.jpg)
ក្រសួងប្រៃសណីយ៍ និងទូរគមនាគមន៍។ ហេង ជីវ័ន
ភ្នំពេញៈ ក្រសួងប្រៃសណីយ៍ និងទូរគមនាគមន៍ និងសមាគមសហព័ន្ធហិរញ្ញវត្ថុ និងបច្ចេកវិទ្យានៃកម្ពុជាបានសហការគ្នា ដើម្បីបង្កើនកិច្ចសហប្រតិបត្តិការលើការលើកកម្ពស់បច្ចេកវិទ្យាឌីជីថល ដើម្បីបង្កលក្ខណៈងាយស្រួលជាងមុនក្នុងការទំនាក់ទំនងប្រកបដោយប្រសិទ្ធភាពក្នុងវិស័យធនាគារ និងហិរញ្ញវត្ថុ។ ការចុះអនុស្សរណៈជាមួយក្រសួងប្រៃសណីយ៍ និងសមាគមសហព័ន្ធហិរញ្ញវត្ថុ និងបច្ចេកវិទ្យានៃកម្ពុជាត្រូវបានធ្វើឡើងកាលពីថ្ងៃទី ៤ ខែមីនា ឆ្នាំ ២០២២។
លោក រេមី ផេល ប្រធានសមាគមសហព័ន្ធហិរញ្ញវត្ថុ និងបច្ចេកវិទ្យានៃកម្ពុជា បានលើកឡើងថា តួនាទីរបស់ ស្ថាប័ន ហិរញ្ញវត្ថុ ដើម្បីធ្វើឱ្យសេដ្ឋកិច្ចរីកចម្រើន និងជំរុញឱ្យអាជីវកម្មខ្នាតតូចដំណើរការទៅមុខបានស្រួល ដូចនេះការអភិវឌ្ឍបច្ចេកវិទ្យា និងនវានុវត្តន៍នៅក្នុងវិស័យពាក់ព័ន្ធដែលរួមចំណែកយ៉ាងសំខាន់ដើម្បីសម្រេចបានសេដ្ឋកិច្ចឌីជីថលប្រកបដោយបរិយាប័ន្ន ស្ថិរភាព និងនិរន្តរភាព។
លោកបានបញ្ជាក់ថា៖ «មានបញ្ហាប្រឈមមួយចំនួន ដែលយើងជួបប្រទះនៅក្នុងឧស្សាហកម្មរបស់យើង ដែលមិនត្រឹមតែនៅក្នុងបរិបទប្រទេសកម្ពុជាប៉ុណ្ណោះទេ ប៉ុន្តែជាសកលមួយ គឺការក្លែងបន្លំ តាមប្រព័ន្ធអ៊ីនធឺណិត និងបញ្ហាសុវត្ថិភាពនៃទិន្នន័យឯកជនភាព»។
លោក កាំង តុងងី អ្នកនាំពាក្យសមាគមមីក្រូហិរញ្ញវត្ថុកម្ពុជាបានប្រាប់ភ្នំពេញប៉ុស្តិ៍ថា វិស័យបច្ចេកវិទ្យាគឺមានតួនាទីចាំបាច់ណាស់ក្នុងប្រព័ន្ធធនាគារ និងហិរញ្ញវត្ថុ ដោយសារតែការវិវឌ្ឍបច្ចេកវិទ្យា គឺជួយឱ្យការផ្តល់សេវានៅក្នុងវិស័យនេះមានការប្រែប្រួលច្រើន ជាពិសេសនៅក្នុងអំឡុងនៃការរីករាលដាលជំងឺកូវីដ ១៩ នេះ។
លោកបានបញ្ជាក់ថា៖ «នៅពេលដែលមានការបិទខ្ទប់កាលពីអំឡុងឆ្នាំ ២០២១ ដោយសារការផ្ទុះឡើងនៃជំងឺកូវីដ ១៩ វិស័យធនាគារ និងហិរញ្ញវត្ថុនៅតែបានផ្តល់សេវាចាំបាច់ជាទូទៅដល់អថិជន ដោយសារតែយើងបានបញ្ជ្រាបចំណេះដឹងនៃការប្រើប្រាស់បច្ចេកវិទ្យាឌីជីថលដល់ពួកគាត់។ នេះហើយដែលយើងឃើញថា បច្ចេកវិទ្យាពិតជាបានជួយសម្រួលការងារយើងបានច្រើន»។
កាលពីថ្ងៃទី ២៧ ខែតុលា ឆ្នាំ ២០២១ ធនាគារជាតិនៃកម្ពុជាបានធ្វើការដាក់ឱ្យដំណើរការនូវប្រព័ន្ធអន្តរធនាគារមួយដែលមានឈ្មោះថា «បាគង» ដែលជាការបោះជំហានថ្មីមួយក្នុងការអភិវឌ្ឍប្រព័ន្ធបច្ចេកវិទ្យាហិរញ្ញវត្ថុនៅកម្ពុជា។
របាយការណ៍របស់ធនាគារអភិវឌ្ឍន៍អាស៊ីចេញផ្សាយកាលពីចុងខែឧសភា ឆ្នាំ ២០២១ ប្រទេសកម្ពុជាទទួលបានចំណូលជិតកន្លះពាន់លានដុល្លារអាមេរិកពីអាជីវកម្មបចេ្ចកវិទ្យា និងឌីជីថលកាលពីឆ្នាំ ២០១៩។ ប្រាក់ចំណូលឌីជីថលនៅកម្ពុជាកាលពីឆ្នាំ ២០១៩ មានចំនួនសរុប ៤៧០ លានដុល្លារ។ បើគិតតាមវិស័យពាណិជ្ជកម្មអេឡិចត្រូនិកមានចំនួន ២៧,៦ ភាគរយ សេវាកម្មអេឡិចត្រូនិកមាន ៧,៨ ភាគរយ ប្រព័ន្ធព័ត៌មានឌីជីថល ១០,២ ភាគរយ បច្ចេកវិទ្យាផ្សព្វផ្សាយពាណិជ្ជកម្ម (AdTech) ១២,៧ ភាគរយ ការដឹកជញ្ជូន ៣,៨ ភាគរយ និងការធ្វើដំណើរអនឡាញ ៣៧,៩ ភាគរយ៕ LA
