ភ្នំពេញៈ Win crown(Cambodia) Industrial បានក្លាយជាក្រុមហ៊ុនដំបូងគេដែលទទួលបានវិញ្ញាបនបត្របញ្ជាក់ដើមកំណើតទំនិញ (CO) ដើម្បីនាំចេញទំនិញទៅប្រទេសចិន ក្រោមកិច្ចព្រមព្រៀងពាណិជ្ជកម្មភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP)។
អ្នកនាំពាក្យក្រសួងពាណិជ្ជកម្ម លោក ស៊ាង ថៃ បានប្រាប់ភ្នំពេញប៉ុស្តិ៍កាលពីថ្ងៃទី ១ ខែមីនា ថា បន្ទាប់ពីកិច្ចព្រមព្រៀង RCEP ចូលជាធរមាន បច្ចុប្បន្នមានក្រុមហ៊ុនមួយហើយ ដែលបានទទួលការអនុញ្ញាតឱ្យនាំចេញទំនិញក្រោមកិច្ចព្រមព្រៀងនេះ ដែលជាក្រុមហ៊ុននាំចេញស្បែកជើងបុរស-នារីទៅកាន់ប្រទេសចិន។
លោកបញ្ជាក់ថា៖ «ក្រុមហ៊ុន Win crown (Cambodia) Industrial Company Limited បាននាំចេញស្បែកជើងបុរស-នារី ចំនួន ៦ ប្រភេទមានលេខ HS code 640299 ស្មើនឹង ៥ ៥៨២ គូទៅកាន់ប្រទេសចិន ក្រោមក្របខ័ណ្ឌ RCEP។ ក្រុមហ៊ុនមួយនេះបាននាំចេញទំនិញកាលពីថ្ងៃទី ៣ ខែកុម្ភ: ឆ្នាំ ២០២២ និងបានមកសុំ CO form RCEP ពីក្រសួងពាណិជ្ជកម្ម ហើយក្រសួងបានពិនិត្យ និងចេញ CO ជូនកាលពីថ្ងៃទី ២២ ខែកុម្ភ: ឆ្នាំ ២០២២»។
លោកបន្តថា មានក្រុមហ៊ុន ២-៣ ទៀតបានមកសួរព័ត៌មាន ជាពិសេសលក្ខខណ្ឌក្នុងការទទួលបាន CO ក្រោមលក្ខខណ្ឌ RCEP នេះជុំវិញការនាំចូលវត្ថុធាតុដើមមកផលិតនៅកម្ពុជា ដើម្បីនាំចេញទៅបានក្រោមកិច្ចព្រមព្រៀងនេះ។
លោកអះអាងថា៖ «ការស្នើសុំវិញ្ញាបនបត្របញ្ជាក់ដើមកំណើតទំនិញពីក្រសួងពាណិជ្ជកម្ម មិនមានភាពស្មុគស្មាញច្រើនទេ ដោយការស្នើសុំអាចធ្វើតាមអនឡាញដូចការស្នើសុំផ្សេងៗទៀតដែរ។ ខ្ញុំរំពឹងថានៅថ្ងៃខាងមុខនឹងមានក្រុមហ៊ុនមកស្នើសុំ CO បន្តបន្ទាប់ទៀត»។
បើតាម លោក ស៊ាង ថៃ ដើម្បីសម្រួលដល់ការនាំចេញ ក្រសួងបានអនុញ្ញាតឱ្យក្រុមហ៊ុននាំចេញ អាចនាំចេញទំនិញទៅមុន ហើយមកស្នើសុំ CO ជាក្រោយបាន។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក គី សេរីវឌ្ឍន៍ បានឱ្យដឹងថា ការស្នើសុំវិញ្ញាបនបត្របញ្ជាក់ដើមកំណើតទំនិញ (CO) ដើម្បីនាំចេញទំនិញទៅក្រៅប្រទេស ក្រោមកិច្ចព្រមព្រៀង RCEP នៅមានកម្រិត ដោយសារតែផលិតកម្មរបស់កម្ពុជានៅមានកម្រិត គួបផ្សំនឹងវិបត្តិកូវីដ ១៩ ដែលជាបញ្ហាចម្បង។
លោកបន្ថែមថា ផលិតកម្មរបស់កម្ពុជានៅមានកម្រិត ជាពិសេសក្នុងវិស័យ SME ខណៈវិបត្តិកូវីដ ១៩ នៅតែជាបញ្ហារាំងស្ទះ និងជំរុញឱ្យប្រទេសមួយចំនួនធំបន្តប្រើប្រាស់ផលិតផលក្នុងស្រុកនៅឡើយ។ ម្យ៉ាងវិញទៀត នៅក្នុងបណ្តាប្រទេស RCEP ប្រទេសដែលរីកចម្រើនមានតែអូស្ត្រាលី ជប៉ុន និងនូវែលសេឡង់ ខណៈប្រទេសក្នុងតំបន់អាស៊ានផ្សេងទៀតក៏មានផលិតកម្មប្រហាក់ប្រហែលនឹងកម្ពុជាដែរ។
ហេតុផលផ្សេងទៀត លោក សេរីវឌ្ឍន៍ យល់ឃើញថា ការចូលជាធរមាននៃកិច្ចព្រមព្រៀងនេះ ក៏ជារឿងថ្មីថ្មោងដែរ ដូចនេះអាចនៅឆ្នាំ ២០២៣ នឹងមានក្រុមហ៊ុននាំចេញក្រោមកិច្ចព្រមព្រៀងនេះច្រើន ព្រោះនៅពេលទីផ្សារមានការកែតម្រូវនឹងអាចបង្កើនឱ្យមានការបែងចែកផលិតកម្មផ្សេងៗទៅតាមថ្លៃដើមទាប ឬខ្ពស់។
ក្រសួងពាណិជ្ជកម្មគ្រោងនឹងរៀបចំសិក្ខាសាលាផ្សព្វផ្សាយជូនដល់ក្រុមហ៊ុនផលិត និងនាំចេញក្នុងពេលឆាប់ៗខាងមុខ ដើម្បីជួយជំរុញកំណើននាំចេញក្រោមកិច្ចព្រមព្រៀង RCEP នេះ ក៏ដូចជាកិច្ចព្រមព្រៀងពាណិជ្ជកម្មសេរីកម្ពុជា-ចិន ឱ្យកាន់តែល្អប្រសើរ៕ LA