The Phnom Penh Post Search

Search form




Logo of Phnom Penh Post newspaper Phnom Penh Post - វិនិយោគិន​តួកគី ចាប់អារម្មណ៍​ការវិនិយោគ​លើ​វិស័យ​សំខាន់​ ៣ នៅ​កម្ពុជា

វិនិយោគិន​តួកគី ចាប់អារម្មណ៍​ការវិនិយោគ​លើ​វិស័យ​សំខាន់​ ៣ នៅ​កម្ពុជា

Content image - Phnom Penh Post
សំណង់​ធំៗ​បាន​លេច​ឡើងជា​បន្តបន្ទាប់​នៅក្នុង​ប្រទេស​កម្ពុជា​។ រូបថត រ៉ាស់ហ៊ីម

វិនិយោគិន​តួកគី ចាប់អារម្មណ៍​ការវិនិយោគ​លើ​វិស័យ​សំខាន់​ ៣ នៅ​កម្ពុជា

ភ្នំពេញៈ សហព័ន្ធ​ធុរជន​ផ្នែក​ឧស្សាហកម្ម និង​វិនិយោគិន​តួកគី​បានឱ្យ​ដឹងថា ខ្លួន​កំពុង​ចាប់អារម្មណ៍​ចំពោះ​ឱកាស​វិនិយោគ​ក្នុង​វិស័យ​សំណង់ ថាមពល និង​ធនធាន​រ៉ែ នៅក្នុង​ប្រទេស​កម្ពុជា​។

នៅក្នុង​ពិធីជប់លៀង​ទទួល​ស្វាគមន៍​គណៈប្រតិភូ​នៃ​សភា​ពាណិជ្ជកម្ម​កម្ពុជា​នៅ​ប្រទេស​តួកគី​កាលពី​ថ្ងៃទី​ ២៥ ខែកុម្ភៈ ឆ្នាំ​ ២០២២ រវាង​សហព័ន្ធ​ធុរជន​ឧស្សាហកម្ម​តួកគី ជាមួយ​នឹង​សភាពាណិជ្ជកម្ម​កម្ពុជា លោក Ferudun Cevahiroglu ប្រធាន​សហព័ន្ធ​ធុរជន​ឧស្សាហកម្ម​តួកគី​បាន​លើកឡើងថា វិនិយោគិន​តួកគី​មានការ​ចាប់អារម្មណ៍​ចំពោះ​សក្តានុពល​សេដ្ឋកិច្ចកម្ពុជា និង​កិច្ចសហប្រតិបត្តិការ​លើ​វិស័យ​សំខាន់ៗ​ដែល​ប្រទេស​ទាំង​ ២​ អាច​ប្រតិបត្តិ​រួមគ្នា​មានដូចជា សំណង់ ថាមពល និង​ធនធាន​រ៉ែ​។

លោក Ferudun Cevahiroglu បាន​ស្នើថា ស្ថាប័ន​ទាំង ​២ ​អាច​សិក្សា​រួមគ្នា​លើ​គម្រោង​អាទិភាព​មួយចំនួន បន្ទាប់មក​សហព័ន្ធ​ធុរជន​ឧស្សាហកម្ម​តួកគី​នឹង​ដឹកនាំ​គណៈប្រតិភូ​ធុរកិច្ច​ទៅកាន់​ប្រទេស​កម្ពុជា ដើម្បី​សិក្សា​លទ្ធភាព​សហការ និង​អនុវត្ត​គម្រោង​តែម្តង​។

អនុប្រធាន​សភាពាណិជ្ជកម្ម​កម្ពុជា លោក លឹម ហេង បាន​និយាយថា លោក​គាំទ្រ​ចំពោះ​ការអភិវឌ្ឍ​គម្រោង​រួមគ្នា​រវាង​ស្ថាប័ន​ទាំង​ ២ និង​បាន​ស្នើឱ្យ​ប្រធាន​សហព័ន្ធ​ធុរជន​ឧស្សាហកម្ម​តួកគី និង​គណៈប្រតិភូ​ទៅ​បំពេញ​ទស្សនកិច្ច​នៅ​កម្ពុជា ដើម្បី​សិក្សា​លទ្ធភាព​សហការ​លើ​គម្រោង​រួមគ្នា​។

លោក​បន្ថែមថា កម្ពុជា មាន​ទីផ្សារ​ទូលំទូលាយ​ដោយ​កម្ពុជា​បាន​ចុះ​កិច្ចព្រមព្រៀង​សេរី​ទ្វេភាគី​ជាមួយ​ចិន និង​កូរ៉េ កិច្ចព្រមព្រៀង​ភាពជា​ដៃគូ​សេដ្ឋកិច្ច​គ្រប់​ជ្រុងជ្រោយ​ក្នុង​តំបន់ ការ​-​នាំ​ផលិតផល​កម្ពុជា​ដោយ​មិន​ជាប់ពន្ធ​ទៅកាន់​អង់គ្លេស និង​សហគមន៍​អឺរ៉ុប (EBA) និង ការនាំចេញ​ផលិតផល​កម្ពុជា​ទៅ​សហរដ្ឋអាមេរិក​ក្នុង​ប្រព័ន្ធ​អនុគ្រោះ​ពន្ធ (GSP)​។

ចំពោះ​ការចាប់អារម្មណ៍​របស់​វិនិយោគិន​តួកគី​នៅក្នុង​វិស័យ​សំណង់ ថាមពល និង​ធនធាន​រ៉ែ​របស់​កម្ពុជា​នេះដែរ​ត្រូវបាន​លោក អ៊ឹង ឌីប៉ូឡា អគ្គនាយក​​នៃ​អគ្គនាយកដ្ឋាន​ធនធាន​រ៉ែ ក្រសួង​រ៉ែ និង​ថាមពល​បាន​ប្រាប់​ភ្នំពេញ​ប៉ុស្តិ៍​ថា កម្ពុជា​ស្វាគមន៍​រាល់​វិនិយោគិន​ទាំងអស់​ទាំង​ក្នុង និង​ក្រៅប្រទេស ដែល​ចង់​វិនិយោគ​លើ​វិស័យ​រ៉ែ ដើម្បី​អភិវឌ្ឍ​វិស័យនេះ​ឱ្យ​កាន់តែ​ប្រសើរឡើង​នៅ​កម្ពុជា​។

លោក​បន្ថែមថា បើសិន​មាន​ក្រុមហ៊ុន​ធំៗ ដែល​មាន​បទពិសោធ​លើ​ផ្នែក​វិស័យ​រ៉ែ​នេះ គឺ​កាន់តែ​ប្រសើរ ព្រោះ​វិស័យ​រ៉ែ​នៅ​កម្ពុជា​ត្រូវការ​បច្ចេកទេស​ខ្ពស់ ដើម្បី​អភិវឌ្ឍ​វិស័យនេះ​ប្រកបដោយ​ចីរភាព​។

លោក​បញ្ជាក់ថា​៖ «​ដូច​យើង​ដឹង​ហើយ​ថា ការធ្វើ​រ៉ែ ក៏ដូចជា​ការអភិវឌ្ឍ​ផ្សេងៗ​ទៀត​ដែរ គឺ​វា​តែងតែមាន​ការប៉ះពាល់​ហើយ តិច ឬ​ច្រើន ប៉ុន្តែ​យើង​ខិតខំ​ធ្វើយ៉ាងណា​ឱ្យ​ការអភិវឌ្ឍ​នោះ​ត្រូវ​គិតដល់​សង្គម និង​បរិស្ថាន ក៏ដូចជា​សេដ្ឋកិច្ចជាតិ​ឱ្យបាន​ខ្ពស់​។ ដូចនេះ​បើ​មាន​ក្រុមហ៊ុន​មាន​បទពិសោធ ក្នុងការ​អភិវឌ្ឍ​វិស័យ​រ៉ែ​នេះ ក្រសួង​រ៉ែ និង​ថាមពល ក៏ដូចជា​កម្ពុជា ស្វាគមន៍​ជានិច្ច​តាមរយៈ​ការវិនិយោគ​ដោយ​ខ្លួនឯង ឬ​ស្វែងរក​ដៃគូ​វិនិយោគ​នៅ​កម្ពុជា​»​។

បើតាម លោក ឌីប៉ូឡា សព្វថ្ងៃ​មាន​ក្រុមហ៊ុន​មកពី​ប្រទេស​មួយចំនួន​រួមមាន អូស្ត្រាលី កាណាដា ជប៉ុន កូរ៉េ ចិន ឥណ្ឌា និង​កម្ពុជា​ខ្លួនឯង ដែល​បាននិងកំពុង​វិនិយោគ​ក្នុង​វិស័យ​​សំណង់ និង​រ៉ែ​លោហៈ​៕ LA

អត្ថបទគួរចាប់អារម្មណ៍