ភ្នំពេញៈ កម្ពុជា និងអូម៉ង់ បានឯកភាពគ្នានឹងជំរុញកិច្ចសហប្រតិបត្តិការក្នុងវិស័យពាណិជ្ជកម្ម ការវិនិយោគ និងការពិនិត្យលទ្ធភាពក្នុងការបង្កើតអនុស្សរណៈ ឬកិច្ចព្រមព្រៀងផ្សេងៗជាមួយគ្នា ទៅតាមវិស័យអាទិភាពដែលប្រទេសទាំង ២ មាន ខណៈទំហំពាណិជ្ជកម្មរវាងប្រទេសទាំង ២ នៅមានចំនួនតិចតួចនៅឡើយ។
នៅក្នុងជំនួបជាមួយលោក Saleh Mohamed Ahmed Al Suqri ឯកអគ្គរាជទូតតែងតាំងថ្មីនៃប្រទេសអូម៉ង់ប្រចាំកម្ពុជានៅទីស្តីការក្រសួងពាណិជ្ជកម្មកាលពីថ្ងៃទី ២ ខែមីនា លោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្មបានលើកឡើងថា តាមរយៈកិច្ចសហប្រតិបត្តិការដែលមានកន្លងមក ពិសេសក្នុងបេសកកម្មការទូតដ៏មានអត្ថន័យរបស់លោក Saleh Mohamed Ahmed Al Suqri កម្ពុជា និងអូម៉ង់ រំពឹងនឹងមានទំនាក់ទំនងល្អលើគ្រប់វិស័យ ពិសេសផ្នែកពាណិជ្ជកម្ម។
បន្ថែមពីលើនេះទៅទៀត លោកស្រីក៏បានប្រាប់ភាគីអូម៉ង់ពី «ក្របខ័ណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជាក្នុងការរស់នៅជាមួយកូវីដ ១៩ តាមគន្លងប្រក្រតីភាពថ្មី សម្រាប់ឆ្នាំ ២០២១-២០២៣» ដែលមានសសរស្តម្ភចំនួន ៣ គឺការស្តារឡើងវិញ ការកែទម្រង់ និងការកសាងភាពធន់ ព្រមទាំងសមិទ្ធផលខ្ពស់នៃយុទ្ធនាការចាក់វ៉ាក់សាំង ដែលញ៉ាំងឱ្យមានការបើកសកម្មភាពសេដ្ឋកិច្ចសង្គមគ្រប់វិស័យទូទាំងប្រទេសឡើងវិញកាលពីពេលថ្មីៗនេះ។
លោកស្រីបានថ្លែងបញ្ជាក់ថា៖ «ក្នុងន័យនេះ ខ្ញុំសូមលើកទឹកចិត្តវិនិយោគិនអូម៉ង់ ឱ្យមកចាប់យកឱកាសវិនិយោគនៅកម្ពុជា តាមរយៈការបង្កើតផលិតកម្ម ការចូលរួមក្នុងខ្សែចង្វាក់ផ្គត់ផ្គង់តំបន់ និងការវិនិយោគលើផលិតផលសក្តានុពលរបស់កម្ពុជា រួមមាន អង្ករ កៅស៊ូ ចេក ស្វាយ គ្រឿងអេឡិចត្រូនិក ទំនិញសម្រាប់ការធ្វើដំណើរ និងវាយនភណ្ឌ ជាដើម»។
ជាមួយគ្នានេះដែរ លោក Saleh Mohamed Ahmed Al Suqri បាននិយាយថា ក្រៅពីមានស្ថិរភាពនយោបាយល្អ និងទទួលបានជោគជ័យលើយុទ្ធនាការចាក់វ៉ាក់សាំងប្រឆាំងនឹងជំងឺកូវីដ ១៩ ប្រទេសកម្ពុជាក៏មានបរិយាកាសវិនិយោគល្អប្រសើរផងដែរ។
លោកបានថ្លែងបន្តថា អូម៉ង់សូមបញ្ជាក់ពីការប្តេជ្ញារបស់ខ្លួនដើម្បីលើកស្ទួយទំនាក់ទំនងទ្វេភាគី និងពង្រីកកិច្ចសហប្រតិបត្តិការឱ្យកាន់តែស៊ីជម្រៅ ជាពិសេសក្នុងវិស័យពាណិជ្ជកម្ម ទេសចរណ៍ កំពង់ផែអន្តរជាតិ និងសភាពាណិជ្ជកម្ម។
ជាងនេះទៅទៀត លោក Saleh Mohamed Ahmed Al Suqri ក៏បានស្នើឱ្យមានការជំរុញការផ្លាស់ប្តូរដំណើរទស្សនកិច្ចរបស់ថ្នាក់ដឹកនាំ និងធុរជន តាមរយៈការចូលរួមការតាំងពិព័រណ៍នានារបស់ភាគីទាំង ២ ហើយបានស្នើឱ្យពិនិត្យលទ្ធភាពបង្កើតអនុស្សរណៈ ឬកិច្ចព្រមព្រៀងផ្សេងៗទៅតាមវិស័យអាទិភាពនីមួយៗរបស់ប្រទេសទាំង ២។
អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញ-ប៉ុស្តិ៍ថា កន្លងមកកម្ពុជា និងប្រទេសអូម៉ង់ មិនសូវមានទំនាក់ទំនងពាណិជ្ជកម្ម និងការវិនិយោគជាមួយគ្នាទេ ប៉ុន្តែការចូលជាធរមាននៃកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន, កម្ពុជា-កូរ៉េ (ក្នុងពេលឆាប់ៗ) និងកិច្ចព្រមព្រៀងក្របខ័ណ្ឌតំបន់ RCEP និងក្លាយជាកម្លាំងចលករមួយដែលនឹងទាក់ទាញចិត្តអ្នកវិនិយោគឱ្យចូលមកបណ្តាក់ទុននៅកម្ពុជា។
លោកបានថ្លែងពន្យល់យ៉ាងដូច្នេះថា តាមរយៈកិច្ចព្រមព្រៀងទាំងអស់នេះ វិនិយោគិនអូម៉ង់អាចមកបើកប្រតិបត្តិការអាជីវកម្មនៅកម្ពុជា ដើម្បីផលិត ឬកែច្នៃជាផលិតផលសម្រាប់នាំចេញទៅកាន់ទីផ្សារគោលដៅនានាដោយផ្អែកលើកិច្ចព្រមព្រៀងដែលកម្ពុជាមាន។
លោកថ្លែងយ៉ាងដូច្នេះថា៖ ទោះបីជាសកម្មភាពនៃការវិនិយោគ និងការដោះដូរទំនិញរវាងកម្ពុជា និងអូម៉ង់ នៅមានកម្រិតទាប ប៉ុន្តែខ្ញុំគិតថា តាមរយៈការសម្រួលលក្ខខណ្ឌនៃច្បាប់វិនិយោគថ្មីរបស់កម្ពុជា និងការចូលជាធរមាននៃកិច្ចព្រមព្រៀងពាណិជ្ជកម្មនឹងជួយឱ្យទំនាក់ទំនងពាណិជ្ជកម្មរវាងប្រទេសទាំង ២ មានដំណើរការទៅមុខកាន់តែល្អ»។
បើយោងតាមទិន្នន័យពីក្រសួងពាណិជ្ជកម្មកម្ពុជាឱ្យដឹងថា ពាណិជ្ជកម្មទ្វេភាគីកម្ពុជា និងអូម៉ង់ ក្នុងឆ្នាំ ២០២០ និងឆ្នាំ ២០២១ សម្រេចបានក្នុងទំហំទឹកប្រាក់ប្រមាណ ៥,៥ លានដុល្លារ។ រីឯមុខទំនិញ គឺភាគច្រើនជាទំនិញវាយនភណ្ឌ ជី និងរ៉ែ៕ LA