ភ្នំពេញៈ ក្រុមហ៊ុនអចលនទ្រព្យក្នុងស្រុក Lucky បានប្រកាសដាក់ឱ្យដំណើរការនូវសេវាកម្មវាយតម្លៃអចលនទ្រព្យតាមប្រព័ន្ធអនឡាញដ៏ទំនើបដែលក្រុមហ៊ុនទើបតែអភិវឌ្ឍន៍ឡើងក្នុងពេលថ្មីៗនេះ។
នាយកប្រតិបត្តិផ្នែកវាយតម្លៃរបស់ក្រុមហ៊ុនអចលនទ្រព្យ Lucky លោក នាក់ សុផាត បាននិយាយថា ជាទូទៅកាលពីដំបូង ការធ្វើរបាយការណ៍វាយតម្លៃអចលនទ្រព្យ គឺគេតែងធ្វើឡើងដោយផ្ទាល់ដៃ ប៉ុន្តែដោយឆ្លងកាត់ការខិតខំស្រាវជ្រាវអភិវឌ្ឍអស់រយៈពេលជិត ៣ ឆ្នាំមកនេះ និងដោយមានការសហការជាមួយដៃគូបរទេសផងនោះ ទើបក្រមហ៊ុនអាចសម្រេចបាននូវសមិទ្ធផលដ៏ល្អនេះ គឺអាចធ្វើរបាយការណ៍សង្ខេបតាមរយៈប្រព័ន្ធអនឡាញបាន។
លោកបានបន្ថែមថា៖ «សាធារណជនទូទៅ ព្រមទាំងធនាគារទាំងអស់ អាចចូលទៅប្រើសេវាវាយតម្លៃតាមរយៈអនឡាញនេះដោយខ្លួនឯង ដោយគ្រាន់តែបង្កើតនូវគណនេយ្យផ្ទាល់ខ្លួនមួយជាមួយក្រុមហ៊ុន រួចបញ្ចូលទិន្នន័យអចលនទ្រព្យទៅតាមទម្រង់ដែលក្រុមហ៊ុនបានផ្តល់ជូននោះ និងទទួលបាននូវតម្លៃទីផ្សាររបស់អចលនទ្រព្យនោះភ្លាមតែម្តង»។
យោងតាមលោក សុផាត ជាទូទៅ ការវាយតម្លៃអចលនទ្រព្យធម្មតាមួយ គេត្រូវការពេល ២-៣ថ្ងៃ ទើបអាចចេញរបាយការណ៍បាន ប៉ុន្តែការវាយតម្លៃតាមអនឡាញនេះ គឺមានល្បឿនលឿនដែលលទ្ធផលនៃការវាយតម្លៃនឹងទទួលបានក្នុងរយៈពេលត្រឹមតែ ១ថ្ងៃប៉ុណ្ណោះ។
លោក សុផាត បានប្រាប់ទៀតថា ចំពោះវិសាលភាពនៃការងារ គឺអាចវាយតម្លៃបានគ្រប់ទីកន្លែងទាំងអស់ គឺទាំង ២៥ រាជធានី-ខេត្ត។
នាយកប្រតិបត្តិរូបនេះ បានប្រាប់ភ្នំពេញប៉ុស្តិ៍ថា៖ «នេះជាមោទនភាពមួយសម្រាប់ក្រុមហ៊ុនអចលនទ្រព្យ Lucky ដែលបានរៀបចំឱ្យមានប្រព័ន្ធនេះ។ បច្ចុប្បន្នមានធនាគារមួយចំនួនកំពុងតែប្រើសេវានេះហើយ ខណៈធនាគារមួយចំនួនទៀតកំពុងតែសាកល្បងប្រើផងដែរ»៕