.jpg)
បុគ្គលិកស្ថានីយឡើងប្តូរតារាងតម្លៃប្រេងកាលពីថ្ងៃទី ១ ខែមីនា ឆ្នាំ ២០២២។ ហេង ជីវ័ន
ភ្នំពេញៈ អ្នកជំនាញសេដ្ឋកិច្ច និងអ្នកជំនួញក្នុងផ្នែកផលិតកម្មកំពុងបារម្ភពីការកើនឡើងនៃតម្លៃប្រេងឥន្ធនៈឥតឈប់ឈរដែលនឹងធ្វើឱ្យថ្លៃដើមផលិតកើនឡើង ជាពិសេសក្រោយពេលវិបត្តិសង្គ្រាមរវាងប្រទេសរុស្ស៊ី និងប្រទេសអ៊ុយក្រែនបានផ្ទុះឡើង។
តម្លៃប្រេងឆៅអន្តរជាតិបានបន្ដហក់ឡើងថ្លៃបន្ថែមទៀតនាដើមសប្ដាហ៍នេះ បន្ទាប់ពីលោក ពូទីន ប្រធានាធិបតីរុស្ស៊ីបានប្រកាសដាក់អាវុធនុយក្លែអ៊ែរត្រៀមទុកប្រុងជើងការ អំឡុងពេលមានសង្គ្រាមបង្ហូរឈាមយ៉ាងក្ដៅគគុកជាមួយប្រទេសអ៊ុយក្រែន។ កាលពីថ្ងៃទី ១ ខែមីនា ឆ្នាំ ២០២២ តម្លៃប្រេងឆៅនៅទីផ្សារអង់គ្លេស បានហក់ឡើងដល់ជិត ១០០ ដុល្លារអាមេរិកក្នុងធុងបារ៉ែល ដែលកើនឡើងជាង ១,៩៣ ដុល្លារបន្ថែមទៀត។ នេះបើតាម គេហទំព័រ oilprice.com។
លោក ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាបានប្រាប់ភ្នំពេញប៉ុស្តិ៍ថា តម្លៃប្រេងឥន្ធនៈឡើងថ្លៃខ្ពស់គឺជានិន្នាការរបស់សកលលោក ជាពិសេសចាប់ពីពាក់កណ្តាលឆ្នាំ ២០២១ ក្រោយពីវិបត្តិកូវីដមានភាពធូរស្រាល ដែលធ្វើឱ្យវិស័យផលិតកម្មមានសកម្មភាពឡើងវិញ ប្រេងឥន្ធនៈចាប់ផ្តើមឡើងថ្លៃជាបន្តបន្ទាប់។
លោកបន្ថែមថា នៅពេលថ្មីៗនេះជម្លោះរវាងរុស្ស៊ីជាមួយនឹងអ៊ុយក្រែនក៏ជាបញ្ហាថ្មីមួយដែលជំរុញឱ្យតម្លៃប្រេងអន្តរជាតិនៅតែមានតម្លៃខ្ពស់ និងបន្តកើនឡើងថែមទៀត។
លោកបញ្ជាក់ថា៖ «បើសិនបញ្ហារុស្ស៊ី និងអ៊ុយក្រែននៅតែបន្ត ហើយក្រុមប្រទេស OPEC នៅតែមិនព្រមបង្កើនផលិតកម្មរបស់ខ្លួន តម្លៃប្រេងឥន្ធនៈនៅតែមិនងាយនឹងចុះវិញទេ»។
លោក វណ្ណៈ យល់ឃើញថា ក្នុងអំឡុងពេលវិបត្តិសង្គ្រាមនេះច្បាស់ជាមានការឆ្លៀតឱកាសថែមទៀតពីប្រទេសអ្នកផលិតប្រេងខ្លះ ក្នុងការបង្កើននូវតម្លៃប្រេងឥន្ធនៈដោយយកលេសថា ការផ្គត់ផ្គង់មិនគ្រប់គ្រាន់។
បែបនេះក្តី លោកលើកឡើងថា ទោះបីជាសង្គ្រាមរវាងរុស្ស៊ី និងអ៊ុយក្រែន ត្រូវបានបញ្ចប់ ក៏តម្លៃប្រេងមិនអាចចុះថ្លៃបានច្រើនដែរ ដែលនេះនឹងបន្តមានផលប៉ះពាល់សម្រាប់បណ្តាប្រទេសនាំចូលប្រេងដូចជាកម្ពុជា ដោយនឹងធ្វើឱ្យការផលិតត្រូវចំណាយថ្លៃដើមកាន់តែខ្ពស់។
លោកស្រី កែវ មុំ ម្ចាស់ក្រុមហ៊ុនផលិតនំស្រួយលីលី បានប្រាប់ថា ការឡើងថ្លៃប្រេងឥន្ធនៈបានធ្វើឱ្យប៉ះពាល់ទៅដល់ខ្សែចង្វាក់ផលិតកម្មរបស់ក្រុមហ៊ុន ជាពិសេសការចំណាយលើការដឹកជញ្ជូនកាន់តែច្រើន ខណៈដែលការលក់ផលិតផលរបស់ក្រុមហ៊ុនមិនមានការកើនឡើងទាល់តែសោះ។
លោកស្រីបន្ថែមថា ជារឿងគួរឱ្យបារម្ភណាស់ដោយសារបច្ចុប្បន្នការផលិតរបស់ក្រុមហ៊ុនស្ទើរតែខាតទៅហើយ ដោយសារវត្ថុធាតុដើមឡើងគ្រប់មុខនាំឱ្យចំណាយកើនឡើង ប៉ុន្តែការលក់ផលិតផលវិញមានការធ្លាក់ចុះ។
លោកស្រីប្រាប់ថា៖ «បើសិនប្រេងឥន្ធនៈនៅតែបន្តឡើងថ្លៃទៀត ពិតណាស់មិនត្រឹមតែប៉ះពាល់ដល់ឧស្សាហកម្មក្នុងស្រុកនោះទេ គឺប៉ះពាល់ដល់ជីវភាពពលរដ្ឋទាំងអស់ ដោយសារតែសព្វថ្ងៃនេះតម្រូវការប្រើប្រាស់ប្រេងឥន្ធនៈច្រើនសម្រាប់យានយន្ត ហើយផ្នែកផលិតកម្មប៉ះពាល់ខ្លាំងជាងគេ»។
ដោយឡែក លោក លន់ យ៉េង អគ្គលេខាធិការនៃលេខាធិការដ្ឋានសហព័ន្ធស្រូវអង្ករកម្ពុជាបាននិយាយថា សម្រាប់វិស័យស្រូវអង្ករ តម្លៃប្រេងឥន្ធនៈមិនទាន់ចោទជាបញ្ហាខ្លាំងពេកទេ ទោះបីជាមានសង្គ្រាមរវាងរុស្ស៊ី និងអ៊ុយក្រែនក៏ដោយ ព្រោះប្រេងឥន្ធនៈឡើងថ្លៃនេះ មានកត្តាគួបផ្សំជាច្រើនទៀត។
លោកបន្ថែមថា បញ្ហាធំរបស់ផ្នែកស្រូវអង្ករនៅតែជាកង្វះទូកុងតឺន័រ និងការដឹកជញ្ជូនទៅឆ្ងាយ។ លោកបន្តថា ការបន្ថយការផលិតវត្ថុធាតុដើមសម្រាប់ផលិតជីកសិកម្ម និងតម្លៃដឹកជញ្ជូនបានធ្វើឱ្យតម្លៃជីកើនឡើង ដោយមិនត្រឹមតែកម្ពុជាទេដែលជួបបញ្ហានេះ ប្រទេសផ្សេងទៀតនៅក្នុងពិភពលោកជួបបញ្ហានេះដូចគ្នា។
លោកបញ្ជាក់ថា៖«វត្ថុធាតុ-ដើមមួយចំនួនមាននៅប្លុករុស្ស៊ីខ្លះដែរ ដោយសារតែមានតម្រូវការកាកប្រេង ដើម្បីយកធ្វើជាវត្ថុធាតុដើម ខណៈមានប្រទេសខ្លះទៀតបានកាត់បន្ថយការផលិតវត្ថុធាតុដើម ដោយសារតែបញ្ហាការឡើងកម្តៅផែនដី ដែលជំរុញឱ្យការផលិតជីមានការឡើងថ្លៃ»៕ LA
វីដេអូ៖
