The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​ដាក់​ផែនការ​ជំរុញ​ការនាំចេញ​យានយន្ត​ និង​គ្រឿង​អេឡិចត្រូនិក

កម្ពុជា​ដាក់​ផែនការ​ជំរុញ​ការនាំចេញ​យានយន្ត​ និង​គ្រឿង​អេឡិចត្រូនិក

Content image - Phnom Penh Post
ទិដ្ឋភាពខាងក្នុងរោងចក្របង្គុំ និងតម្លើងរថយន្ត Ford នៅខេត្តពោធិ៍សាត់។ រូបថត រដ្ឋបាលខេត្ត

កម្ពុជា​ដាក់​ផែនការ​ជំរុញ​ការនាំចេញ​យានយន្ត​ និង​គ្រឿង​អេឡិចត្រូនិក

ភ្នំពេញៈ រាជរដ្ឋាភិបាល​កម្ពុជា​បានរៀបចំ​សេចក្តី​ព្រាង​ផែនទី​បង្ហាញផ្លូវ​ការអភិវឌ្ឍ​វិស័យ​យានយន្ត និង​អេឡិចត្រូនិក​នៅ​កម្ពុជា ដើម្បី​បង្កើន​ទំហំ​នាំចេញ​ក្នុង​ទំហំ​ទឹកប្រាក់​លើសពី ២ ​ប៊ីលាន​ដុល្លារ​ក្នុង​រយៈពេល​ ៥​ ឆ្នាំ​ខាងមុខ​។

សេចក្តី​ព្រាង​ផែនទី​បង្ហាញផ្លូវ​នេះ គឺជា​សមិទ្ធផល​នៃ​កិច្ចប្រឹងប្រែង​រួមគ្នា​របស់​ក្រសួង ស្ថាប័ន​នៃ​រាជរដ្ឋាភិបាល​កម្ពុជា​ចំនួន​ ៨ ដែល​រួមមាន ក្រុមប្រឹក្សា​អភិវឌ្ឍន៍​កម្ពុជា​ (CDC),​ ក្រសួង​សេដ្ឋកិច្ច​ និង​ហិរញ្ញវត្ថុ​, ក្រសួង​ដែនដី​, ក្រសួង​ឧស្សាហកម្ម​, ក្រសួងពាណិជ្ជកម្ម​, ក្រសួង​ការងារ​, ក្រសួង​រ៉ែ និង​ថាមពល​, ក្រសួង​សាធារណការ ដែល​សេចក្តីព្រាង​នេះ​ក្រោម​ជំនួយ​​ពី​ចក្រភព​អង់គ្លេស​ត្រូវបាន​ចាប់ផ្តើម​រៀបចំ​កាលពី​ខែកុម្ភៈ ឆ្នាំ​ ២០២២​។

នៅក្នុង​កិច្ចពិភាក្សា​នេះ ជាមួយ​ឯកអគ្គរាជទូត​អង់គ្លេស​ប្រចាំ​កម្ពុជា និង​វិស័យ​ឯកជន ក៏ដូចជា​អ្នកពាក់ព័ន្ធ​ក្នុង​ឧស្សាហកម្ម​នេះ កាលពី​ថ្ងៃទី ​១ ខែមីនា លោក សុខ ចិន្តាសោភា ជា​អគ្គលេខាធិការ​របស់ CDC បាន​លើកឡើង​ថា ការរៀបចំ​សេចក្តីព្រាង​ផែនទី​បង្ហាញផ្លូវ​នេះ ជា​ការប្តេជ្ញាចិត្ត​របស់​រាជរដ្ឋាភិបាល ដើម្បី​ធានាបាន​នូវ​ភាពគ្រប់​ជ្រុងជ្រោយ​ក្នុង​ការកំណត់​នូវ​យុទ្ធសាស្ត្រ ទិសដៅ និង​យន្តការ​ចាំបាច់​ដើម្បី​ធ្វើការ​អភិវឌ្ឍ និង​ទាក់ទាញ​ការវិនិយោគ​លើ​វិស័យ​យានយន្ត និង​អេឡិចត្រូនិក និង​បង្កើន​ភាព​ប្រកួតប្រជែង​តម្លៃ​ក្នុង​ប្រតិបត្តិការ​នៃ​វិស័យ​ទាំងនេះ​។

លោក​បាន​បញ្ជាក់ថា​៖ «​ការសហការ​ជាមួយ​វិស័យ​ឯកជន គឺជា​ភាពចាំបាច់ ដើម្បី​អភិវឌ្ឍ​វិស័យ​ទាំងនេះ ដោយ​ចាប់ផ្តើម​ពី​ការរៀបចំ​យុទ្ធសាស្ត្រ​រួម​រហូតដល់​ការដាក់ចេញ និង​អនុវត្ត​ផែនការ​សកម្មភាព ដោយ​កិច្ចពិភាក្សា​នេះ​មាន​គោលដៅ​ប្រមូល​ធាតុ​ចូល​បន្ថែម​ពី​ផ្នែក​ឯកជន​លើ​សេចក្តី​ព្រាងច្បាប់​នេះ​»​។

លោកស្រី ទីណា រ៉េតសរ ​ឯកអគ្គរាជទូត​ចក្រភព​អង់គ្លេស​ប្រចាំ​កម្ពុជា បានឱ្យដឹង​ដែរ​ថា ចក្រភព​អង់គ្លេស​បាន​រួមចំណែក​យ៉ាងច្រើន​ជាមួយ​រាជរដ្ឋាភិបាល​កម្ពុជា​ក្នុង​ការទប់ស្កាត់​ការរីករាលដាល​នៃ​ជំងឺ​កូវីដ​ ១៩ ដូចជា​ការផ្តល់​វ៉ាក់សាំង​ជាដើម​។ លោកស្រី​បាន​បញ្ជាក់ថា​៖ «​ចក្រភព​អង់គ្លេស​រីករាយ​ជានិច្ច​ក្នុង​ការសហការ​ជាមួយ​កម្ពុជា ដើម្បី​រួមចំណែក​គាំទ្រ​ការរៀបចំ​ពង្រាង​ផែនទី​បង្ហាញផ្លូវ សម្រាប់​ការអភិវឌ្ឍ និង​ទាក់ទាញ ការវិនិយោគ​វិស័យ​យានយន្ត និង​អេឡិចត្រូនិក​កម្ពុជា និង​រួមចំណែក​ជាមួយ​រាជរដ្ឋាភិបាល​កម្ពុជា​ក្នុង​ការស្តារ​សេដ្ឋកិច្ច​កម្ពុជា​ឡើងវិញ​ពី​វិបត្តិ​កូវីដ​ ១៩»​។

លោក លឹម ហេង អនុប្រធាន​សភាពាណិជ្ជកម្ម​បាន​ប្រាប់​ភ្នំពេញ​ប៉ុស្តិ៍​កាលពី​ម្សិលមិញ​ថា ផែនទី​បង្ហាញ​ផ្លូវការ​អភិវឌ្ឍ​វិស័យ​យានយន្ត និង​អេឡិចត្រូនិក​នេះ គឺជា​ប្លង់គោល​ដ៏សំខាន់​ក្នុង​ការចូលរួម​ជំរុញ​កំណើន​សេដ្ឋកិច្ច​របស់​កម្ពុជា នៅក្នុង​បរិបទ​ឧស្សាហកម្ម​ឌីជីថល​។

លោក​បាន​បញ្ជាក់ថា​៖ «​រាជរដ្ឋាភិបាល​កំពុងតែ​លើក​ទឹកចិត្ត​ឱ្យមាន​ការប្រើប្រាស់​យានយន្ត ដែល​មាន​ការប៉ះពាល់​តិច​បំផុត​ដល់​បរិស្ថាន ដូចជា​រថយន្ត​អគ្គិសនី​ជាដើម ហើយ​ផែនទី​បង្ហាញផ្លូវ​នេះ​នឹង​ផ្តល់នូវ​សក្តានុពល​ក្នុង​ការតភ្ជាប់​ទៅកាន់​ខ្សែចង្វាក់​តម្លៃ​ក្នុង​តំបន់ និង​ពិភពលោក ហើយ​អាចឱ្យ​កម្ពុជា​ឈាន​ទៅ​ខ្សែចង្វាក់​តម្លៃបន្ថែម​កាន់តែ​ខ្ពស់​»​។

តាមរយៈ​សេចក្តី​ព្រាង​ផែនទី​បង្ហាញផ្លូវ​នេះ វិនិយោគិន​នៅក្នុង​វិស័យ​យានយន្ត និង​អេឡិចត្រូនិក​នៅ​កម្ពុជា​នឹង​ទទួល​បាន​អត្ថប្រយោជន៍​ជាច្រើន ដូចជា ការបង្កើន​ធនធាន​មនុស្ស​ប្រកប​ដោយ​ជំនាញ ការធ្វើ​ឱ្យ​ប្រសើរ​ឡើង​នូវ​ហេដ្ឋារចនាសម្ព័ន្ធ​ផ្នែក​អគ្គិសនី និង​ភ័ស្តុភារកម្ម ដើម្បី​គាំទ្រ​ភាព​ប្រកួតប្រជែង​តម្លៃ​នៃ​កម្មន្តសាល និង​កិច្ចសម្របសម្រួល​ផ្នែក​គយ និង​ពាណិជ្ជកម្ម​ឱ្យ​កាន់​តែមាន​ប្រសិទ្ធភាព​ជាង​មុន សំដៅ​ជំរុញ​ដល់​ការនាំចេញ និង​នាំចូល​ផលិតផល​៕ LA

អត្ថបទគួរចាប់អារម្មណ៍