.jpg)
បុរសម្នាក់លីអង្ករក្នុងហាងលក់ ១ កន្លែង ក្បែរស្ថានីយរថភ្លើង កាលពីឆ្នាំ ២០១៦។ ហុង មិនា
ភ្នំពេញៈ សហព័ន្ធស្រូវអង្ករកម្ពុជា (CRF) បានថ្លែងអះអាងថា ទីផ្សារនាំចេញអង្ករកម្ពុជាទៅកាន់ប្រទេសអ៊ុយក្រែន និងប្រទេសរុស្ស៊ីមិនទទួលរងផលប៉ះពាល់ពីវិបត្តិនៃការប្រយុទ្ធគ្នារវាងប្រទេសទាំង ២ ឡើយ ដោយសារតែបរិមាណនាំចេញនៅមានកម្រិតទាបនៅឡើយ។
ទិន្នន័យពី CRF បង្ហាញថា ក្នុងរយៈពេល ៥ ឆ្នាំពីឆ្នាំ ២០១៧-២០២១ ប្រទេសកម្ពុជាបាននាំអង្ករចេញទៅកាន់ប្រទេសរុស្ស៊ីចំនួន ១៧ ៥១២ តោន។ ក្នុងនោះសម្រាប់ឆ្នាំ ២០២១ ការនាំចេញអង្ករកម្ពុជាទៅប្រទេសរុស្ស៊ីមានបរិមាណ ២ ២២៣ តោន ដែលគិតជាទឹកប្រាក់មានចំនួន ១ ៩៦៣ ៦៤០ ដុល្លារ។ ចំណែកក្នុងខែមករា និងខែកុម្ភៈ ឆ្នាំ ២០២២ បរិមាណអង្ករនាំចេញទៅប្រទេសរុស្ស៊ីមានចំនួន ២០០ តោនដែលស្មើនឹងទឹកប្រាក់ ២០០ ៦៤០ ដុល្លារ។
បើតាម CRF សម្រាប់ការនាំអង្ករចេញទៅកាន់ប្រទេសអ៊ុយក្រែន ពីឆ្នាំ ២០១៧-២០២១ គឺមានបរិមាណត្រឹមតែ ៥៧២ តោនប៉ុណ្ណោះ។
ប្រធាន CRF លោក សុង សារ៉ន បានប្រាប់ ភ្នំពេញ ប៉ុស្តិ៍ នៅថ្ងៃទី ៦ ខែមីនាថា ប្រទេសរុស្ស៊ី និងអ៊ុយក្រែន មិនមែនជាទីផ្សារធំសម្រាប់ការនាំចេញអង្ករកម្ពុជាឡើយ ដូច្នេះជម្លោះប្រដាប់អាវុធរវាងប្រទេសទាំង ២ ដែលកំពុងកើតមានក៏នឹងមិនជះឥទ្ធិពលអវិជ្ជមានណាគួរឱ្យកត់សម្គាល់សម្រាប់ការនាំចេញអង្កររបស់កម្ពុជានោះឡើយ។ លោកបានបញ្ជាក់ថា៖ «ការនាំចេញអង្កររបស់យើងទៅប្រទេសរុស្ស៊ី និងអ៊ុយក្រែនគឺមានបរិមាណតិចតួចប៉ុណ្ណោះ ដូច្នេះនឹងមិនមានអ្វីប៉ះពាល់ដល់ការនាំចេញរបស់កម្ពុជាឡើយ»។
លោកប្រាប់ទៀតថា អ្វីដែលកំពុងបន្តចោទជាបញ្ហាក្នុងឆ្នាំ ២០២២ នេះគឺកត្តាកង្វះទូកុងតឺន័រផ្ទុកអង្ករ និងការកើនឡើងនៃតម្លៃដឹកជញ្ជូនផ្លូវសមុទ្រជាពិសេសទៅកាន់ទីផ្សារសហគមន៍អឺរ៉ុប។ លោកបន្តថា ឈរ លើបញ្ហាប្រឈមខាងលើ CRF បានធ្វើពិពិធកម្មទីផ្សារជាបន្តបន្ទាប់ ពិសេសការផ្តោតលើការជំរុញទៅកាន់ទីផ្សារប្រទេសចិន និងប្រទេសនៅក្នុងតំបន់អាស៊ាន។
អគ្គលេខាធិការនៃលេខាធិការដ្ឋានសហព័ន្ធស្រូវអង្ករកម្ពុជា លោក លន់ យ៉េង កាលពីចុងសប្តាហ៍មុនបាននិយាយ ថា ជម្លោះប្រដាប់អាវុធរវាងប្រទេសរុស្ស៊ី និងអ៊ុយក្រែននឹងមិនមានការប៉ះពាល់ដល់ការនាំចេញអង្ករកម្ពុជាទៅកាន់ទីផ្សារអន្តរជាតិទេ ព្រោះការទទួលទិញរបស់ប្រទេសទាំង ២ គឺមានបរិមាណតិចតួចប៉ុណ្ណោះ។
របាយការណ៍ក្រសួងកសិកម្មបានបង្ហាញថា ក្នុងរយៈពេល ២ ខែដើមឆ្នាំ ២០២២ កម្ពុជា មាននាំចេញអង្ករទៅទីផ្សារអន្តរជាតិសរុប ១០៣ ០៥៨ តោន កើនឡើង ២៦ ៨៣៦ តោន ឬស្មើនឹង ៣៥,២១ ភាគរយ បើធៀបនឹងបរិមាណនាំចេញរយៈពេល ២ ខែឆ្នាំ ២០២១ ដែលមានចំនួន ៧៦ ២២២ តោន។
ក្នុងនោះការនាំចេញទៅកាន់ទីផ្សារសហភាពអឺរ៉ុបមានបរិមាណសរុប ២៦ ៥០៧ តោន កើនឡើង ៣៩,៥៤ ភាគរយ, នាំទៅទិសដៅប្រទេសចិន មានបរិមាណសរុប ៥៦ ៣៨៥ តោន កើនឡើង ៤៩,៨៤ ភាគរយ, តំបន់អាស៊ាន (៣ ប្រទេស) មានបរិមាណ ៩ ៣៧០ តោន កើនឡើង ៥០,៤៣ ភាគរយ និងទិសដៅដទៃទៀត (១៦ ប្រទេស) មានបរិមាណ ១០ ៧៩៦ តោន ថយចុះ -១៩,២៣ ភាគរយ។ កាលពីឆ្នាំ ២០២១ កម្ពុជានាំចេញអង្ករទៅកាន់ទីផ្សារអន្តរជាតិ បានចំនួនជាង ៦១៧ ០៦៩ តោន បានធ្លាក់ចុះ ១០,៦៨ ភាគរយ បើធៀបនឹងឆ្នាំ ២០២០។ ចំណែកការនាំចេញស្រូវមានចំនួន ៣ ៥២៧ ៤១៨ តោន កើនឡើង ៦១,១៦ ភាគរយ៕ LA
