ភ្នំពេញៈ សម្ព័ន្ធហិរញ្ញវត្ថុយុត្តិធម៌កម្ពុជា (FFCC) បានចង្អុលបង្ហាញថា នៅក្នុងការសិក្សាចុងក្រោយបង្អស់ស្តីពីការអនុវត្តគោលនយោបាយហិរញ្ញប្បទានបៃតងនៅកម្ពុជា បានស្នើឱ្យស្ថាប័នហិរញ្ញវត្ថុទាំងអស់ត្រូវពិចារណាលើគោលនយោបាយ ដើម្បីចៀសវាងពីសង្គម ធនធានធម្មជាតិ និងបរិស្ថាន មុនពេលបញ្ចេញប្រាក់កម្ចី។
សម្ព័ន្ធហិរញ្ញវត្ថុយុត្តិធម៌កម្ពុជា គឺជាវេទិកាមួយ ក្រោមពាក្យស្លោក គំនិតផ្តួចផ្តើមហិរញ្ញវត្ថុយុត្តិធម៌អាស៊ី (Fair Finance Asia) ថ្នាក់តំបន់ ត្រូវបានអនុវត្តនៅក្នុងប្រទេសចំនួន ៨ ដោយអង្គការសង្គមស៊ីវិល ដើម្បីលើកកម្ពស់ចីរភាពហិរញ្ញវត្ថុនៅក្នុងប្រទេស។ ថ្មីៗនេះ FFCC បានបោះពុម្ពផ្សាយការសិក្សាលម្អិតស្តីពីការអនុវត្តគោលនយោបាយហិរញ្ញប្បទានបៃតងនៅកម្ពុជានៃការអនុវត្តគោលនយោបាយហិរញ្ញប្បទានបៃតងនៅកម្ពុជាកាលថ្ងៃទី ២៤ ខែកុម្ភៈ ឆ្នាំ ២០២២។
លោកស្រី ភាណ សោភ័ណ នាយិកាអង្គការអុកស្វាមថ្លែងថា កិច្ចការការពារបរិស្ថាន និងសង្គម នៅក្នុងវិស័យធនាគារ និងហិរញ្ញវត្ថុរបស់កម្ពុជា គឺជាកង្វល់ដ៏ធំមួយ។ ឥណទានពីវិស័យនេះ បានរួមចំណែកយ៉ាងទូលំទូលាយដល់គម្រោងអភិវឌ្ឍន៍ ឬវិនិយោគជាច្រើន ដែលគម្រោងខ្លះបានបង្កផលប៉ះពាល់ដល់សង្គមធនធានធម្មជាតិ និងបរិស្ថាន។
លោកស្រីថ្លែងថា៖ «ផ្អែកលើកំណើនជាសក្តានុពលនៃវិស័យហិរញ្ញវត្ថុ និងធនាគារ ការសិក្សានេះនឹងផ្តល់ព័ត៌មានយ៉ាងច្រើនដល់ភាគីពាក់ព័ន្ធទាំងអស់ ដែលធ្វើការរួមគ្នា ដើម្បីលើកកម្ពស់ហិរញ្ញប្បទានបៃតងប្រកបដោយចីរភាព សំដៅកាត់បន្ថយផលប៉ះពាល់អវិជ្ជមានចំពោះបរិស្ថាន និងសង្គម»។
លោក តឹក វណ្ណារ៉ា នាយកប្រតិបត្តិវេទិកានៃអង្គការមិនមែនរដ្ឋាភិបាលស្ដីពីប្រទេសកម្ពុជាបានឱ្យដឹងថា គោលនយោបាយហិរញ្ញប្បទានបៃតងមានសារៈសំខាន់ណាស់ក្នុងការរួមចំណែកដល់ការអភិវឌ្ឍប្រកបដោយសមធម៌ បរិយាប័ន្ន និងចីរភាពនៅកម្ពុជា ហើយស្តង់ដាបរិស្ថាន និងសង្គម គឺជាចំណុចគន្លឹះដែលមិនអាចខ្វះបានក្នុងការធានាថា គ្រប់ទិដ្ឋភាពនៃគម្រោងអភិវឌ្ឍន៍បានផ្តល់ផលប្រយោជន៍ដល់ប្រជាជន និងគ្រប់ភាគីពាក់ព័ន្ធប្រកបដោយសមធម៌។
កាលពីថ្ងៃទី ២៥ ខែកុម្ភៈ ឆ្នាំ ២០២២ ធនាគារសម្រាប់ការទូទាត់អន្តរជាតិ (BIS) ដែលមានមូលដ្ឋាន នៅប្រទេសស្វ៊ីសបានដាក់ដំណើរការជាផ្លូវការនូវមូលនិធិបើកចំហសម្រាប់ការវិនិយោគរបស់ធនាគារកណ្តាលលើបណ្ណបំណុលគុណភាពខ្ពស់ដែលចេញដោយមូលបត្រ បំណុលរដ្ឋគ្រឹះស្ថាន ហិរញ្ញវត្ថុអន្តរជាតិ និងសាជីវកម្ម។
លោក ជា ចាន់តូ ទេសាភិបាល ធនាគារជាតិនៃកម្ពុជាបានឱ្យដឹងថា ក្នុងនាមជាធនាគារកណ្ដាល តួនាទីរបស់យើងគឺចូលរួមកាត់បន្ថយហានិភ័យហិរញ្ញវត្ថុ ដែលបណ្ដាលមកពីផលប៉ះពាល់នៃការប្រែប្រួលអាកាសធាតុមកលើសេដ្ឋកិច្ច ស្ថានភាពសង្គម និងបរិស្ថាន។ NBC ជឿថា ស្ថាប័ន ក៏ដូចជាបុគ្គលម្នាក់ៗអាចដើរតួនាទីយ៉ាងសំខាន់ក្នុងការរួមចំណែកដល់កំណើនប្រកបដោយសមធម៌ និងចីរភាពតាមរយៈនៃការកាត់បន្ថយល្បឿននៃការប្រែប្រួលអាកាសធាតុយ៉ាងឆាប់រហ័ស និងហានិភ័យនៃបម្រែបម្រួលនេះ។
លោកបានលើកឡើងថា៖ «យើងលើកទឹកចិត្តយ៉ាងខ្លាំងដល់គ្រឹះស្ថានហិរញ្ញវត្ថុទាំងអស់ឱ្យដាក់ចេញនូវគោលនយោបាយ ដែលលើកកម្ពស់ហិរញ្ញប្បទានបៃតង និងគាំទ្រដល់ការវិនិយោគដែលផ្ដល់ផលវិជ្ជមានដល់បរិស្ថាន»។
យោងតាមរបាយការណ៍ប្រចាំឆ្នាំ ២០២១ របស់ធនាគារជាតិនៃកម្ពុជា កម្ចីដែលបានផ្ដល់ដោយគ្រឹះស្ថានហិរញ្ញវត្ថុដល់គ្រប់វិស័យបានកើនឡើង ២១,២ ភាគរយដល់ ១៨៦,៤ ពាន់ពាន់លានរៀល (៤៥,៧ ពាន់លានដុល្លារ)៕LA