ភ្នំពេញៈ កម្ពុជា​បាន​នាំចេញ​កសិផល​ទៅ​ក្រៅប្រទេស​ចំនួន​ជាង ១,៨ ​លាន​តោន​នៅក្នុង​រយៈពេល ២ ​ខែ​ដើមឆ្នាំ​ ២០២២ កើន​ជិត ១០​ ភាគរយ ស្មើនឹង​ជិត ១៦​ ម៉ឺន​តោន បើ​ធៀប​រយៈពេល​ដូចគ្នា​ក្នុង​ឆ្នាំ​ ២០២១​។

យោងតាម​របាយការណ៍​នាំចេញ​កសិផល​ទៅ​ក្រៅប្រទេស​ពី​ក្រសួងកសិកម្ម រុក្ខាប្រមាញ់ និង​នេសាទ ការនាំចេញ​កសិផល​ចាប់ពី​ខែមករា ដល់​ចុងខែ​កុម្ភៈ ឆ្នាំ​ ២០២២ សម្រេចបាន​ប្រមាណ ១ ៨៣៥ ៤៧៥,៧០ ​តោន​កើនឡើង​ ១៥៩ ៣៣១, ៣៣ ​តោន ស្មើនឹង ៩,៥១ ​ភាគរយ​បើ​ធៀប​ទៅនឹង​រយៈពេល​ដូចគ្នា​ឆ្នាំ​ ២០២១ ដែលមាន​ចំនួន ១ ៦៧៦ ១៤៤,៣៧ ​តោន​។ ក្នុងនោះ​ការនាំចេញ​អង្ករ​មាន​ចំនួន ១០៣ ០៥៨ ​តោន កើន ២៦ ៨៣៦ ​តោន​ (៣៥,២១​ ភាគរយ​) និង​ការនាំចេញ​ស្រូវ​សម្រេចបាន ៦៥១ ១០១ ​តោន កើនឡើង ៩២ ០៦៨ ​តោន​ (១៦,៤៧​ ភាគរយ​) បើ​ធៀប​នឹង​រយៈពេល​ដូចគ្នា​ឆ្នាំ​ ២០២១​។ កសិផល​ផ្សេងទៀត ក្រៅពី​ស្រូវ និង​អង្ករ​នាំចេញ​បាន​ចំនួន ១ ៣១៨ ៦៤២,៧០ ​តោន កើន ០,៥០​ ភាគរយ​។

រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ លោក វេង សាខុន បាន​ប្រាប់​ ភ្នំពេញ​ ប៉ុស្តិ៍ ​ក្នុង​ថ្ងៃទី​ ១ ខែមីនា​ថា កត្តា​ដែល​ជំរុញ​ឱ្យ​ការនាំចេញ​កសិផល​របស់​កម្ពុជា​មាន​កំណើន​បែបនេះ ដោយសារតែ​ការផលិត​របស់​កសិករ​មានការ​កើនឡើង ខណៈ​តម្រូវការ​នៅលើ​ទីផ្សារ​ក៏មាន​ច្រើន​ដូចគ្នា​។

លោក​ថ្លែងថា​៖ «​ក្នុង​បរិបទ​នេះ មាន​ប្រទេស​មួយចំនួន​មិនអាច​ផលិត​បាន តែ​កម្ពុជា​អាច​ផលិត​បាន ខណៈ​មាន​ប្រទេស​មួយចំនួន​កំពុងមាន​តម្រូវការ​ផលិតផល​កសិកម្ម​ខ្ពស់​ខ្លាំង​។ ម្យ៉ាងទៀត​ថ្មីៗ​នេះ មាន​ប្រទេស​ខ្លះ​បាន​ផ្លាស់ប្តូរ​មុខ​ដំណាំ​ដាំដុះ​របស់គេ ដោយ​ការជ្រើសរើស​ដាំ​ដំណាំ​ណា​ដែល​ទទួល​បាន​ប្រាក់ចំណេញ​ច្រើន ខណៈ​កម្ពុជា​យើង​មាន​អំណោយផល​អាកាសធាតុ​ផង​នោះ ជា​កត្តា​ជំរុញ​ឱ្យ​ការនាំចេញ​កសិផល​ ២ ​ខែ​កើនឡើង​ដូច្នេះ​»​។

លោក សុង សារ៉ន ប្រធាន​សហព័ន្ធ​ស្រូវ​អង្ករ​កម្ពុជា​បាន​និយាយថា កំណើន​ការនាំចេញ​ស្រូវ-​អង្ករ ព្រោះតែ​ការផលិត​ស្រូវប្រាំង​របស់​ប្រជាកសិករ​កើនឡើង ដោយសារ​ប្រព័ន្ធធារាសាស្ត្រ មាន​លក្ខណៈ​ល្អប្រសើរ​ជាង​មុន​។

លោក​បន្ថែមថា ការនាំចេញ​អង្ករ​ពី​កម្ពុជា​ទៅ​ប្រទេស​ចិន​ កើនឡើង​ច្រើន ដោយសារតែ​ប្រទេស​នេះ​បាន​អនុវត្តតាម​អនុស្សរណៈ​យោគយល់​គ្នា​ដែល​បាន​ចុះហត្ថលេខា​កាលពី​ពេល​ថ្មីៗ​នេះ​ចំនួន ៤០ ​ម៉ឺន​តោន ដូចនេះ​ភាគី​ចិន​បាន​បង្កើន​ការទិញ​អង្ករ​ពី​កម្ពុជា ដែល​បាន​ជំរុញឱ្យ​ការនាំចេញ​ជា​ផ្លូវ​ការកើនឡើង​ខ្លាំង​ដល់​ជិត ៦០ ​ភាគរយ​។

លោក សារ៉ន បាន​បញ្ជាក់ថា​៖ «​ប្រសិន​មិនមាន​អ្វី​ប្រែប្រួល​ទេ យើង​នឹង​នាំចេញ​អង្ករ​ទៅ​ប្រទេស​ចិន​ក្នុង​រង្វង់ ៧៥ ​ម៉ឺន​តោន នៅក្នុង​ឆ្នាំ​ ២០២២ នេះ​។ បែបនេះ​ក្តី នៅមាន​បញ្ហា​ប្រឈម​សំខាន់​មួយ គឺ​ការដឹកជញ្ជូន​ផ្លូវឆ្ងាយ ដោយសារ​យើង​នៅ​ខ្វះ​ទូ​កុងតឺន័រ​សម្រាប់​ផ្ទុក ថ្វីដ្បិតតែ​វា​ធូរស្រាល​ជាង​ឆ្នាំ​ ២០២១ ប៉ុន្តែ​មិនបាន​ប្រសើរឡើង​ខ្លាំង​ទេ ខណៈ​ដែល​តម្លៃ​នៃ​ការដឹកជញ្ជូន​ទៅកាន់​តំបន់​អឺរ៉ុប​នៅមាន​តម្លៃ​ថ្លៃ​ដដែល​»​។

ទោះយ៉ាងណា​លោក​បញ្ជាក់ថា ក្រសួងពាណិជ្ជកម្ម និង​សហព័ន្ធ​ស្រូវ​អង្ករ​កម្ពុជា បាន​ងាក​មក​ពង្រីក​ទីផ្សារ​ក្នុង​តំបន់​អាស៊ាន និង​តំបន់​អាស៊ី​វិញ ជាពិសេស​ទៅ​បណ្តា​ប្រទេស​ដែលមាន​ការដឹកជញ្ជូន​ស្រួល​។

ថ្មីៗ​នេះ​នៅក្នុង​ជំនួប​ជាមួយ​នាយករដ្ឋមន្ត្រី​ម៉ាឡេស៊ី​នៅ​វិមាន​សន្តិភាព លោកនាយក​រដ្ឋមន្ត្រី ហ៊ុន សែន បាន​អំពាវនាវ​ឱ្យ​ប្រទេស​ម៉ាឡេស៊ី​បង្កើន​ការទិញ​អង្ករ​ពី​ប្រទេស​កម្ពុជា​បន្ថែមទៀត ខណៈដែល​ភាគី​ម៉ាឡេស៊ី​បាន​យល់ព្រម​នឹង​ពិចារណា​សំណើ​លើ​នេះ ដើម្បី​បង្កើន​ទំហំ​ពាណិជ្ជកម្ម​រវាង​ប្រទេស​ទាំង​ ២៕ LA