.jpg)
បុគ្គលិករបស់ CSX កំពុងនិយាយទូរស័ព្ទជាមួយអតិថិជននាពេលកន្លងមក។ ហុង មិនា
ភ្នំពេញៈ ក្រុមហ៊ុនផ្សារមូលបត្រកម្ពុជា (CSX) បានដាក់ផែនការឱ្យសមាជិកដែលជាប្រតិបត្តិករទីផ្សារទាំងអស់ត្រូវមានវេទិកាជួញដូរផ្ទាល់ខ្លួនក្នុងរយៈពេល ៣ ឆ្នាំខាងមុខ ដើម្បីធានាបាននូវការឆ្លើយតបនឹងតម្រូវការអភិវឌ្ឍទីផ្សារមូលបត្រ ការកើនឡើងចំនួនក្រុមហ៊ុនចុះបញ្ជី និងចំនួនវិនិយោគិនឈានទៅរកសមាហរណកម្ម ហេដ្ឋារចនាសម្ព័ន្ធបច្ចេកវិទ្យា ដើម្បីអាចដើរទាន់នឹងការប្រកួតប្រជែងជាមួយទីផ្សារដទៃនៅក្នុងតំបន់ និងពិភពលោក។
លោក ហុង សុហួរ អគ្គនាយកនៃ CSX បានមានប្រសាសន៍កាលពីពេលថ្មីៗនេះថា បន្ទាប់ពីខ្លួនបានរៀបចំឱ្យមានប្រព័ន្ធជួញដូរចល័ត MTS និងកម្មវិធីទូរស័ព្ទ CSX Trade ដែលត្រូវបានដាក់ឱ្យដំណើរការបឋមកាលពីថ្ងៃទី ២២ ខែកុម្ភៈ ក្នុងគោលបំណងដើម្បីសម្រួលបន្ទុក ចំណាយដល់សមាជិកទីផ្សារ ដែលជាក្រុមហ៊ុនឈ្មួញជើងសាមូលបត្រនៅដំណាក់កាលកកើតទីផ្សារដំបូង ដែលអាចជាខ្ទង់វិនិយោគខ្ពស់មួយក្នុងការបង្កើតវេទិកាបញ្ជាទិញ-លក់ផ្ទាល់ខ្លួន ដោយអាចមកប្រើប្រាស់វេទិការួមដែលផ្តល់ដោយ CSX ដោយឥតគិតថ្លៃ ធ្វើយ៉ាងណាឱ្យវិនិយោគិនគ្រប់រូបដែលជាអតិថិជនរបស់ CSX ទទួលបាននូវបទពិសោធបច្ចេកវិទ្យា ដែលងាយស្រួល សុវត្ថិភាព និងចំណាយតិច ក្នុងការវិនិយោគក្នុងទីផ្សារមូលបត្រកម្ពុជា។
លោកបានមានប្រសាសន៍ថា៖ «ដើម្បីឆ្លើយតបនឹងតម្រូវការរបស់វិនិយោគិន ក៏ដូចជាជំរុញភាពប្រកួតប្រជែង សក្តានុពល និងភាពច្នៃប្រឌិតរបស់ក្រុមហ៊ុនមូលបត្រជាសមាជិកក្នុងការផ្តល់សេវា ដែលសម្បូរបែប និងកាន់តែប្រសើរជូនវិនិយោគិន CSX គ្រោងនឹងបើកអនុញ្ញាតឱ្យក្រុមហ៊ុនមូលបត្រទាំងឡាយ ដែលមានលទ្ធភាពអភិវឌ្ឍវេទិកាជួញដូរផ្ទាល់ខ្លួនអាចភ្ជាប់មកកាន់ប្រព័ន្ធជួញដូររបស់ CSX ចាប់ពីឆ្នាំ ២០២៣ តទៅ។ ចំណែកឯក្រុមហ៊ុនដែលមិនមានលទ្ធភាពអាចបន្តប្រើប្រាស់វេទិការបស់ CSX រួមរហូតដល់ឆ្នាំ ២០២៥»។
លោក ស៊ូ សុជាតិ អគ្គនាយកនៃនិយតករមូលបត្រកម្ពុជាថ្លែងថា ប្រព័ន្ធ MTS បាននិងកំពុងដើរតួនាទីយ៉ាងសំខាន់ក្នុងការសម្រួលដល់ការដាក់បញ្ជាទិញ-លក់របស់វិនិយោគិន ដោយក្នុងនោះការបញ្ជាទិញ-លក់មូលបត្រតាមរយៈប្រព័ន្ធនេះមានរហូតដល់ ៩៦ ភាគរយនៃចំនួនបញ្ជាសរុប ខណៈដែលការដាក់បញ្ជាតាមរយៈភ្នាក់ងារក្រុមហ៊ុនមូលបត្រមានត្រឹម ៤ ភាគរយប៉ុណ្ណោះ។ លោកថា ជាមួយកម្មវិធី CSX Trade នឹងបំពេញនូវចំណុចខ្វះខាតទាំងនេះព្រមផ្តល់កាលានុវត្តភាពថ្មីមួយទៀតសម្រាប់ទីផ្សារមូលបត្រកម្ពុជា។
លោកបានថ្លែងថា៖ «ការធ្វើឌីជីថលូបនីយកម្ម ត្រូវការជាចាំបាច់នូវនវានុវត្តន៍ បរិយាប័ន្ន និងគំនិតច្នៃប្រឌិតខ្ពស់ដែលអ្នកចូលរួមក្នុងទីផ្សារត្រូវហ៊ានចាប់ផ្តើមជាជំហានដំបូងក្នុងកម្រិតមួយតូច ប្រកបដោយចក្ខុវិស័យវែងឆ្ងាយ តែត្រូវធ្វើឱ្យបានឆាប់រហ័ស ដើម្បីឆ្លើយតបនឹងតម្រូវការទីផ្សារ។ ការចាប់ផ្តើមក្នុងជំហានតូចដើម្បីឱ្យប្រាកដថា ការចាប់ផ្តើមនោះជាការចាប់ផ្តើមមួយដ៏ត្រឹមត្រូវដែលអាចពង្រីកបានលឿនទៅមុខ។
បើយោងតាមលោក សុជាតិ ផ្សារមូលបត្រកម្ពុជាមានមូលធនូបនីយកម្មទីផ្សារសរុបប្រមាណជា ២,៤៣ ប៊ីលានដុល្លារសហរដ្ឋអាមេរិក ដោយក្នុងនោះទំហំជួញដូរសរុបក្នុងឆ្នាំ ២០២១ មានការកើនឡើង ៣៨៦ ភាគរយ និងទំហំជួញដូរប្រចាំថ្ងៃកើនឡើងប្រមាណជា ៣៨២ ភាគរយ ធៀបនឹងឆ្នាំ ២០២០។ គិតត្រឹមដំណាច់ខែកុម្ភៈ ឆ្នាំ ២០២២ ផ្សារមូលបត្រកម្ពុជាមានក្រុមហ៊ុនចុះបញ្ជីលក់មូលបត្រកម្មសិទ្ធិចំនួន ៩ ដោយក្នុងនោះក្រុមហ៊ុនចុះបញ្ជីនៅទីផ្សារគោលមានចំនួន ៧ ក្រុមហ៊ុន និងក្រុមហ៊ុនចុះបញ្ជីនៅទីផ្សារកំណើនមានចំនួន ២ ក្រុមហ៊ុន។ ដោយឡែក ចំពោះទីផ្សារមូលបត្របំណុលមានក្រុមហ៊ុនចំនួន ៦ ចុះបញ្ជីសញ្ញាបណ្ណ៕ LA
