លាយជាសមាជិកនៃគណៈកម្មាធិការប្រឹក្សាយោបល់ ដែលបានផ្ដល់ការគាំទ្រដល់គំនិតផ្តួចផ្ដើមនេះ ហើយ NBC ជាអ្នកវិនិយោគដំបូងលើសញ្ញាបណ្ណបៃតងនៅក្នុងតំបន់អាស៊ី សម្រាប់ផ្ដល់ហិរញ្ញប្បទានប្រកបដោយចីរភាព និងនវានុវត្តន៍នេះផងដែរ។
NBC ឱ្យដឹងទៀតថា៖ «ខណៈដែលបម្រែបម្រួលអាកាសធាតុ ត្រូវបានមើលឃើញថា ជាប្រភពចម្បងមួយ ដែលធ្វើឱ្យកំណើនសេដ្ឋកិច្ចមានភាពមិនច្បាស់លាស់ និងអាចផ្ដល់ផលប៉ះពាល់ជាអវិជ្ជមានទៅលើកត្តាសង្គម និងបរិស្ថាន ការផ្ដល់ហិរញ្ញប្បទានបៃតងនៅក្នុងតំបន់អាស៊ីអាចផ្ដល់នូវជម្រើសដែលមានគុណប្រយោជន៍ជាច្រើនសម្រាប់វិនិយោគិន ដើម្បីជួយការពារភពផែនដី»។ «ការវិនិយោគសញ្ញាបណ្ណបៃតង មិនត្រឹមតែផ្ដល់ប្រាក់ចំណេញប៉ុណ្ណោះទេ ប៉ុន្តែថែមទាំងផ្ដល់ផលវិជ្ជមានសម្រាប់បរិស្ថានផងដែរ ដោយសារតែសញ្ញាបណ្ណនេះ ត្រូវបានបង្កើតឡើងដើម្បីផ្ដល់ហិរញ្ញប្បទានដល់គម្រោងបៃតង ឬធុរកិច្ចដែលផ្ដល់ផលវិជ្ជមានដល់បរិស្ថានក្នុងតំបន់អាស៊ីប៉ាស៊ីហ្វិក ហើយជាលទ្ធផលធ្វើឱ្យនវានុវត្តន៍បៃតងកើនឡើង និងលើកកម្ពស់ការអភិវឌ្ឍប្រកបដោយចីរភាព»។
លោក ជា ចាន់តូ ទេសាភិបាល NBC បានឱ្យដឹងថា ហានិភ័យហិរញ្ញវត្ថុ និងអត្ថប្រយោជន៍នៃការវិនិយោគលើសញ្ញាបណ្ណបៃតង ក៏ដូចជាការការពារភពផែនដីផងដែរ។ លោកបន្តថា ការដាក់ឱ្យប្រើប្រាស់ BIS នៃគំនិតផ្តួចផ្តើមសញ្ញាបណ្ណបៃតងសម្រាប់ធនាគារកណ្តាលនឹងរួមចំណែកដល់ការកាត់បន្ថយហានិភ័យក្នុងវិស័យហិរញ្ញវត្ថុក៏ដូចជាផលប៉ះពាល់ដោយសារតែការប្រែប្រួលអាកាសធាតុ។
លោកថ្លែងថា៖ «ក្នុងនាមជាធនាគារកណ្ដាល តួនាទីរបស់យើងគឺចូលរួមកាត់បន្ថយហានិភ័យហិរញ្ញវត្ថុ ដែលបណ្ដាលមកពីផលប៉ះពាល់នៃការប្រែប្រួលអាកាសធាតុមកលើសេដ្ឋកិច្ច ស្ថានភាពសង្គម និងបរិស្ថាន។ យើងជឿថា ស្ថាប័ន ក៏ដូចជាបុគ្គលម្នាក់ៗអាចដើរតួនាទីយ៉ាងសំខាន់នៅក្នុងការរួមចំណែកដល់កំណើនប្រកបដោយសមធម៌ និងចីរភាព តាមរយៈនៃការកាត់បន្ថយល្បឿននៃការប្រែប្រួលអាកាសធាតុយ៉ាងឆាប់រហ័ស និងហានិភ័យនៃបម្រែបម្រួលនេះ។ យើងលើកទឹកចិត្តយ៉ាងខ្លាំងដល់គ្រឹះស្ថានហិរញ្ញវត្ថុទាំងអស់ឱ្យដាក់ចេញនូវគោលនយោបាយដែលលើកកម្ពស់ហិរញ្ញប្បទានបៃតង និងគាំទ្រការវិនិយោគដែលផ្ដល់ផលវិជ្ជមានដល់បរិស្ថាន»។
យោងតាមរបាយការណ៍ប្រចាំឆ្នាំ ២០២១ របស់ NBC កម្ចីដែលបានផ្ដល់ដោយគ្រឹះស្ថាប័នហិរញ្ញវត្ថុដល់គ្រប់វិស័យបានកើនឡើង ២១,២ ភាគរយដល់ ១៨៦,៤ ពាន់ពាន់លានរៀល (៤៥,៧ ពាន់លានដុល្លារ)។
NBC បានឱ្យដឹងទៀតថា ចំណែកគណនីបញ្ញើបានកើនដល់ ១២,១ លាន កើនឡើង ៤០,៧ ភាគរយ និងកម្ចីប្រើប្រាស់ផ្ទាល់ខ្លួន បានកើនឡើងដល់ ៣,៣ លានកើនឡើង ៥,១ ភាគរយបើធៀបនឹងរយៈពេលដូចគ្នាកាលពីឆ្នាំ ២០២០៕ LA