ភ្នំពេញៈ និយតករមូលបត្រកម្ពុជា និងប្រតិបត្តិករទីផ្សារកម្ពុជាបានសាទរចំពោះការសម្រេចចិត្តរបស់រដ្ឋាភិបាលក្នុងការបន្តផ្តល់ការលើកទឹកចិត្តផ្នែកពន្ធក្នុងរយៈពេល ៣ ឆ្នាំបន្ថែមទៀតដល់ក្រុមហ៊ុនសក្តានុពលទាំងឡាយដែលមានបំណងបោះផ្សាយមូលបត្រកម្មសិទិ្ធ និងមូលបត្របំណុល ដែលជាផ្នែកមួយក្នុងការចូលរួមចំណែកដល់ការអភិវឌ្ឍទីផ្សារមូលបត្រនៅកម្ពុជា។
យោងតាមអនុក្រឹត្យដែលចុះហត្ថលេខា ដោយលោកនាយករដ្ឋមន្ត្រី ហ៊ុន សែន ចុះថ្ងៃទី ២៤ ខែកុម្ភៈ ការលើកទឹកចិត្តផ្នែកពន្ធនឹងមានរយៈពេល ៣ ឆ្នាំនៃការកាត់បន្ថយពន្ធលើប្រាក់ចំណូលចំនួន ៥០ ភាគរយសម្រាប់ក្រុមហ៊ុន ឬសហគ្រាសដែលបោះផ្សាយកម្មសិទ្ធិចុះបញ្ជីភាគហ៊ុនរបស់ពួកគេលើសពី ២០ ភាគរយនៃភាគហ៊ុនដែលមានសិទ្ធិបោះឆ្នោត ចំណែកសម្រាប់ក្រុមហ៊ុន ឬសហគ្រាសមានបំណងបោះផ្សាយមូលបត្របំណុលលើសពី ២០ ភាគរយនៃទ្រព្យសកម្មសរុបនឹងទទួលបានការកាត់បន្ថយពន្ធលើប្រាក់ចំណូល ៥០ ភាគរយ។
ប៉ុន្តែសម្រាប់ក្រុមហ៊ុន ឬសហគ្រាសដែលបោះផ្សាយមូលបត្រកម្មសិទ្ធិក្នុងទំហំ ២០ ភាគរយ ឬតិចជាងនៃសិទិ្ធបោះឆ្នោតការលើកទឹកចិត្តពន្ធលើប្រាក់ចំណូលតាមសមាមាត្រ មិនឱ្យលើស ២០ ប៊ីលានរៀល ចំណែកក្រុមហ៊ុន ឬសហគ្រាសបោះផ្សាយមូលបត្របំណុលក្នុងទំហំ ២០ ភាគរយ ឬតិចជាងនៃទ្រព្យសកម្មសរុបនោះការលើក ទឹកចិត្តពន្ធលើប្រាក់ចំណូលតាមសមាមាត្រមិនឱ្យលើសពី ៨ ប៊ីលានរៀល។
លោក ស៊ូ សុជាតិ អគ្គនាយកនិយតករទីផ្សារមូលបត្រកម្ពុជាបានឱ្យដឹងថា សម្រាប់ការលើកទឹកចិត្តពន្ធនេះគឺត្រូវធ្វើឡើងរយៈពេល ៣ ដងហើយជាផ្នែកមួយសម្រាប់ការអភិវឌ្ឍទីផ្សារមូលបត្រ និងដើម្បីផ្តល់ឱកាសកាន់តែច្រើនសម្រាប់ក្រុមហ៊ុនដែលមានសក្តានុពលបោះផ្សាយ។
លោកថ្លែងថា៖ «នេះជាលើកទី ៣ ហើយ ដែលរដ្ឋាភិបាលបន្តផ្តល់ការលើកទឹកចិត្តផ្នែកពន្ធសម្រាប់ការអភិវឌ្ឍទីផ្សារមូលបត្រ។ ហើយអ្វីដែលយើងខ្វះនោះគឺការចូលរួមពីវិស័យឯកជនដ៏មានសក្ដានុពលក្នុងការបោះផ្សាយមូលបត្រ ឬសញ្ញាប័ណ្ណសាជីវកម្មនៅលើទីផ្សារនេះ»។
លោកថា៖ «នៅក្នុងបរិបទនៃការប្រឈមដោយសារតែជំងឺកូវីដ ១៩ ក្រុមហ៊ុនដែលមានសក្តានុពលគួរពិចារណាចាប់យកឱកាសដោយទាញយកអត្ថប្រយោជន៍ពីការលើកទឹកចិត្តពន្ធដើម្បីប្រមូលមូលនិធិពីទីផ្សារមូលបត្រ»។
លោកស្រី គឹម សុផានីតា នាយិកាប្រតិបត្តិការទីផ្សារនៃផ្សារមូលបត្រកម្ពុជា (CSX) បានឱ្យដឹងថា ការសម្រេចចិត្តរបស់រាជរដ្ឋាភិបាលកម្ពុជាក្នុងការបន្តការលើកទឹកចិត្តពន្ធរយៈពេល ៣ ឆ្នាំទៀតនឹងបន្តគាំទ្រទីផ្សារ ដើម្បីទាក់ទាញក្រុមហ៊ុនចុះបញ្ជី និងវិនិយោគិនថ្មីៗ។
លោកស្រីថ្លែងថា៖ «ក្រុមហ៊ុនជាច្រើនកំពុងស្វែងរកកំណើនប្រកបដោយនិរន្តរភាព ភាពជឿជាក់ និងការផ្តល់ហិរញ្ញប្បទានតម្លៃទាបរយៈពេលវែង (ជាមួយនឹងការផ្តល់ការលើកទឹកចិត្តផ្នែកពន្ធ) មិនគួររង់ចាំទៀតទេក្នុងការបោះផ្សាយលក់មូលបត្រ។ ការលើកទឹកចិត្តនេះ មានរហូតដល់ ២ លានដុល្លារសម្រាប់ការចេញមូលបត្របំណុល និងរហូតដល់ ៥ លានដុល្លារមូលបត្រកម្មសិទ្ធិ»។
បច្ចុប្បន្ន CSX មានក្រុមហ៊ុនចុះបញ្ជីចំនួន ១៥ និងបានប្រមូលមូលនិធិសរុបចំនួន ២៨១ លានដុល្លារ រហូតមកដល់បច្ចុប្បន្ន។ ក្នុងនោះ ក្រុមហ៊ុន ៩ បោះផ្សាយមូលបត្រកម្មសិទ្ធិ និងចំនួន ៦ ចុះបញ្ជីសញ្ញាបណ្ណសាជីវកម្ម។ នេះបើយោងតាមទិន្នន័យបានពី CSX៕ LA