ភ្នំពេញៈ វិស័យទេសចរណ៍កម្ពុជារំពឹងថា នឹងត្រូវបានគេទទួលស្គាល់កាន់តែទូលំទូលាយនៅក្នុងវេទិកាសេដ្ឋកិច្ចពិភពលោក (WEF) ថាជាគោលដៅទេសចរណ៍សុវត្ថិភាព ខណៈរាជរដ្ឋាភិបាលកម្ពុជាបាននិងកំពុងអនុវត្តដោយជោគជ័យនូវយុទ្ធសាស្ត្រទេសចរណ៍ចាក់វ៉ាក់សាំងយ៉ាងមានប្រសិទ្ធភាព។
វេទិកាសេដ្ឋកិច្ចពិភពលោក (WEF) គ្រោងនឹងប្រារព្ធឡើងក្នុងអំឡុងខែឧសភា ឆ្នាំ២០២២ នៅទីក្រុង Davos Town ប្រទេសស្វ៊ីស ដែលក្នុងវេទិកានេះនឹងមានការពិភាក្សាបង្ហាញបទពិសោធន៍ល្អៗអំពីតំបន់អាស៊ានផងដែរ។ ថ្នាក់ដឹកនាំក្រសួងទេសចរណ៍ ក៏ត្រូវបានអញ្ជើញឱ្យចូលរួមក្នុងវេទិកានេះ ដើម្បីបង្ហាញពីគោលដៅទេសចរណ៍របស់ខ្លួន។
នៅក្នុងអំឡុងជំនួបពិភាក្សាជាមួយ លោក Lee Joo-Ok ប្រធានកម្មវិធីតំបន់អាស៊ីប៉ាស៊ីហ្វិក និងជាសមាជិកនៃគណៈកម្មការប្រតិបត្តិវេទិកាសេដ្ឋកិច្ចពិភពលោក (WEF) កាលពីថ្ងៃទី៤ ខែមីនា ឆ្នាំ២០២២ នៅទីស្ដីការក្រសួងទេសចរណ៍ លោក ប៉ាក់ សុខុម រដ្ឋលេខាធិការក្រសួងទេសចរណ៍ បានលើកឡើងពីយុទ្ធសាស្ត្ររបស់រាជរដ្ឋាភិបាលកម្ពុជាក្នុងការចាក់វ៉ាក់សាំងជូនប្រជាជន ដែលជាគន្លឹះដ៏សំខាន់ក្នុងការបើកសកម្មភាពសេដ្ឋកិច្ច និងបើកទទួលទេសចរអន្តរជាតិឡើងវិញ។
លោកអះអាងថា កម្ពុជាសព្វថ្ងៃ ត្រូវបានវាយតម្លៃថាជាគោលដៅទេសចរណ៍សុវត្ថិភាព។
បន្ថែមពីលើនេះ លោកក៏បានបង្ហាញអំពីចក្ខុវិស័យ ក៏ដូចជាការរៀបចំការស្ដារ និងការលើកស្ទួយវិស័យទេសចរណ៍ឡើងវិញ តាមរយៈការអនុវត្តដោយយកចិត្តទុកដាក់លើផែនទីចង្អុលទិសស្ដីពីការស្ដារ និងលើកស្ទួយវិស័យទេសចរណ៍កម្ពុជាក្នុង និងក្រោយវិបត្តិកូវីដ១៩ ក៏ដូចជាស្របទៅតាមយុទ្ធសាស្ត្រទេសចរណ៍ចាក់វ៉ាក់សាំង ដែលរាជរដ្ឋាភិបាលបានអនុម័តរួចហើយនោះ។
ជាការឆ្លើយតប លោក Lee Joo-Ok បានអបអរសាទរ និងកោតសរសើរដល់ការរៀបចំវេទិកាទេសចរណ៍អាស៊ានឆ្នាំ ២០២២ ដែលកម្ពុជាបានធ្វើជាម្ចាស់ផ្ទះនាពេលកន្លងមក។
លោក Lee Joo-Ok ក៏បានសន្យាថា នឹងជួយផ្សព្វផ្សាយពីវិស័យទេសចរណ៍កម្ពុជា ក្នុងពេលរៀបចំព្រឹត្តិការណ៍វេទិកាសេដ្ឋកិច្ចពិភពលោកនាពេលខាងមុខផងដែរ៕