.jpg)
ព្រលានយន្តហោះអន្តរជាតិក្រុងព្រះសីហនុ កាលពីឆ្នាំ ២០១៨។ ហេង ជីវ័ន
ភ្នំពេញៈ លោកនាយរដ្ឋមន្ត្រី ហ៊ុន សែន និងមន្ត្រីជំនាញបានអះអាងថា ការចុះចតនូវយន្តហោះប្រភេទពាណិជ្ជកម្មនៅព្រលានយន្តហោះអន្តរជាតិក្រុងព្រះសីហនុ នាយប់ថ្ងៃទី ៦ ខែមីនា កន្លងមកនេះ គឺជាសញ្ញាវិជ្ជមានមួយនៃការចាប់ផ្តើមងើបឡើងវិញនៃសេដ្ឋកិច្ច និងទេសចរណ៍សម្រាប់ខេត្តតំបន់ឆ្នេរមួយនេះ។
ក្រុងព្រះសីហនុ ក្រុងកោះរ៉ុង នៃខេត្តព្រះសីហនុ និងតំបន់តារាសាគរ នៃខេត្តកោះកុង គឺជាកន្លែងដែលត្រូវបានរដ្ឋាភិបាលកម្ពុជាសម្រេចឱ្យបើកទទួលភ្ញៀវទេសចរវ៉ាក់សាំងមុនគេនៅកម្ពុជា ដែលគ្រោងនឹងចាប់ផ្តើមពីថ្ងៃទី ៣០ ខែវិច្ឆិកា បន្ទាប់ពីបានបិទមួយរយៈ ដើម្បីទប់ស្កាត់ការឆ្លងរាលដាលជំងឺកូវីដ ១៩។
ថ្លែងក្នុងពិធីបើកសម្ពោធដាក់ឱ្យដំណើរការជាផ្លូវការនៃមន្ទីរពេទ្យមិត្តភាពកម្ពុជា-ចិនត្បូងឃ្មុំ នៅព្រឹកថ្ងៃចន្ទ ទី០៧ ខែ មីនា ឆ្នាំ ២០២២ លោកនាយករដ្ឋមន្ត្រីមានការសាទរចំពោះវត្តមានរបស់យន្តហោះប្រភេទពាណិជ្ជកម្មដែលបានចុះចតនៅព្រលានយន្តហោះអន្តរជាតិព្រះសីហនុ បន្ទាប់ពីខេត្តនេះត្រូវបានយាយីយ៉ាងខ្លាំងពីការរីករាលដាលនៃជំងឺកូវីដ ១៩ រហូតមកទល់ពេលនេះ។
លោក ហ៊ុន សែន ថ្លែងយ៉ាងដូច្នេះថា៖ «យប់មិញជាលើកដំបូងក្នុងរយៈពេលប៉ុន្មានខែបន្ទាប់ពីបិទ [ខ្ទប់] ដែលមានយន្តហោះពាណិជ្ជកម្មចុះចតនៅខេត្តព្រះសីហនុ។ ក្នុងមួយរយៈពេលកន្លងមកនេះ គឺមានតែចុះចតនៅរាជធានីភ្នំពេញ និងខេត្តសៀមរាបទេ ប៉ុន្តែយប់មិញ [ថ្ងៃទី ៦ ខែមីនា] មានចុះ ១ ជើងនៅខេត្តព្រះសីហនុ ដូច្នេះនឹងមានការចុះចតជាបន្តបន្ទាប់ដែលនឹងអាចដំណើរការសេដ្ឋកិច្ចឡើងវិញ ទោះបីទេសចរណ៍ពុំទាន់បានធំទូលាយ»។
«ក៏ប៉ុន្តែការធ្វើដំណើរមកកាន់កម្ពុជាដើម្បីធ្វើការវិនិយោគ និងរកស៊ីនៅស្រុកយើង វាមានភាពងាយស្រួល ព្រោះនៅកម្ពុជាមិនតម្រូវឱ្យធ្វើចត្តាឡីស័កទេ ហើយអ្នកដែលធ្វើចត្តាឡីស័កគឺសម្រាប់តែអ្នកមិនបានចាក់វ៉ាក់សាំង ប៉ុន្តែអ្នកដែលបានចាក់វ៉ាក់សាំងពេញលេញហើយ យើងគ្រាន់តែធ្វើតេស្តរហ័សរួចហើយបើឃើញអវិជ្ជមាន គឺយើងអនុញ្ញាតឱ្យគេធ្វើដំណើរបន្ត»។ នេះបើយោងតាមការថ្លែងរបស់លោកនាយករដ្ឋមន្ត្រី។
លោកបានបញ្ជាក់ទៀតថា៖ «វ៉ាក់សាំង គឺសេដ្ឋកិច្ច ព្រោះបើអត់មានការចាក់វ៉ាក់សាំងទេភាពស៊ាំសហគមន៍វាអត់មាន ដូច្នេះចុះបើយើងអត់មានភាពស៊ាំសហគមន៍ តើយើងអាចបើកសេដ្ឋកិច្ចដូចម្តេច?»។
អ្នកនាំពាក្យអាកាសចរស៊ីវិលកម្ពុជា លោក ស៊ិន ចាន់សេរីវុត្ថា គូសបញ្ជាក់មក ភ្នំពេញ ប៉ុស្តិ៍ នៅថ្ងៃទី ៧ ខែមីនាថា កាលពីយប់ថ្ងៃទី ៦ ខែមីនា កន្លងមកនេះ មានយន្តហោះប្រភេទពាណិជ្ជកម្មបានចុះចតនៅព្រលានយន្តហោះអន្តរជាតិក្រុងព្រះសីហនុ ដោយលោកយល់ឃើញថា ការចុះចតនៃយន្តហោះប្រភេទនេះ គឺផ្តល់ជាសញ្ញាវិជ្ជមានដល់សេដ្ឋកិច្ចនៃខេត្តមាត់សមុទ្រមួយនេះ។
លោកបានថ្លែងថា៖ «ខ្ញុំយល់ថា នេះគឺជាការចាប់ផ្តើមដ៏ល្អមួយសម្រាប់ខេត្តព្រះសីហនុ បន្ទាប់ពីមានការស្ងប់ស្ងាត់ការចុះចតនូវយន្តហោះប្រភេទពាណិជ្ជកម្មបែបនេះ ក្រោយការរីករាលដាលនៃជំងឺកូវីដ១៩។ ដូច្នេះយើងនឹងឃើញមាននូវយន្តហោះប្រភេទនេះ ដែលផ្ទុកអ្នកជំនួញនានានឹងធ្វើការចុះចតជាបន្តបន្ទាប់»។ ប៉ុន្តែលោកពុំបានបញ្ជាក់អំពីចំនួននៃអ្នកដំណើរនៅលើយន្តហោះ និងប្រភេទពិតប្រាកដនៃយន្តហោះនោះឡើយ។
កាលពីថ្ងៃទី ១៦-២២ ខែ មករា ឆ្នាំ ២០២២ ខេត្តព្រះសីហនុបានធ្វើជាម្ចាស់ផ្ទះនៃវេទិកាទេសចរណ៍អាស៊ានលើកទី៤០ (ATF 2022)៕ LA
