ភ្នំពេញៈ រាជធានីភ្នំពេញនឹងស្វាគមន៍ក្រុមហ៊ុនបដិសណ្ឋារកិច្ចឈានមុខគេលំដាប់ពិភពលោក គឺក្រុមហ៊ុន Accor ដែលគ្រោងនឹងបើកដំណើរការសណ្ឋាគារ ibis budget Phnom Penh Riverside ជាលើកដំបូងរបស់ខ្លួននៅខែកក្កដា ខាងមុខ។
បើយោងតាមសារព័ត៌មាន Global Travel Media ដែលបានចេញផ្សាយកាលពីថ្ងៃទី ២៦ ខែកុម្ភៈ សណ្ឋាគារនេះនឹងផ្តល់ជូននូវសេវាដ៏មានផាសុខភាព និងការរចនាបែបសហសម័យជាមួយតម្លៃប្រកួតប្រជែងយ៉ាងខ្លាំង។ សណ្ឋាគារដែលប្រកួតប្រជែងយ៉ាងខ្លាំង។ សណ្ឋាគារដែលមាន ៣២២ បន្ទប់នេះនឹងរួមបញ្ចូលឆន្ទៈដ៏រឹងមាំ ដែលមានការរចនាបែបសហសម័យនៅតាមបន្ទប់នីមួយៗ និងទីកន្លែងសាធារណៈផងដែរ។
ibis budget Phnom Penh Riverside នឹងស្ថិតក្នុងទីតាំងយុទ្ធសាស្ត្រនៃខណ្ឌចំការមន។
លោក Garth Simmons អគ្គនាយកក្រុមហ៊ុន Accor ទទួលបន្ទុកអាស៊ីអាគ្នេយ៍ ប្រទេសជប៉ុន និងកូរ៉េខាងត្បូងបាននិយាយថា ibis Budget Phnom Penh Riverside នឹងក្លាយទៅជាសណ្ឋាគារមួយក្នុងចំណោមសណ្ឋាគារជាច្រើន ដែលពេញនិយមជាងគេសម្រាប់អ្នកធ្វើដំណើរ។
លោក Simmons ថ្លែងថា៖ «យើងមានសេចក្តីសោមនស្សយ៉ាងខ្លាំងក្នុងការពង្រីកបណ្តាញសណ្ឋាគាររបស់យើងនៅក្នុងប្រទេសកម្ពុជាជាមួយនឹងការដាក់ឱ្យមានអាសយដ្ឋានសណ្ឋាគារ ibis budget តម្លៃទាបលើកដំបូងរបស់យើងនៅក្នុងប្រទេសមួយនេះ។ ibis budget គឺជាយីហោឈានមុខមួយរបស់ក្រុមហ៊ុន Accor ក្នុងផ្នែកសេដ្ឋកិច្ច ដោយភ្ញៀវទទួលបានតម្លៃដ៏អស្ចារ្យសម្រាប់ទីតាំងប្រកបដោយផាសុកភាព ទំនើប និងមានមុខងារពិសេសៗជាច្រើនទៀត»។
លោកបន្ថែមថា៖ «ក្នុងការអភិវឌ្ឍផែនការសម្រាប់យីហោនេះ យើងតែងតែស្វែងរកទីតាំងដែលមានភាពទាក់ទាញខ្លាំង ជាមួយនឹងលទ្ធភាពទទួលបានការប្រើប្រាស់ដោយងាយស្រួល។ យើងជឿថា សណ្ឋាគារ ibis budget Phnom Penh Riverside នឹងក្លាយជាកន្លែងពេញនិយមជាងគេនៅក្នុងចំណោមអ្នកធ្វើដំណើរដែលស្វែងរកកន្លែងស្នាក់នៅ»។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជាបានប្រាប់ភ្នំពេញប៉ុស្តិ៍ ក្នុងថ្ងៃទី ២៨ ខែ កុម្ភៈថា វត្តមានរបស់សណ្ឋាគារ ibis នឹងមិនត្រឹមតែបម្រើភ្ញៀវទេសចរក្នុងស្រុកដែលចូលចិត្តយីហោៗលំដាប់ពិភពលោកប៉ុណ្ណោះទេ ប៉ុន្តែវាក៏នឹងជួយទាក់ទាញភ្ញៀវទេសចរបរទេសកាន់តែច្រើនជាមួយនឹងឈ្មោះដ៏ល្បីល្បាញរបស់ពួកគេផងដែរ។
លោកបានថ្លែងថា៖ «យើងស្វាគមន៍ចំពោះការចូលទីផ្សារនៃយីហោពិភពលោកកាន់តែច្រើនទៅក្នុងឧស្សាហកម្មបដិសណ្ឋារកិច្ចរបស់យើង ព្រោះវាមិនត្រឹមតែបម្រើដល់ភ្ញៀវទេសចរក្នុងស្រុកយើងប៉ុណ្ណោះទេ ប៉ុន្តែវាថែមទាំងទាក់ទាញភ្ញៀវទេសចរបរទេសឱ្យចូលមកកាន់តែច្រើនផងដែរ។ ibis គឺជាយីហោពិភពលោក ហើយវានឹងល្បីនៅក្នុងចំណោមប្រជាជនរបស់យើង ខណៈប្រជាជនរបស់យើងក៏ចូលចិត្តយីហោពិភពលោកដែរ»។
Accor គឺជាប្រតិបត្តិករអន្តរជាតិឈានមុខគេមួយនៅកម្ពុជា ដែលមានសណ្ឋាគារចំនួន ៥ មានយីហោ ដូចជាសណ្ឋាគារ Raffles, សណ្ឋាគារ Sofitel និងសណ្ឋាគារ ibis Styles នៅខេត្តសៀមរាប និងរាជធានីភ្នំពេញ និងនៅមានគម្រោងចំនួន ៤ ទៀតនៅទូទាំងប្រទេសកម្ពុជា។ ibis budget Phnom Penh Riverside នឹងធ្វើឱ្យវត្តមានសណ្ឋាគារ ibis budget ជាង ៦៣៥ នៅទូទាំងពិភពលោកនៅក្នុង ២០ ប្រទេស៕ LA