ភ្នំពេញៈ គ្រឹះស្ថានធនាគារ និងហិរញ្ញវត្ថុ៣បានចាប់ដៃគ្នាបង្កើត «ក្រមប្រតិបត្តិនៃវិស័យធនាគារ និងហិរញ្ញវត្ថុ» សំដៅធានាដល់ការអនុវត្ត ការផ្តល់សេវាកម្មហិរញ្ញវត្ថុប្រកបដោយតម្លាភាព បង្កើនសេចក្តីទុកចិត្ត និងកិច្ចការពារអតិថិជនដើម្បីជំរុញកំណើនសេដ្ឋកិច្ចប្រកបដោយចីរភាព និងបរិយាប័ន្ន។
«ក្រមប្រតិបត្តិនៃវិស័យធនាគារ និងហិរញ្ញវត្ថុ» ត្រូវបានដាក់ឱ្យអនុវត្តជាផ្លូវការ និងចុះហត្ថលេខាកាលពីថ្ងៃសុក្រ ទី ៤ ខែមីនា ឆ្នាំ ២០២២ រវាង សមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា និងសមាគមសហព័ន្ធហិរញ្ញវត្ថុ និងបច្ចេកវិទ្យានៃកម្ពុជា។
លោក អ៊ិន ចាន់នី ប្រធានសមាគមធនាគារនៅកម្ពុជាបានថ្លែងថាការដាក់ឱ្យប្រើប្រាស់នូវក្រមប្រតិបត្តិនេះគឺឆ្លើយតបទៅនឹងយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ ២០១៦-២០២៥ និងយុទ្ធសាស្ត្រជាតិស្តីពីបរិយាប័ន្នហិរញ្ញវត្ថុឆ្នាំ ២០១៩-២០២៥ ក្នុងគោលបំណងចូលរួមលើកកម្ពស់សិទ្ធិ និងការបង្កើនកិច្ចការពារអតិថិជន ព្រមទាំងបង្កើនតម្លាភាពក្នុងវិស័យធនាគារ និងហិរញ្ញវត្ថុ ដើម្បីជួយជំរុញកំណើនសេដ្ឋកិច្ចប្រកបដោយចីរភាព និងបរិយាបន្ន។ ក្រមប្រតិបត្តិនៃវិស័យធនាគារ និងហិរញ្ញវត្ថុនេះក៏ចូលរួមទប់ស្កាត់បំណុលលើសលប់ និងការពារអតិថិជនដែលងាយរងគ្រោះផងដែរ។
លោក ចាន់នី ៖ «គោលបំណងនៃការបង្កើតក្រមប្រតិបត្តិនៃវិស័យធនាគារ និងហិរញ្ញវត្ថុនេះឡើងគឺស្របទៅនឹងការរួមចំណែកនៅក្នុងប្រព័ន្ធហិរញ្ញវត្ថុឱ្យមានភាពរឹងមាំ បរិយាប័ន្ន ផ្ដោតលើតម្រូវការអ្នកប្រើប្រាស់ និងទំនុកចិត្ត កំណត់បទដ្ឋានសីលធម៌នៃការប្រកបវិជ្ជាជីវៈប្រកបដោយការទទួលខុសត្រូវសម្រាប់គ្រឹះស្ថានធនាគារ និងហិរញ្ញវត្ថុនៅកម្ពុជា»។
លោកបានថ្លែងថា៖ «ក្រមនេះនឹងត្រូវបានត្រួតពិនិត្យឡើងវិញជាប្រចាំដើម្បីតាមដានពីការរីកចម្រើននៅក្នុងវិស័យហិរញ្ញវត្ថុនៅកម្ពុជា ឬនៅពេលមានការផ្លាស់ប្តូរឯកសារនានា ឬត្រូវបានតម្រូវដោយច្បាប់បទប្បញ្ញត្តិជាធរមាន ដើម្បីធានានូវអនុលោមតាមក្របខ័ណ្ឌច្បាប់ និងបទប្បញ្ញតិ្តជាធរមានដែលពាក់ព័ន្ធ»។
លោក សុខ វឿន ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជាបានថ្លែងថា ក្នុងកិច្ចខិតខំប្រឹងប្រែង ដើម្បីរួមចំណែកធ្វើឱ្យប្រព័ន្ធធនាគារកាន់តែរឹងមាំ និងប្រកបទៅដោយបរិយាប័ន្ន ក្រមប្រតិបត្តិសម្រាប់ធនាគារ ត្រូវបានបង្កើតជាលើកដំបូងដោយធនាគារចំនួន ១៥ នៅក្នុងខែកុម្ភៈ ឆ្នាំ ២០១៥។ លោកថា៖ «៥ ឆ្នាំក្រោយមក ដោយមើលឃើញអំពីភាពចាំបាច់នៅក្នុងការជំរុញ និងពង្រឹងកិច្ចការពារអតិថិជន និងដើម្បីធានាបាននូវនិរន្តរភាពវិស័យធនាគារ និងហិរញ្ញវត្ថុ ទើបនៅក្នុងកិច្ចប្រជុំលើកទី ១ នៃគណៈកម្មាធិការបរិយាប័ន្នហិរញ្ញវត្ថុនៃសមាគមធនាគារនៅកម្ពុជា កាលពីថ្ងៃទី ២២ ខែឧសភា ឆ្នាំ ២០២០ បាន សម្រេចលើគម្រោងជាមួយសមាគមមីក្រូហិរញ្ញវត្ថុកម្ពុជា ដើម្បីបង្កើតក្រមប្រតិបត្តិនេះឡើង និងទទួលបាននូវការអនុម័តដោយក្រុមប្រឹក្សាភិបាលសមាគមធនាគារនៅកម្ពុជានៅក្នុងខែកក្កដា ឆ្នាំ ២០២១។
លោក រ័ត្ន សុវណ្ណនរៈ ឧបការីទេសាភិបាលធនាគារជាតិនៃកម្ពុជាបានថ្លែងថា ការរៀបចំក្រមប្រត្តិបត្តិនេះបង្ហាញឱ្យឃើញថា គ្រឹះស្ថានធនាគារ និងហិរញ្ញវត្ថុមានបទប្បញ្ញត្តិផ្ទាល់ខ្លួនបន្ថែមលើបទប្បញ្ញត្តិនានាដែលចេញដោយធនាគារជាតិនៃកម្ពុជា ហើយបានឆ្លុះបញ្ចាំងពីសុច្ឆន្ទៈពីការយកចិត្តទុកដាក់ពីសមាគមទាំង ៣ ក៏ដូចជាសមាជិកទាំងអស់ចំពោះប្រសិទ្ធភាពនៃប្រតិបត្តិការក្នុងវិស័យនេះ ជាពិសេសការផ្តល់ហិរញ្ញវត្ថុជូនប្រជាជនប្រកបដោយតម្លាភាព និងការទទួលខុសត្រូវខ្ពស់។ លោកថ្លែងថា៖ «ធនាគារជាតិនៃកម្ពុជាជឿជាក់ថា ក្រមប្រតិបត្តិនេះនឹងក្លាយជាគោលការណ៍រួមសម្រាប់គ្រឹះស្ថានធនាគារ និងហិរញ្ញវត្ថុក្នុងការបង្កើនតម្លាភាពនៃការផ្តល់សេវា និងកិច្ចការពារអតិថិជនដែលនឹងកសាងទំនាក់ទំនងល្អ ការប្រកួតប្រជែង និងស្មោះត្រង់ ដើម្បីឱ្យប្រព័ន្ធធនាគារ និងហិរញ្ញវត្ថុរីកចម្រើនប្រកបដោយបរិយាប័ន្ន»៕ LA